الحلقة 4 :
بارت 1 :
ألينا تحكي :
تكيت عالباب ندي نفس... للدوك نحس بشفافو عليا .. غمضت عينيا بالقاوي .. بلاكشي حلمة دوك نفيق منها .. مي والو .. هزيت صوابعي بالسيف .. عديتهم على شفافي نتحسس فيهم .. إحساس ندرا كيف .. دموعي نزلوا .. منعرفش علاش راني نبكي توا ... أما جيست نحب نبكي .. مشيت بخطوات لين ترميت على فراشي .. باقي كلشي يتعاود في مخي لين رقدت..
...................................
فادي يحكي ؛
اليوم تعدا شهر من آخر مرة صرات الحادثة .. أحسن شي انو رتاحت جروحها .. و تحسنت برشا .. باقي كان الذاكرة متاعها .. منجمش نقعد معاها برشا خاطر وحلت فالخدمة .. دوب نحكيو .. حتى هي نحسها ضايعة .. جود نراه كان وقت يجي للشركة .. حتى الدار معادش جا ليها .. نعرف مينجمش يتحمل فمواضيع كيف هكا .. بطبيعتو يحب يفرز أمورو فيسع .. قفلت الپيسي .. غزرت للساعة لقيتها العشرة متاع ليل .. تي شبيني نسيت معيطتلهاش باز تكون تقلقت .. هزيت التيليفون نكلمها يخرجلي مقفول !!!. جامي صرات هكا و طفا تيليفونها. . هزيت مفاتح الكرهبة و نطرت نجري .. و نكلم في جود اللي ندرا فاه غاطس ..
درجين و كنت فالدار .. منعرش قداش من رادار حرقتوا .. المهم نوصل و نطمن من غير شي .. فرطت فاها هاد الايام .. ناقص كان تصرالها حاجة .. دوب ما قاريت .. عيطلي السخطة لاخر ..
جود؛ شفما
فادي؛***** شبيك الايام هادي ؟
حليت الباب و دخلت نعيط عليها
فادي؛ ألييييينا .. ألييييينا
جود؛ فاش قام تعيط عليها في وذني
فادي؛ *** ** بالاك صراتلها حاجة ..
طلعت حليت بيتها شي .. ريحتها مفماش
جود؛ وين هي ؟
فادي؛ منعررررش هاو تيليفونها هوني طافي ..و هي دار كامل مفماش
جود؛ برا فركس مليح .. وين عندها باش تمشي
فادي؛ اففففففف
جود؛ هاني جاي
علق عليا ... كملت فركست عليها فالطاجات الكل مفماش .. حتى من دبشها هوني .. وين تكون مشات أصلا معندها وين تروح .. تي باز يعرفوا اللي هي مفقودة و يخبروا عايلتها !!.. حليت الباب متاع برا نجري .. و نفركس عليها فالجاردان بالكشي نلقاها .. شي !! ريحتها مفماش ... عديت يديا على وجهي .. نحاول نهدي روحي .. خاطر باش نهبل عقاب الليالي ..
جود يحكي ؛
فالشهر اللي تعدا حاولت اني منروحش لدار فادي .. هكا منقابلهاش .. اصلا منعرش كيفاش باش نقابلها .. اول مرة نخاف نواجه طفلة من اصلوا... احساس ندرا كيف يجيني ساعات وقت يبدا فادي يحكيلي شيعملوا .. و تفوريخ متاعها .. نلقا روحي نتبسم وحدي .. لين نفيق على روحي .. عديت الوقت لاهي مع الفواياجات.. نحضر فالعشاوات متاع بابا .. و بالزايد الخدمة الكل عليا ... بحكم المشاريع اللي قاعد نخدم عليها .. لازم ناقف عليها. . اليوم ديسيديت نعمل جوي .. خاطر عندي برشا مقعدتش .. جيست مع هزيت الكاس .. غمزتني وحدة .. هه كيف العادة .. رجعتلها الغمزة .. جات قعدت قدامي .. ضربت كاسها في كاسي و شربنا .. باقية تقدم .. غزرتلها ملفوق للتحت .. ممم موش خايبة .. شعرها كحل طويل .. عينيها فالاخضر مخلطين .. تبسمت على جنب و رشفت من الويسكي .. هزيت التيليفون درتوا سيلونس باش ميمرجونيش بالخدمة .. طبست عليا .. لفيت يديا على حزامها .. جيست ما حطيت شفافي على شفافها .. تفكرت اكا الليلة .. جبدت روحي فيسع .. باقية تغزرلي اكا الطفلة .. على تلفيتي .. لقيت فادي يطلب .. جبدت روحي منها ..هزيت تيليفون .. برشا مرات !! .. اكيد فما شي .. عيطتلوا باقي يحكي اكاكا .. هزيت المفاتح جيت شنخرج .. حكمتني من يدي ..
-شنوة منجمتش تبوسني خاطرها ؟
باقية تدحنس عليا .. فكيت يدها.. حطيت فلوس عالكونتوار .. و خرجت .. جيست ما خدمت الكرهبة .. باقي نخمم .. وين تكون مشات .. اصلا ما تعرف حتى بلاصة هوني .. شنوة كان صرالها شي !! .. نسوق و نخمم .. شوي كهو و نوقز تيليفوني .. نومروا منعرفوش ..
ألينا؛ ارواح لسونترال بارك
جود؛ ألينا!!!! ياخي ش......
علقت عليا .. باقي نغزر للتيليفون في يدي .. برشا أفكار خايبة جات فمخي .. شتعمل هي هونيك و الجو مقلوب هكا .. المطر تصب .. البرد يقتل زادة .. و فالليل!! .. منعرش كيفاش وصلت غادي .. دخلت باقي نفركس عليها .. فالكافيتيريات اللي فما شي .. بقات كان الجاردان اللي من التالي .. خرجت نجري... غزرتلها كي قاعدة عالكرسي .. مبلولة بكلها .. لابسة كان روب قصيرة .. قاعدة و منزلة راسها للتحت.. نطرت ليها .. جيست مع وصلت طلعت راسها تغزرلي .. غزرة ندرا كيف .. قدمت ليها .. حالتها متفرحش .. وقفت تغزرلي كهو .. باقي ننهج و نحاول ناخو نفس .. جبدتها عندي عنقتها على قد ما ننجم ..
جود؛ ألينا!! .. شتعمل هوني !! و فالليل مخفتش ياخي يصرالك شي .. و فالجو هاذا .. في بالك قداش خوفتني عليك .. فاش قام تخرج توا !!!
باقية جامدة فبلاصتها .. جبدتها شوي من كتافها نغزرلها ..
جود؛ شبيك!!! صارلك شي !! احكككي!!!
دورت عينيها عالبلاصة الكل .. مبعد تلفتت غزرتلي .. بلعت ريقها ..
ألينا؛ علاش عملتوا هذا الكل ؟!
............يتبع..................
#عشق_محرم_دوليا⚖
#يسرى_أمجوج👑
