الحب لم يخلق للجميلات فقط

البارت الأربعين

#الحب_لم_يخلق_للجميلات_فقط

للكاتبة بان الأعرجي

بارت 40

ملاك...

لمن ايدي طخت ايده كمزت وباوعت شفت ايد شاب كزبر جلدي وكلبي كام يرجف شعور واحساس جدا غريب اول مرة انحط ابهيج موقف...متت من الاحراج الحمد لله محد انتبه..او يمكن الموقف بالنسبه الهم عادي..
بعدت ايدي ابسرعه عبالك وحدة ضربتها كهرباء..
وما التفتت لوراي ولا شفت الشاب منو..
_اتفضلي وهو ماسك القلم
_اخذته بدون ولا حرف ولا حتى التفتت عليه..

هدى..اشبيج متوترة
_استحي اشلون راح اعرف عن نفسي
_وعليمن تستحين بالعكس خلي عندج ثقه بنفسج لعد اشلون باجر توكفين بالمحكمه وانتي اكبر محاميه...اهدي وخلي الأمور طبيعيه
_اخذت نفس عميق..وحاولت اخفف توتري..

الزملاء واحد بعد واحد ايعرفنا على نفسة...
كانت اكو بنت...وكفت اتعرف عن نفسها...
جانت حلوة ابشكل مميز ومهتمه ابنفسها حيل بحيث القاعه كلهم عيونهم عليها..

مواصفاتها..طويله وجسمها مثالي خصرها بارز ومفاتنها بارزة بيضه وعيونها عسلي  كبار حواجبها مسحوبة استايلها ملفت...لابسه بنطرون جينز وبدي وجاكيت..لابسه حجاب بأهمال...لحد النص ومطلعه كذلتها الطويله وكان لون شعرها بني...
صوتها ناعم وطريقه كلامها مثقفه جدا واثقه من نفسها لمن تحجي عبالك مذيعه بالتلفزيون😅
_مرحبا..اعرفكم عن نفسي اسمي شهد مواليد 1994
الاولى على مدرستي ابمعدل98...حلمي اكون افضل محاميه واحقق ذاتي..
جانت تتكلم والقاعه هادئه كولنه صافنين عليها بنات وشباب...😅😅
هدى كامت اتعرف عن نفسها...جانت عاديه وما مرتبكه..ااخ منها واكفه تتماوع حتى اتصيد كم واحد😅

حاولت اهدئ من نفسي عود هاي اني ملاك ام لسان ميته من الخجل...

وكفت ابهدوء عيني بس على هدى حتى ما اتوتر جان واضح عليه الخجل..
_اسمي ملاك سعيد...الخ

استجمعت قوتي عرفت عن نفسي ورجعت لمكاني ..
الشاب الي جان كاعد  ورايه والي انطاني القلم كام ديعرف عن نفسة..
ولد ما شاء الله شنو الجمال الشايله والشخصيه الراقيه...
مواصفاته..طويل وابيض جسم رياضي كلش مرتب عيونه سود مجرورة ملامحه كلش ناعمه يشبه ممثل سوري 🤫❤...هذا شي وشخصيته وطريقه كلامه شي ثاني  قمة بالذوق والأخلاق....

_السلام عليكم...اسمي مروان. مواليد 92 هههه اي اكبر منكم اذا ماكو بعد واحد غيري...السبب هو اني بالسادس  تركت سنه ابسبب ضروف خاصه وبعدها رجعت امتحنت ما جبت معدل اريدة قررت اعيد السنه والحمد لله بعدها نجحت وجبت المعدل اليسمحلي ادخل الجامعه لهذا السبب اني اكبر منكم سنتين.....

ما اعرف اشلون اجت عيني ابعينه ابسرعه دنكت...
عزاا فشله هسه عباله دا اباوع عليه..

انتهت فترة التعارف وبدة الاستاذ يشرحلنه اشويه عن المواد والدراسة..