الحب لم يخلق للجميلات فقط

البارت الثاني

#الحب_لم_يخلق_للجميلات_فقط

للكاتبة بان الأعرجي

البارت 2

سعيد: رحت اركض على حميد وفرحان و الدنيا مشايلتني والسبب جان  انو اختي ابتسام تريد اتسبحني اني وحميد سويه...البعض يشوف الموضوع جدا بسيط وعادي ميستاهل كل هاي اللهفة والفرحه..بس اني لا جان يفرق عندي هواي لأول مرة راح اتساوة بالمعامله على الأقل  ...ويه توأمي واخويه حميد وجنت اكول ابداخلي. ..اي اختي كامت اتحبني واخوتي يحبوني....شفت حميد بالشارع ..حميد...حميد ...

حميد:ها شكو..
سعيد: تعال ابتسام تصيحلك راح اتسبحنه
حميد: اهووو  هم سبح وفوكاهه عيد يعني ما اكدر افلت مثل كل مرة..
سعيد:ليش اتضوج من السبح اشو اني يوميه اسبح وما اضوج
حميد:هههههههه اي لن اني ابيض وحلو ميحتاج اسبح يوميه شوف انته يوميه تسبح وما صرت ابيض مثلي هههههههه

سعيد: بقة حميد يستهزء بيه واني ساكت واستمر بالضحك لحد مدخل للبيت...

ابتسام:يله حمودي...تعال اسبح
حميد: ما اريد اسبح
ابتسام: مو باجر عيد  ويجونه خطار ولازم تلبس ملابسك  الجديدة حتى أتعيقل بيك واكلهم اخويه اجنبي يخبل..
حميد: اسبح بس بشرط
ابتسام:انوب....وهي تتخصر لحميد
حميد: تنطيني كليجه هسة مو تضميها مثل كل مرة ومتقبلين ناكل الا بالعيد..
ابتسام: يمه منك اشكد لوتي يله ميخالف امشي وخلصني..
والتفتت لسعيد...هيوو وانته يله على شنو صافن فوت كدامي...

دخلتنه للحمام وكعدت حميد على تخته الحمام واني بقيت واكف...غسلت شعرة وبدت تغسل جسمه بالصابون...جان تلتفت عليه...

ابتسام : اخذ الطاسه وصب على نفسك ماي اشبيك صافن اتسوي نفسك متعرف تسبح مو يوميه سابينه سبي كل اشويه وفايت للحمام تكول.....هسة اجتي احجايه  ...يله اسبح وحدك...

اخذت الماي وبديت اسبح وكلبي مفطور واحس بألف حسرة وكسرة اباوع عليها شلون تسبح ابحميد..بديت اغسل جسمي بالصابون...
ابتسام: اي اجلف اجلف بلكت يطلعلك غير لون
حميد:هههههههه
سعيد: باوعت عليهم  وابتسمت...
ابتسام: فوكاهه يضحك....يله كمل بسرعه وانته حميد كوم اشطف جسمك...سبحتهم ولبستهم...

باليل...كاعدين وخواتي يحضرون ملابسهم وكل شويه وحدة منهن تجيب كليجه لحميد بدون متعرف ماما...

جانت ليله طويله...امخلي ملابسي يم راسي  ونايم..وكل اشويه اكعد واباوع عالشباك اكول طلع الصبح واجه العيد...
لحد ما غفيت....
وكعدت على صوت بابا....صباح الخير يالذيب...
كعدت افرك بعيوني: صباح النور بابا
الوالد: ها ما ناسي شي
سعيد:شنو بابا.....باوعلي وابتسم وهو يأشر على ملابسي  اشهكت. هاااا.....ايامك سعيدة بابا ان شاء الله حجي
الوالد: وهو مبتسم..ايامك سعيدة سعودي وان شاء الله اشوفك اكبر محامي يا بطل....يله ابسرعه روح عيد  على امك وغسل والبس ملابسك الحلوة...
سعيد: ان شاء الله بابا...ركضت لغرفه ماما وشفته كاعده عالجربايه ممددة...شافتني ابتسمت وفتحت اديها إليه ركضت لحضنها....ايامج سعيدة ماما...
امي: وايامك يا عمري ان شاء الله اشوفك عريس..
سعيد:  لا  اريد اصير محامي ما اريد اصير عريس
امي: ههههه ان شاء الله يمه وهي تبوس بي يله بسرعه روح البس ملابسك...