الحلقة 8 :
ألينا تحكي :
حليت عينيا مفجوعة .. دوب منجمة ناخو نفس .. ركا الكرهبة بالوقت و غزرلي ..
جود؛ شبيك ؟؟ شفما ؟؟
تلفتت غزرتلوا .. و باقية نغزر حولي .. يعني كانت حلمة !!... حط يدو على كتافي .. و دورني ليه .. باقي يحرك فيا باش نفطن .. حليت باب الطاكسي و نزلت .. ضربتني نسمة هوا باردة .. طلعت راسي غزرت لپلاكة مكتوبة بالألمانية !! .. جا عندي بالوقت ..
جود؛ هاكي اشربي شوي ما... كان كابوس برك ..غزرتلوا و حكمت القرعة شربت شوي .. و نزلتها .. عاودت غزرت للپلاكة ..طلعت راسي غزرتلوا .. منعرش اما وصلت للحد اللي لازم .. نفرز كلشي .. منقدرش نبقا ساكتة ..حاسة بلي كلش يدخل بعضو .. خاطر معرفة بابا بالحكاية متاع راني فبراغ .. نعرفوا باش يقلبها .. و زادة الكوابيس اللي ولات ديرلي من التخمام ..
ألينا؛ وين باش نمشوا ؟
جود؛ ركحتي توا من الكابوس
ألينا؛ لا مزال مجاوبتنيش شكون الجماعة اللي هاجمتنا البارح
جود؛ صار كنتي تحلمي بيهم !!
ألينا؛ اممم خلوضت برشا .. داخلة في حيط
جود؛ ما فما حتى شي تخافي منو .. خرجنا من الدار هاذيكا جيست پاسكو معزولة ... و مام دار فادي معادش تساعد و توا احنا فألمانيا و كلش مريقل انتي كهو آثق فيا .. و زادة باز في بالك اللي فادي كشما قالي ... ألينا كملي رقادك و ما تخممي في حاجة
ألينا؛ احنا قاعدين نهربوا من بابا جود؟
غزرتلوا كي ملامحوا تبدل غزرلي ندرا كيف .. ضيق عينيه جا باش يحكي اما سكت .. قاعد يثبت مليح فاللي سمعوا ..
تلفتت نغزر البعيد مبعد غزرتلوا ..
ألينا ؛ إيه رجعتلي الذاكرة جود
جود؛ ت ت تقصددي الل..
ألينا؛ إيه نتفكر كلشي عليا و رجعتلي نهار خرجت من الدار
جود؛ أما ؟؟ش
ألينا؛ شنوة اللي خلاني نتفكر ؟؟ جيت خارجة نشري و جيت باش نشق الطريق .. قريب صدمتني كرهبة .. كلش رجع وقتها .. و زادة العلاج ..
موش هذا المهم .. الأهم انو رجعت و خلاص
جود؛ ع علاش مقلتيش كي سقسيتك ؟
ألينا؛ باش نعرف شنية باش تعملوا؟ شنوة كان هدفكم .. ماك كنت باش تهرب .. قبل ما يتغمضوا عينيا ريت فادي كي يقنع فيك باش تنزل أما أنتا لا .. زعما شتبدل توا ..؟ و زادة أكيد بابا قلب براغ .. كي وصلت الأخبار للصحافة معناها. . أكيد شافوني عل هادي هربتني لألمانيا . .. تي خرجتني من تشيكوسلوفاكيا .. و مكنتش فايقة .. امل موش متفآجأة برشا ..
جود؛ هذاالكل كنتي عمبالك بيه و تمثلي ألينا !
ألينا؛ من التالي جود.. تعبت برشا .. و نحب نعرف الصح .. بقيت معاكم باش نعرف السبة كهو
جود؛ تحب تعرف السبة !!
ألينا؛ إي . علاه هاد الشي كامل ؟
جود؛ خاطر بابا سيزار أكبر عدو لباباك مراد .. بالسيف ما ركحت الأمور بيناتهم .. تحب تعرف أكثر بابا من أكبر رجال المافيا فإيطاليا ..شركات متاع إستيراد البترول و المقاولاتية و الاعمال الخاصة تغطية اكهو .. وراهم عالم قتل عمرك ما ريت كيفوا .. هذا السبب الأول انو تقوم حرب بين الفيدرالية ورجال بوك و بابا. . الحاجة الثانية انو كنت مخمم فمصلحتي .. خاطر بابا كان سمع كان باش يسحب كل المشاريع اللي تحت يدي .. و يمرجني بالمافيا باش نعاود ننظم ليها ..
ألينا؛ ههه السبب اللول ننجم نتقبلوا .. باز كنت نخاف على حياة بابا .. اما السبب الثاني ههه كنت أناني خممت فمشاريعك فحياتك انتا !! مخممتش كان مت انا نهارتها كان ماش فادي .. ههه تي حتى فادي مشاركك فالحكاية .. كي هكا علاش مقتلتنيش ... ماك رجل مافيا ولد مافيا ..كنت تنجم تتهنا عاللخر ..
جبد الفرد حطوا فوجهي عينيا تحلوا و أنا نغزرلوا !!..
جود؛ هذا اللي تحوس عليه انتي أه ؟ احكي؟؟.. موش حاجة صعيبة برشا .. يا ما تعداو عليا عباد هكا ..و مرفليش جفن.. احكي هاو الفرد فوجهك
تبسمت و غزرتلوا .. قدمت لين قاس الفرد فجبهتي .. غزرتلوا فعينيه ..
ألينا؛ موش أول مرة تهز الفرد عليا ..اكا النهار .. زادة حطيتوو ورا راسي .. كون موش فادي.. كنت عملتها أكا النهار .. أما فما فرق تعرف شنية .. اكا النهار كنت موجد السلاح باش تيري .. أما توا هاك مركحتوش ..
غزرلي ندرا كيف .. أول مرة تكون بيناتنا نظرة كيف هكا .. نظرة مخلطة .. نظرة بين بنت أكبر رجال الشرطة الفيدرالية و ولد أكبر رجال المافيا .. نظرة لخصت كمية الدمار اللي جمعنا في زوز .. و خلا الفرد هو المسافة اللي بيناتنا
________________________
#يسرى_أمجوج👑
#عشق_محرم_دوليا⚖
#بارت1
