الحلقة 34 :
طرازها ملكي بالدرجة الأولى .. كلش مصمم بطريقة پيرفكت .. و مكانش باب بين الشك و بينها .. دونك الشط هذا تابع ليها .. تأففت .. أكيد واحد حياتنا كامل فالدروڨ والسفارات لكبار .. باينة يفرش الدراهم و يرقد عليهم ..
نور؛ آي وين تهتي
ألينا؛ نو هنا برك ..
حالها واحد من لي ڨارد كور الباب تاع الفيلا .. دخلنا .. عينيا تحلوا الفخامة كون جات بلاصة .. ديكور ملكي مش نورمال ..
نور؛ مرحبا بيك فقصر العايلة .. نورمالمو راكي معانا .. مي نقدر نفهم علاه مجابكش جود هنا .. خاطر بش يقتلوك بعينيهم .. وين يا تعيشي معاهم
ألينا؛ عايشين كامل هنا ؟
نور؛ بحكم أنو بابا يحب أجواء العافية .. و زيد بش نتفاداو الأخطار و التهديدات ..
طلعت معانا لبيتها .. حلت الخزانة .. تقلب فالقش تاعها .. مبعد جبدت روب فالبوردو فيها طبقات .. توصل للركبة ..
نور؛ نظن هاذي تجيك تقتل و زيد نظن نفس لاطاي تاني ..
ألينا؛ مرسي تعبتك معايا
نور؛ تي حبسي من الرسميات هادي
ألينا؛ ههه أوكي
نور؛ هاو الدوش
دخلت بدلت .. جات تهبل مع الصاندال اللي لابسة .. لفيت نغزر للورا .. حليت الكودشفال اللي كنت دايرة .. و سيبت شعري .. و خرجت .. لقيتها قاعدة فوق السرير .. تخرب فتيليفونها ..مع خرجت صفرت
نور؛ اوووه يا جوود واش راح يصرا فيييك
تبسمت .. قدمت للكوافوز هزت روج ..
نور؛ بقا غير الغوج بوردو و تكمل الطلة ..
حكمتوا عليها وقدمت درت منو ..انا نريڨل فيه و الباب تحل ..
ريتا؛ نوووور
مع دخلت تلفتت جات عيني فعينيها .. أكيد شايفتها ..
نور؛ آه أهلا ريتا
ريتا؛ مم عندك ضيوف
باقية نتفكر .. عينيا تحلوا .. النهار اللي تقوصت !! .. صح كانت دايرة ماسك بصح قدرت نميز عينيها ..
نور؛ ألينا؛ نعرفك ريتا بنت عمي .. ريتا كيما تعرفي هاذي ألينا
ريتا؛ مش مهتمة بزاف نعرف شكون .. جود جاا ؟؟ .. توحشتوا ؟؟ .. راهم فالشط
جاوبتها بسماطة نور
نور؛ وي
خرجت
نور؛ كسرة لدوك الرجلين اللي تعوجي فيهم كي العنقا
تلفت ليا
نور؛ مديريش عليها ألينا ... ألييينا
ألينا؛ آ نورمال
نور؛ يخي هادي كانت خطيبة جود .. قبل ما يتزوجك .. و لدوك مزال عندها أمل فيه .. تولهي منها .. هيا نلحقوها
تبعتها .. و أنا نخمم متأكدة بلي هي .. مام نبرة الصوت .. وصلنا الحفلة .. لقيناها معاه و قدامهم امو تاع جود .. و هي تكروشي فيه .. مع وصلنا غزرتلي ندرا كيف ..
تلفت لجود عينيه مرشوقين فالروب .. عينيا لمعوا من الفكرة اللي فراسي .. تبسمتلوا تبسيمة تذوب .. و قدمت عندهم وقفت في وسطهم.. دزيتها شوي .. و مبعد تلفتلها ..
ألينا؛ أوبس باردون مشفتكش ..
حسيت يدي عديتها على لحيتوا ..
ألينا؛ مطولتش على حبيبي ياك
كاميليا؛ اللطف يا ربي لاحشمة لاوالو ..
مشات .. باقي يغزرلي و يتبسم ..
نور؛ أووو خاصني نديرلكم فوطو .. احبسو كيما راكم .. ريتا اجبدي شوي ..
تلفت غزرتلها كي ڨحرتلنا و مشات .. تبسمت .. و تلفت غزرت للكاميرا .. طبس لوذني ..
جود؛ راح نهبل
تلفت غزرتلوا ..
نور؛ أووووو أشيكي يا و جات تهبل اللقطة ..
تلفتنا على صوتها .. جبدت روحي شوي منو ..كملنا السهرة نفدلكوا .. لين وفات مشا ودع عايلتوا .. و تعدينا وصل ألفة و فادي .. و كمل يسوق ... الثلاثة تاع الصباح .. تاعبة عاللخر .. تكيت راسي للتالي .. يسوق .. ساعات يرمي عينيه عليا .. ..
ألينا؛ علاه ما زوجتش بيها زلة
جود؛ كيفاه ؟ شكون ؟
ألينا؛ خطيبتك
تبسم غزرلي و تلفت يسوق ..
جود؛ ممم موديل تاني .. و سموريتها حلوة
ألينا؛ ههه واش محتمك مالا بالله الباب يفوت جمل
جود؛ و كي عاد يفوت جمل علاه جيتي بيناتنا قبيل و حبيبي و معرف
ألينا؛ يووو مقهور عليها .. الفخار يكسر بعضو ..
ضحك بالصوت حبس قدام باب الفيلا بالوقت .. رجعت شعري للتالي .. هو نزل ديحا .. حبيت السبتة و نزلت .. منار واقف قدام الطوموبيل .. جيت نتعدا حكمني من يدي .. تخبطت فيه ..
ألينا؛ نعم ؟
جود؛ حاب نحكي معاك ..
ألينا؛ مش حابة نسمع
جود؛ ألينا راني غالط هيه معاك .. بصح كانت ردة فعل على جرح تكويت منو .. مش تبليتك
ألينا؛ واش فايدة الهدية هاذي دوك .. نظن اللي ص
قص عليا كي حط شفافو على شفافي و باسني .. عينيا تحلوا من الجاست .. جيت نجبد .. لزني ليه أكثر من وسطي .. قلبي راح يخرج من بلاصتوا .. جا بين عينيا غير الجاست تاع الفيديو دموعي نزلوا .. باقية ندز فيه لين جبد .. غزرلي عدا عينيه على وجهي .. غزر للدموع قدم بش يمسح .. جبدت بخطوة لورا
ألينا؛ متكونش حاب دير فيديو خلاف ...
غزرلي مستغرب .. قدمت ليه ..
ألينا؛ خلاااص نظن شخت لليلة وحدة و كانت كافية ليك بش تنتقم مني .. و كانت كافية ليا أنا بش نكرهك .. توله تقدملي مرة خلاف ..
مخليتوش يحكي .. طلعت دروج هاذوك .. رجالوا منزلين ريسانهم ... طلعت نجري لبيتي .. ترميت عالسرير. .. الدموع اللي حاكمتهم نهار كامل .. لقاو طريقهم دوكا .. حتى غفيت ..
الصباح فقت .. تململت شويا .. مبعد حليت عينيا .. مركزتش مليح .. دوب ما استوعبت .. عينيا تحلوا !!!!!
