الحب لم يخلق للجميلات فقط

البارت العشرون

#الحب_لم_يخلق_للجميلات_فقط

للكاتبة بان الأعرجي

البارت 20

صحينا على صوت صينية العصير وهي توكع من ايد ابتسام وتتكسر...
جان الكل مصدوم وناس اتباوع ابوجه ناس...إيمان كاعده بمكانها وعيونها على ابتسام...ما اعرف شنو الديصير ولا اي شخص من الكاعدين فهم شي..
سراب : شنو اشكلت ايمان؟؟؟؟
ام نعمان: انكلب وجهه وصارت صفرة ما امصدكة الكلام السمعته وهي  عين على ابتسام وعين على نعمان جانت ابموقف لا تحسد عليه اتفشلت كدامنه او على الاكثر فشلتها الجبيرة ويه بنات اخوهه..
لا ...لا....هو يقصد ابتسام اشبيك نعمان..وهي تفتح عيونها عليه..
نعمان: لا يوم...اقصد إيمان ....والتفت لعمي وكال ها خالي اشكلت..ووعد اذا وافقت  اخليها اسعد إنسانة بالعالم..

اهنا جانت الصدمة الاكبر...

عمي:والله الرأي بالأول والاخير لايمان اذا هيه اموافقه اني ما عندي مانع..

معقولة عمي هيج يحجي جنت متوقعته ابسط شي ايسوي هو راح يطرد نعمان وامه من البيت بعدنا لسه ما مستوعبين الصدمة الاولى انوب عمي كملها علينه وصدمنا ابجوابه...
حميد: شنو هذا الكلام حجي انته متأكد.
سراب ندست حميد...وهمست اسكت احنه ما علينه..
وكالت ...مو مشكلة صار سوء تفاهم ابتسام او ايمان مو مهم المهم احنه مراح نلكة احسن من نعمان خلونه نقرا الفاتحه...ورفعت اديها...

إيمان: مو غريبه عليج هاي التصرفات لانج قليلة اصل وما متربيه شنو ايمان او ابتسام اشايفتنه بضاعه بيدج و بيد غيرج اتبيعون وتشترون بينة..كامت وكفت...وكالت....
بابا اتريد جوابي...
_ اي طبعا..
_ماشي واني ما موافقه باوعت على نعمان بنظرة احتقار وكره ..ودارت وجهه وطلعت...
ابتسام واكفة بمكانها وبس الدموع تجري...اتقربت منها اختها وحضنتها وهي و هي واكفه بدون حركة مثل تمثال من جليد ..انقهرت على منظرهن الله يكون بعونهن كل وحدة منهن موقفها اصعب من الثانيه ومراح ايكدرن يتجاوزن هذه الأزمة الا إذا جانت علاقتهن الاخوية وحبهن اقوى من كلشي ابهاي الدنيا وهالشي راح انعرفه بالأيام الجاية ...

الضاهر نعمان ميعرف شي عن الاستسلام ولا اهتم لوجود اي شخص ولا حته مستوعب حجم الكارثة السواهه بينه..كام من مكانه وراح ورى ايمان..وسحبها من حضن اختها ابكل صلافة وما اهتم لجرح ابتسام..وكال..
ايمان اترجاج لتستعجلين بقرارج وانطيني فرصة واتعرفي علية زين يمكن راح اتح......
قاطعتة ايمان قبل ليكمل كلامة ...وهي تسحب ايدهه ابقوة...
شيييل ايدك عني انته اشلون تجرء وتلمسني..بس مو غريبه عليك الحقارة والدنائة...واياك مرة ثانية تحجي وياي حرف واحد راح اتشوف مني الما يعجبك..
نعمان: بس لو اعرف ليش هيج اتعامليني شنو البدر مني انطيني بس موقف واحد غلط سويته وياج جاوبيني...

ابتسام كاعدة عالدرج وامخلية اديها على وجهه وتبجي ابصمت..حميد كل اشوية ويريد ايكوم صار بركان من العصبية بس سراب متقبل متخلي ولازمته من ايدة..متخلي يطلع وراهم.