انت وطنى مكتمله

ذكريات

كانت جالسه أمام التلفاز على الأريكة ترجع رأسها للوراء لتتذكر ثلاث سنين مرت من حياتها
فلاش باك
سيلفيا : بابا يا حبيبى يا قلبى يا روحى
نسيم : ايوه أيوة يا عينى يا مناخيرى يا كليتى قصرة عاوزة أية
لتهندم سليفيا ملابسها علامه الاحراج
سليفيا : ايه يا بابا كاشفنى كدة علطول
مريم : ما المفروض يا لوفا يا قلبى تغيرى شويه من طريقتك
سليفيا : اوبا ماما دخلت فى الموضوع ها حد تانى عندة كلمه
نسيم : اخلصى داخله بهوسه ودوشه فيه ايه
سيلفيا : مفاجاءة
مريم : ربنا يستر خير
سيلفيا : انتوا طبعا عارفين ماريان صاحبتى
تاتا : خير جالها عريس وهتتجوز
سيلفيا : ودى تبقى مفاجاءة لا طبعا
تاتا : انا بقى عندى المفاجأة يوم ما ربنا يكرم ويبعت ليكى ابن الحلال
سيلفيا : مش هنخلص من الحكايه دى يا تاتا انا مبفكرش دلوقتى فى الجواز انا بفكر فى مستقبلى وبس
تاتا : مستقبل البنت فى جوزها وبيتها وعيالها مش علشان اتعلمتى عاوزة تخرجى عن التقاليد
سيلفيا : استنى بس اقول إلى عندى وأبقى سمعينى اسطوانه كل يوم
تاتا : عجبك كلام بنتك يا نسيم انا بقول اسطوانات
نسيم : سيلفيا عيب يا حبيبتى كلمى تاتا بأحترام
وكان يغمز لها
سيلفيا : حاضر المهم المفاجأة
مريم : اه صحيح قولى
سيلفيا :ماريان عمها فى أمريكا بعت ليها وقال لها انها تبعت ورقها ليه وهو هيقدم لها فى كليه طب هناك وهيجيب لها شغل علشان تكمل دراستها
نسيم : وايه المفاجأة هنا
سيلفيا : انى مسافرة معاها
وجوم على وجهه الجميع حتى استفاق نسيم
نسيم : يعنى ايه
سيلفيا : ماريان قالت له ممكن اجيب صاحبتى معايا قال لها ممكن وطلبت منى اوراقى علشان اسافر معاها
مريم : تعملى ايه
سيلفيا : ادرس وأكمل تعليمى
لتجد سيلفيا الفتاه العشرينيه الصمت هو السائد فى هذة اللحظه لتنتفض الجدة
تاتا : ولا عشنا وشفنا البنات تسافر بلاد برة لوحدها القيامه قربت اكيد
سيلفيا : تاتا لو فضلنا على افكار حضرتك عمر ما الزمن هيتقدم وهنفضل محلك سر البنت دلوقتى بتسافر الفضاء
تاتا : تسافر الفضاء تسافر على الحمار زمن متشقلب ولازم يتعدل
ثم تتجه الجدة بالحديث إلى ابنها نسيم
تاتا : وانت مالك ساكت ليه ايه عجبك الكلام يا ابن بطنى هتسيب بنتك تسافر لوحدها علشان تجيب لينا العار لو حصل الكلام دى انا ما قاعدة عندك نهائي هروح لاخوك اقعد معاه
ليتنهد نسيم
نسيم : مفيش عندى حد مسافر
سيلفيا : بابا نتفاهم
نسيم : مفيش تفاهم انتهى الكلام سفر لوحدك مفيش لما يبقى يجى عريس مسافر برة وتتجوزيه ابقى سافرى معاه غير كدة مفيش عندى
سيلفيا تنظر إليهم بصدمه وقهر وهى متألمه لأن حلمها امامها وهى لا تستطيع تحقيقه والحجج واهيه لأنها فتاه إذا كانت شاب كان الكل سيسارع إلى تلبيه طلبه ومساعدته اما هى كفتاة لا تملك غير الحلم قامت سيلفيا والحزن ظاهر من عينيها لتنظر إلى والدها الذى اشاح بوجهه الى الجهه الاخرى لانه لا يستطيع أن يرى نظره الحزن بعيون ابنته الحبيبه الوحيدة التى تملاء عليه دنيته وتنظر سيلفيا إلى جدتها لترى علامات النصر واضحه على وجهها وتنظر إلى والدتها لتنظر لها وعلامات الاسى على وجهها لتتركهم وتدخل إلى غرفتها ليدخل نسيم ومريم إلى غرفتهم وتنظر مريم له
نسيم : من غير ما تبصى لى ترضى بنتك وحيدتك تسيبك وتسافر
