.الحلقة 24 :
نغزر للمراية هاذي ثاني مرة نتجهز هكا .. زعما هاد المرة تصلح و ما يصرا والو .. امنية داخلي انو تصرا حاجة تخرب جد هذا العرس.. باقية تريڨلي فالفوال ... اني تغزرلي .. حابة الحفافة للدار .. خايفين نهرب .. مع كملت باقية تشكر و تعاود .. و اني و خوالاتي و عماتي يضحوا و يشايخو .. مخي مش معاهم كامل .. كيفاه متزوج بجود و نزيد نعاود متزوج.. للحظة تذكرت اكا الليلة اللي عديناها كيف كيف .. مخي حمد .. بابا قال اللي عقد الزواج باطل و بش يلغيه بطريقتوا .. مي معلابالوش بلي صار من قبل .. تنهدت و تأففت .. محسوب رايحة نرقد مع ال**** .. كون يموت بعد .. نعرف وين حاب يوصل .. لبلاصة فالأنتربول .. مش راح يتزوجني محبة فيا .. قدمت ماما .. حطت يدها على كتافي ...طلعت راسي غزرتلها فالمراية .. دوك وين فقت بلي خرجوا .. بقات كان هي ..
جازية؛ شوي و يلحق الكورتاج .. نتمنى متتهوريش .. رايحة تبداي حياة جديدة .. و عاصم انسان مليح .. متأكدة راح تحبيه ..
مستناتش جوابي و خرجت طول .. قمت من قدام الكرسي .. هزيت تيليفون .. شكلت نوموروها .. قداش محتاجتها دعمني دوك .. جيت بش نعيط نبعد تراجعت كامل .. رميتو عالسرير.. و خرجت للبالكون .. الليل بدا يطيح .. أحسن شي دارو عشا مش غدا .. صوت طوموبيلات بدا يزيد.. كبست على يديا .. خايفة .. منعرف علاه .. أنو حياتي قاعدة تدمر .. ولا أنو بش نعيش حياة مع راجل جديد.. نزلوا من الطوموبيلات الشطيح .. تبسمت بوجيعة .. و انا نتخيل يكون هو اللي نازل .. زعما عايلاتنا فرحانين .. فقت من سرحتي كي لقيتوا يغزرلي من لتحت و يتبسم .. ڨحرتلوا ودخلت .. مسحت الدموع .. شوي و دخل بابا .. باقية منزلة راسي ..قعد قدامي ..
مراد؛ بالاك دوك كرهتيني .. و تقولي بابا دمرلي حياتي .. مي صدقيني نعمل فهاد الشي على جالنا كامل .. نظن لحق الوقت بش تعرفي سر العداوة هاذي.. سيزار خويا
ألينا؛ كيفاش ؟؟
مراد؛ خويا من أمي الله يرحمها ورا ما مات بابا عاودت زوجت بميشال .. اللي كان عندو ولد من مرا خلاف .. كانت علاقتنا مليحة لين جا هاذاك النهار.. اللي فقت بلي دخل للدومان تاع لادروڨ بحكم بالله طلياني .. واللي اكتشفت مبعد بلي راهو خدام فلادروڨ و اللي تزوج أمي و ضحك عليها حسيت على جال ميديرش شكوك من إقامتوا فالجزاير ... سييت نجبد سيزار بغض النظر على واش يكون باباه .. خاطر كنت معتبروا كيف خويا تاع الصح .. مام أمي اعتبرتوا كيف ولدها ...حاولت لين كرهت .. تراها أنا دخلت لسلك الشرطة .. بعد ما فوت كونكور .. هو الفترة هاذيك قال اللي جبد عالخماج اللي كان يبيعوا .. لين واحد النهار تحط دوسي فوق بيرويا انو نحقق في قضية ادخال المهلوسات للجزاير عبر وهران .. ورا خدمة شهور فقت .. شكون ورا هاذ الشي فرايك ؟
ألينا؛ سيزار ولا باباه؟؟
مراد؛ في زوج .. ميشال يأمن تموين بحكم يخدم عند بارونات المخدرات فالطليان و زواجو بما ما و خداعو ليها بلي يحبها بش يبقى هنا فدزاير و يدي الجنسية .. و زاد درب ولدو عالخمج اللي فيه .. ولا يهرب و يبيع هنا ..
ألينا؛ و جداتي كانت تعرف ؟؟
مراد؛ أكيد لا كانت نية و مصدقة بلي يحبها .. لدرجة كانت هي اللي تصرف بحكم جدي كان لباس عليه ..
