الحلقة 27 :
طلع عينيه ثبت في عينيا .. للحظة لمعت في راسي فكرة .. طلعت يديا لفيتهم ورا رقبتوا .. غزرلي باستغراب .. حكمت بالشوي. بالدلال
ألينا؛ جووود
جود؛ اممم
جبدتوا ليا أكثر .. منعرف لكان راني ندوخ فيه ولا في روحي ..
ألينا؛ نعرف راح تتغشش و ابدا تعيط .. أما عيشك افهمني فديت من البيت هاذيك حبس راهي .. تخنقت فيها ..
نزلت زوج دمعات تاع كذب .. هز يدو من على الحيط .. مسحلي على خدودي بلعت ريقي .. بديت نخاف فكرتي تنقلب عليا ..
حط صوابعوا على رقبتي بدا بعدي فيهم .. يحكي بصوت مبحوح
جود؛ مش راح تقدري تبعدي .. مهما حاولتي .. في بالك اللي كاين كلاب فهاد الجهة .. كون خرجتي لحم ينسلوه من العظم
ألينا؛ وا واش !
جود؛ المفتاح منين جبتيه ..
نزلت يدو تنطرت من بين يديه .. بعدت
ألينا؛ منقولش
جود؛ أوكي .. جبد تيليفونو من جيب الشورت .. منعرف واش دار .. للحظة شعلوا الضواو .. خاطر كان الضو خافت فالفيلا كامل شغل فيوزة ..
قدم حكمني من ذراعي كبس عليه .. قريب ينصلوا .. جبدني .. لنص الصالون ..
ألينا؛ سييييبني
تلفت كـ ي تلموا الخدامات الكل منزلين راسهم ..
فلتني و ترما عالفوتاي ..دخل يدو تحت المخدة جبد فرد .. باقية نغزرلوا .دوكا هادا واحد سكران و كنت رايحة نلعبها عليه .. ركحوا و هز راسوا ..
جود؛ كل وحدة تحط مفتاح بيت مرتي هنا .. اللي تحط تاعها .. تقدر تروح .. غزرتلوا و تلفت غزرتلهم كي بداو يقدموا بالوحدة يحطوا مفتاحهم و يروحو .. تلفت غزرت للطفلة .. عينيها غرغروا بالدموع .. كملوا كامل و راحوا بقات غير هي .. طلع راسو ڨحرلها ..ووقف مشا جيهتها
جود؛ مفتاحك ؟؟
-- م م مسيو جووود ..يعيشك ارحمني .. طاحلي .. و و أمي معندهاش شكون
جود؛ بلللللعي
دموعها نزلوا ... حط الفرد فنص جبهتها .. تنطرت ليه نجبد فيه من ذراعوا
ألينا؛ جوووود شتعمل !!! حبس قدمت للطفلة دزيتها لورا .. ووقفت أنا و هي ورايا .. طلع حاجبوا .. ڨحرلي ڨحرة تاع موت
جود؛ تبعدي ولا
ألينا؛ مش رايحة نبعد .. أنا اللي سرقتلها المفتاح .. عينك تقتلها اقتلني أنا قبل ....
جود؛ ****** بعدي
جبدني من ذراعي .. رجعني قدامو و صوب عليها .. تنطرت عنقتوا .. رجع زوج خطوات لورا .. خاطر مش مصحصح .. غرزت راسي فرقبتوا ..دموعي نزلوا .. محال تقتل روح بسبتي...
ألينا؛ عاقبني أنا فبلاصتها .. عيشك متقيسهاش .. أنا السبة .. س سرقتلها المفتاح كي كان تنظف فالدوش .. جووود يعيشك سيبها ندير واش تحب ..
جبدني من حملتوا .. حكمني من ذراعي بالقاوي ..
جود؛ قلتيلي نعاقبك نتي ؟؟
هزيتلوا براسي ايه .. شاورلها بالفرد بش تروح ..
جبدني من ذراعي للكوزينة .. حل الكونجيلاتور .. جبد سطل تاع مكعبات ثلج .. فلت ذراعي زاد جبد الثاني ..
جود؛ تبعيني ..
راح الشوكة .. تكا على بوطون .. تحل الباب .. ظهر كاين صونصور .. دخلت معاه .. تكا على طاج لخر .. اللي فيه بيتي .. طلعت ريقي شباش يعمل .. مع حبس .. خرج باقية نتبع فيه .. حل الباب اللي مقابل بيتي .. دخلت وراه من ريحة البارفان عرفتها بيتوا...لعنت روحي ألف مرة ... هاربة و هو او قدامي .. حل باب .. باقية فنص البيت نغزرلوا ..
جود؛ ارواحي
تبعتوا لقيتوا دوش .. تقول شومبر مش دوش .. حل الما البارد تعبا الجاكوزي .. لما فيه السطال تاع الثلج .. طلعوا فوق السطح تاع الما ..
جود؛ نحي قشك و ادخلي وسطوا ..
ألينا؛ كيفاش ؟؟
جود؛ تحبي ننزل نقتلها؟ و صدقيني نعملها ..
قدم قعد على حرف الجاكوزي .. هز قرعة محطوطة فوق تابل .. فرغ فالكاس و باقي يدور فيه .. طلع راسو يغزرلي .. طلعت تيشرت نحيتوا .. رشف من الكاس .. منيش حابة نشوف معاه .. هكا بش نموت من الحشمة .. حطيت يدي على حزامي هبطت الشورت .. بلعت ريقي .. و مشيت لين وصلت قدامو .. طلعت درجة ..و حطيت رجلي فنص الما .. الدم جمد .. بارد عاللخر ..طلعت راسي .. لقيت عينيه مرشوقين فيا .. تنهدت بحسرة و نزلت .. بارد مش نورمال .. رميت نرجف ..تلفت ليا .. رشف من الكاس .. و حط يدو فنص الما ..يقدم فالمكعبات ليا ... شفافي يرجفوا .. حاسة البرد دخل لنص عظامي..نزلت راسي نغزر للما .. لازم ننتحمل ..
تعدات ربع ساعة .. شفافي زراقو من البرد .. عينيا بداو يتغمضوا .. حاسة روحي فشلت خلاص .. شوي و بديت نشوف فالما يضبب ..
#عشق_محرم_دوليا
#يسرى_أمجوج