مريم : انت رفضت يا نسيم من غير ما تناقشها وكمان من غير ما نعرف اى تفاصيل مش دى لوفا الدكتورة إلى كان نفسك تدخل كليه الطب لولا تعبى ودخولى المستشفى وهى فى الثانويه العامه كان زمانها فى كليه الطب يبقى لما يجى الفرصه أنها تحقق حلمها تكسرها كدة
نسيم : مش فاهمك يا مريم هتستحملى بعدها عنك قلبك مش هياكلك عليها
مريم : مين قالك أن مش هكون قلقانه مين قالك انى عاوزة بنتى تبعد عن حضنى بس الى انت عملته صعب انت مشفتش الكسرة إلى هى فيها
نسيم : عاوزة ايه يا مريم
مريم : أهل ماريان مش بعاد عننا زيارة نعرف كل حاجه وساعتها نفكر ونقرر وكله لمصلحه بنتنا
نسيم : بس بشرط
مريم : ايه هو
نسيم : هى متعرفش حاجه مندهاش امل فى حاجه ممكن متتحققش وكمان علشان امى
مريم : اطمن بس الزيارة تبقى بكرة علشان نقدر نقرر بسرعه
نسيم : ربنا يعمل ما فيه الخير
وبعد أيام كانت سيلفيا عادت من مقابله لوظيفه
سيلفيا : مساء الخير
مريم : مساء النور يا حبيبتى عملتى ايه
سيلفيا : ابدا قالوا هيبقوا يتصلوا
نسيم : احنا مش هنستنى اتصالهم ولا هتدورى على شغل تانى
تاتا : ليه خير يا ترى فى عريس
سيلفيا : ايه عريس بابا انا قلت لازم ابنى نفسى الاول
تاتا : ليه هتجيبى شقه ولا هتكونى نفسك فلوس جهازك وموجودة يبقى لازمته تضيع الوقت ليه وياريت يا نسيم يبقى واحد من ولاد اخوك
مريم : ايه ولاد عازر ابدا على جثتى
تاتا : ليه انشاء الله مالهم كل واحد فيهم كسيب وعندة شقته يعنى جاهزين ينقصهم ايه
نسيم : ينقصهم التعليم والتربية
تاتا : التعليم مش كل حاجه ودول فى الاول والاخر رجاله والراجل ميعبوش الا جيبه
نسيم : لا يا امى الراجل إلى يتحول لمجرد واحد معاه فلوس دى ميبقاش راجل الى اهم من الفلوس الاخلاق ومشاء الله عيال عازر مشفوش تربيه من أصله دى غير أن أعلى شهادة لواحد فيهم دبلوم وواخدة بالغش وبنتى دى هتبقى دكتورة اخيبها واجوزها الجوازة الخايبه دى
تاتا : امال هتجوزها مين
نسيم : سيلفيا مش هتتجوز سيلفيا هتسافر امريكا مع ماريان علشان تكمل تعليمها وترجع لينا دكتورة قد الدنيا
لتدمع عيون سيلفيا من الفرحه لتقفز إلى حضنه وتقبله شاكرة
سيلفيا : شكرا يا بابا شكرا انا مش عارفه اشكرك ازاي
نسيم : تشكرينى انك تخلى بالك من نفسك انا كلمت عم ماريان وهو وعدنى أنه يحافظ عليكم عايزك شاطرة وقويه ومحدش يضحك عليكى بأى كلمه الحب يا سيلفيا وقته مش فى الغربه الغربه للتعليم وبس اوعدينى يا سيلفيا
سيلفيا : اوعدك يا بابا سفرى للتعليم وبس أما الحب ملوش مكان عندى لأن عقلى فى التعليم وبس
تمر الايام سريعا ويأتى يوم السفر
مريم : حبيبتى خلى بالك من نفسك واتغطى كويس وكلى كويس
سيلفيا : حاضر يا ماما وهشرب اللبن باليل كمان
لتبكى مريم
تاتا : بتعيطى ليه مش شورتك أن البت إلى حيلتنا تسيبنا وتمشى
سيلفيا : انتى كمان يا تاتا بتعيطى
تاتا : انتى ناسيه انى انا إلى ربيتك امك دى علطول كانت مشغوله فى شغلها وانا إلى ربيتك كان نفسى اشوفك عروسه وافرح بيكى
سيلفيا : اكمل تعليمى يا تاتا اوعدك هتحضرى فرحى
تاتا : خلى بالك من نفسك فى بلاد الاجانب انا مش عارفه هترطنى معاهم ازاى
سيلفيا : اطمنى انا عارفه لغتهم
نسيم : كفايه كدة هنتأخر على الطيارة
سيلفيا :هتوحشونى قوى هكلمكم علطول ادعولى دايما