ألينا؛ و نتا شعملت محاولتش تخبرها؟؟
مراد؛ واش نقولها ؟ ماما هاذاك الراجل اللي عشتي معاه السبع سنين هاذوا تزوجك مصلحة و بلي يخدم لادروڨ و ولدوا اللي دايرتوا كي ولدك كوپي تاعو !! .. دخلت نخدم فخدمتي .. قبل كلشي ... الواجب اهم سيرتو كي تكون محقق .. خيط ورا خيط .. شهر ورا شهر حكمت أدلة ..ووصل النهار اللي كانو فالدار ...ليلة راس العام .. دخلت .. لقيتهم يضحكوا امي عاملة عشان مفخم ..
-ايجا ولدي طيبة اللي تحبون انا و سيزار .. الطعام باللحم و الحاج
سيزار؛ اممم و انا نقول واش هاذ الريحة ..
ميشال؛ مرتي الغالية يسلموا يديك
بقيت نشوف معاهم .. حلم العائلة اللي كنت عايش فيخ لحق الوقت بش نفيق و نفيق امي منو .. دخل عناصر الشرطة ورايا .. يجريو .. ليهم زربوا حكموهم و ه ما يفارعوا فيهم ...أمي مشوكية .. هوما يعيطوا و يڨحرولي
سيزار؛ مرااااااد واش فيهم علاه مقيدينا ..
مرديتش عليهمو هوما مخرجينهم كل همي و انا نغزر لامي طايحة فنص القاعة تبكي .. قدمت عندها بعد ما داوهم فهمتها في كلش .. باقية جيست تغزرلي حتى طاحت ويتها للسبيطار .. ليسونسيال صراو بزاف حوايج .. منهم انو اني دخلت في صدمة نفسية .. ميشال تقتل في نص الحبس قبل ما يهدر ..سيزار دخل فحالة هستيرية .. لين تحط في تقرير الطبيب بلي مجنون عقلي ودخلوه للسبيطار تاع الامراض العقلية ..امي كملت حياتها جهامة بلا روح .. لين جا النهار و روحت لقيتها ..
+سكت بقيت نشوف معاه و هو يعدي فيديه على عينو.. اول مرة نشوف بابا يبكي .. دموعي نزلوا ..
مراد؛ لقيتها ميتة غارقة فدمها .. 6 رصاصات ... مشهد جامي ننساه .. البوليس حاو ... الفرق الجنائية تاني .. شوي و جاني تيليفون بلي سيزار هرب .. الغش عماني .. حوست عليه فدزاير كامل .. و تأكدت بلي هربوه البارونات تاع الطليان .. مكانتش من صلاحياتي اني نتابعوا و هو فالطليان ..و حطيت بين عينيا الأنتربول ولا FBI .. بش نقدر ندمروا ..ووصلت .. لكن كور فخدمتوا ولا كي نحكم عليه حاجة .. ديما كلابوا يعترفوا بلي هوما أصحاب العملة .. قدام من مرة صراع مواجهة بيني و بينو ..و مش راح نركح حتى يتلف حبل المشنقة عليه ..
مسح على وجهوا و تنهد بوجيعة .. كورتوا و عنقتوا .. اول مرة نشوف بابا بحالة الضعف هاذي .. الوجيعة اللي راني حاكمتوا ..مكانش اسوء من منظر هكا .. جبدني من حملتوا باسني على راسي .. يحكي ببحة البكا
مراد؛ منيش حابهم يضروك يا بنتي .. داولي العين الغالية لولة مش حاب يكملولي الثانية .. في بالك اللي باباك يقدر يضرك !!! ... الرجال كاينين و يطايشوا .. الوحيد اللي كي يحط راسو يخمم فيك هو باباك .. إذا كليتي .. إذا شبعانة .. إذا لابسة ولا معندكش حاجة .. كي يشوف معاك يشوف فيك طرف من لحموا قاعد يكبر .. مجربتيش مرة تغزر للخطوط اللي فوجهوا .. لعينيه الذابلين .. لتقاسيموا اللي تاعبةمن شقا الدنيا .. لتجاعيد يدو .. لشقا سنينوا بش تلحقك اللقمة لفمك .. انك تاكلي خبزة بالحلال .. على ظهرو على صحتوا .. على وقتوا .. كاين راجل راح يحبك هكا ؟.. مكانش .. مش راح تلقاي اللي يتحمل تخرنينك من اللي تكوني بيبي لين تكبري ..يحفظ تفاصيلك من صغرك .. الوحيد اللي كي يضحك معاك .. تحسين يضحك صح من قلبوا معندكش ولو ذرة توسويس انو يمثل .. عليك .. هاذاك هو بوك اللي محال يرضالك الشر ..و لو على حسابوا هو ...
#يسرى_أمجوج
#عشق_محرم_دوليا
(البارت للخر تاع الحلقة كتبتوا بالدموع .. كورتوا صح من قلبي .. ربي يحفظلنا والديها 😥)
