"بعد مرور سنة "
أذن الفجر لتنزل معه وهي تسمع حلطمته : معقولة ترجع له ؟ والله هذي خالتي يحتاج لها ....- سكت بحيرة ليتابع - حتى ما أعرف وش يحتاج لها ! كل الدروس مرت فيها ولا تعلمت !
شبكت يدها بكفه : ما عليك منهم، هي كبيرة وعاقلة وعارفة وش تسوي ! لا تستوصي عليها !
زفر بضيق : مجنونة والله ..
سحر بابتسامة واسعة وهي تشوف اللي قدامها : شهالحلوات !
تقدمت ريم بعبايتها وحجابها ناوية تسلم لتقاطعها سحر بابتسامة: سلام العيد بعد الصلاة ..
بينما شهد بجلابيتها توجهت لوليد لتضمه بقوة وهو بالمقابل رفعها بيده لتصل لراسه وتقبله : اييييه كذا، تعلمي يا سحر !
سحر بضحكة : أنا وأختي نمشي على السنة، مو مثلكم ..
طلعوا من البيت ليصادفون قدام الباب فهد وثامر وطلال وجواد مع ملاذ اللي تحمل" فهد ابن وليد " و" ناصر ابن جواد " بثيابهم وأشمغتهم ..
تبادلوا الكلام والضحكات وهم يمشون للجامع القريب ..
وقف ثامر ليحمل ابن وليد : سحر تبيه ..
تراجع للخلف حتى وصل لسحر اللي تمشي برفقة ملاذ وأعطاها ابنها وقبل لا يسمع كلامها مشى بخطوات سريعة ليمر جنب شهد وريم .. وتتسلل يده لشنطة شهد بخفة وبصوت منخفض : عيد مبارك ..
ابتسمت بخجل وهي تنزل راسها للأسفل، وقبل لا تنطق اختفى من قدامهم بسرعة متوجه للرجال ..
ومجرد ما وصلوا للمسجد ابتعدت شهد عنهم بين الحريم لتفتح شنطتها ، تسللت على شفاتها ابتسامة وهي تستخرج قطعة حلاوى كبيرة ومن كيسها تتدلى تعليقة صغيرة .. سحبت ورقة الملاحظات خلف الحلاوى لتقرأ بمشاعر جياشة خطه الركيك " كل عيد وأنتِ عيدي .. أحبك "
-
بالرياض ...
بعد صلاة العشاء ..
كانت تجلس بمقهى فهد اللي افتتحه من قريب، كان شبه فاضي على غير عادته بكل ليلة .. اليوم الأول من العيد كل الناس تقضيه بين أهلها .. باستثناءها هي، اكتفت بزيارة صباحية لأختها ريتاج وقضت باقي اليوم وحدها ..
ابتسمت وهي تستقبل رسالة واتس آب من خالها وائل ، كانت عبارة عن صورة سيلفي له وهو بالمطبخ يقلي سمبوسة بينما جنبه لمار وهي تحرك قدر الشوربة مع تعليق : ننتظر آخر أذان لرمضان .. كل عام وأنتِ بخير شعولة ..
هزت راسها بضحكة وبداخلها تدعي ما يعكر صفو حياتهم شي ، رجع للمار بشكل مفاجئ وتحت استنكار الجميع تزوجوا بنص رمضان .. وعزموا يستقرون للأبد بإيطاليا بأبعد مدينة عن أهلها وأهله تاركين كل شي وراهم ..
شادن مسافرة تقضي العيد مع عبدالعزيز بإيطاليا اللي راح يحضر الحفل البسيط اللي أقاموه وائل ولمار ..
...: تأخرت ؟؟
رفعت راسها لفهد اللي دخل وتو تنتبه له ، ابتسمت : لا ... متى وصلت ؟
جلس قدامها لينطق : الحين ... - التقط أنفاسه ليبتسم - كل عام وأنتِ بخير .
بادلته بابتسامة : وأنت بخير ..
سند مرافقه على الطاولة ليبتسم : أزين عيد يمر علي ..
عقدت حواجبها ببلاهة : ليه ؟
رفع حاجب بضحكة : يعني ما تعرفين ؟
ضحكت لترفع كتوفها : لا ما أعرف ..
زم شفاته بمجاراة : لأنك معي !
كساها الخجل من صراحته، طول الشهور الماضية كانت تتواصل معه بشكل شبه يومي ، وكأنهم عادوا مراهقين يعرفون بعض لأول مرة .. كانت في البداية علاقتهم يغطيها غلاف الصداقة .. حتى بدءوا بمصارحة بعض ، رجعت تتعلق فيه وكأنها تكتشفه لأول مرة .. غرقت معه من جديد .. وكون هذي ثاني مرة تلتقيه بعد لقاءاتها معه بالشرقية .. تشعر بخجل وتوتر ظهر عليها وهي تحرك الملعقة بشكل عشوائي .. ماحست بنفسها إلا على صوته وهو ينزل راسه ليقرب منها وبهمس : شوي شوي .. توني فاتح المقهى مابي المواعين تتكسر وأخسر
ضحكت وهي تترك الملعقة وتو تستوعب توترها، ليتابع بضحكة : حلالك .. شعور التوتر هذا أنا حاس فيه وكأننا طلاب جامعة متسترين ومخفين نفسهم بأول لقاء غرامي !
ابتسمت لتضيع السالفة : جبت هديل معك ؟
هز راسه نفي : لا .. تركتها بالخبر، كلها ساعتين وأرجع ..
عقدت حواجبها بضيق: ما يسوى عليك المشوار .. انتظر وروح بكرة الفجر
ابتسم : لا يسوى والله .. لو هي نص ساعة، ما صدقت توافقين
نزلت راسها لتنطق بخجل : ترى جايين عشان اتفاق عمل !
ضحك بخفة وهو يسحب كوب القهوة : اتفاق عمل .. مثل ما تبين !
اكتفت بابتسامة ليحل الصمت عليهم حتى قطعه أخيرًا : كلمتِ أحد بالموضوع ؟
هزت راسها نفي وهي تتنهد: لا ..
لان صوته : مو متأكدة من قرارك ؟
هزت راسها من جديد : لا الموضوع مو كذا .. وائل مبتعد عن الكل بعد زواجه ، وما أعرف كيف أفتح له الموضوع
ابتسم : وائل موضوعه سهل، أنتظره يرد علي وأفتح معه الموضوع .. أكثر شخص ممكن يؤيد الموضوع وهو اللي مر بالتجربة ..
هزت راسها باقتناع، ليتابع فهد : كلمت وليد وهديل بالموضوع بس
ضحكت باستغراب : هديل ؟
فهد اتسعت ابتسامته وبضحكة : ايه .. هي أكثر وحدة أحتاج أكلمها .. كون في شخص جديد بيشاركها في أبوها !
*•
تمت بحمد الله..
سبحان الله وبحمده، سبحانك اللهم وبحمدك، أشهد أن لا إله إلا أنت، أستغفرك وأتوب إليك