تاتا : ربنا معاكى يا بنتى ويحافظ عليكى
مريم :ربنا يوفقك ويكون فى طريقك دايما
سيلفيا : مع السلامه
الكل : مع السلامه
تصعد للطائرة هى وصديقتها ليصلوا الى المطار ليجدوا شابا ينتظرهم تراة ماريان وتندفع بأتجاهه
ماريان : جورج جورج
جورج : ماريان حمد الله على السلامه
ماريان : الله يسلمك امال عمى فين
جورج : عمك فى البيت ايه مينفعش اجى استقبلك ولا ايه
ماريان : لا طبعا تنفع ونص
جورج :احمم معرفتيناش يعنى يا ماريان
ماريان : صاحبتى وحبيبتى واختى سيلفيا ابن عمى الكبير جورج
جورج : حمد الله على سلامتك يا انسه سيلفيا
سيلفيا : الله يسلمك يا استاذ جورج
جورج : لا استاذ جورج ايه جورج وبس انتى اختها يعنى بنت عمى زيها ولا ايه يا مارو
ماريان : طبعا وبعدين يا بنتى دى يتقاله يا جوجو مش استاذ
جورج : عارفه اكتر حاجه كنت متضايق من مجيك لهنا ايه
ماريان : ايه يا جوجو
جورج : طوله لسانك
ماريان : لا انت لازم تتعود عليها علشان قاعدة على قلبك
جورج : وانا أطول القمر دى كله يقعد على قلبى دى منايا
سيلفيا : اححم احنا هنفضل واقفين هنا ولا ايه
جورج : لا طبعا هاتوا الشنط واتفضلوا قدامى
ليتقدموا أمام جورج ليقترب من ماريان ليهمس بأذنها
جورج : وحشتينى
ماريان : وانت كمان
ليتجهوا إلى بيت عم ماريان واستقروا معهم فى غرفه بالمنزل الكبير وكان عم ماريان قد أنهى جميع الإجراءات لتلتحقا سيلفيا وماريان بكليه الطب بنيويورك وايضا عملهم بصيدليه فى المساء وتمضى سنه ليتفوقوا ويمنحوا منحه من الجامعه لتصر سيلفيا على تأجير شقه خاصه بهم وفعلا يأجروا شقه غرفتين وصاله ومطبخ وحمام ويتفوقوا أكثر وأكثر لينتهوا من الدراسه النظريه بعد ثلاث سنين لتختارهم مستشفى نيويورك 
وها هى فى بيتها بينويورك فى عطلتها قبل استلامها العمل بالمستشفى بأسبوع لتستمع فجاءة إلى صوت عالى
ماريان : طبعا قاعدة ومروقه بالك والهانم إلى معاكى شغاله من غير رحمه
تضحك سيلفيا على شكل صديقتها حيث ترتدى جلباب وتعقده من الوسط وتعقد رأسها بأيشارب
سيلفيا :تصدقى ولا الخدامين ايه إلى عملاه فى نفسك دة
ماريان : النهاردة يوم التنضيف العالمى ولا ناسيه
سيلفيا : يا بنتى ما انا لما بيجى دورى مبعملش زيك كدة يبقى عادى
ماريان : انا مبعرفش انضف الا كدة ويلا يا هانم مش هتروحى السوبر ماركت تجيبى مشتريات الاسبوع
سيلفيا : هنزل اهوة اخد الزباله معايا
ماريان : لا طلعتها الصبح اه صحيح مش الشقه إلى قدامنا سكنت
سيلفيا : واحنا مالنا وبعدين مش هتبطلى العادة السودة إلى فيكى دى بطلى تتحشرى وتعرفى اخبار الناس
ماريان : يا بنتى انا لا اتحشرت ولا حاجه كل الحكايه بطلع الزباله لقيته فى وشى واد ايه موز موز موز قمر يخرب بيته شعر اسود وبشرة بيضاء وعيون بنى غامقه عارفه ممكن يكون ايطالى أو يونانى واد ايه حكايه
سيلفيا : يا رب جورج خطيبك يسمعك علشان يديكى على افاكى قال موز قال أنا هنزل نضفى الشقه كويس
لتخرج سيلفيا وتتمشى حتى المتجر لتدخل إليه وتبداء بانتقاء ما تريد حتى وصلت إلى ركن الصالصات لتبداء فى انتقاءها لتجد يد تنتزعها من مكانها وصوت يصرخ
الصوت : سيدتى انتبهى
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
البارت الاول اتمنى يعجبكم الجمل التى اكتبها بالعربيه الفصحى معنى هذا أنها باللغه الانجليزيه