الحب لم يخلق للجميلات فقط

البارت الرابع والثلاثون

#الحب_لم_يخلق_للجميلات_فقط

للكاتبة بان الأعرجي

البارت 34

بقينه ساكتين منعرف شنو انجاوب عمي جان يطلع لبرة ويشوف مصيبة حميد..عاط بي
_لك حمييييد هاي شنو شدسوي؟
_اترخص من صديقه وكله روح اني هسه اجي وراك
اشبيك حجي فشلتني كدام صاحبي جاهل كدامك وتعيط عليه..
_لك فهمني هذا الصخام المن جايبه
_يعني همه صارلهم اسنين حارمين الشعب وموتونه جوع وهسه عافوا كلشي وشردوا واتريد انعوف حقوقنا للامريكان..لا والله هذا حقنه وعار علينه اذا تركنا
_استغفر الله..لك اشبيك اتخبلت هذا حرام كل قطعه تلمسها تصير جمرة ابقبرك انته هسه حالك حال الحرامي وهذا كله بركتبك ليوم الدين
_لتخاف مراح اخلي كله اصفي وابيعه..
_ها يعني تحولة فلوس حرام واتوكل عائلتك..االله يطيح حضك بعد اكثر واكثر..

طلعت ابتسام وايمان..شكو اشبي الحجي يعيط...
ابتسام: الله باع التلفزيونات عاشت ايدك زين سويت خو منخلي بحلوك الامريكان والحرامية..
_والله ماكو حراميه غيركم الله واكبر اكو شعب ايبوك ابوطنه هاي بس عدنه..
_اشبيك حجي ترى حميد ما سوى شي غلط حاله حال العالم..
_يعني باجر العالم تزني لازم احنه هم انصير مثلهم حسبي الله ونعم الوكيل عليكم...تركهم وطلع من البيت وهو يدعي ويتحسب عليهم..
التمت سراب والبنات يم حميد وهنه يباعن على الغراض

ابتسام:حميد هاي التلفزيونات تشتغل
_اي طبعا
_خوش لعد اني اريد لغرفتنا..
سراب:واني هم واريد الثلاجه وياه..
_كل وحده تاخذ التريدة والباقي اصفيهن وابيعهن .

زينه....بقيت واكفه من بعيد اباوع عليهم لا يفكرون بحلال ولا حرام عاميهم الطمع
جان يلتفت عليه حميد وصاح تعالي ام ملاك اخذي اي شي يعجبج...

_لا ارادي مباشرة جاوبته لا..حرام ما اريد شي..
اني كلت هيج لو كلها اوجوهه انكلبت عليه
_يا عيني صارت خيرة ابروسنه..
_عوفها ختولي هاي مو وجه نعمة..

جانت اكو مجروحه ابين الغراض خلوها بالبيت للبنات....وصار المكافش ملاك اتريد تصعد بيها ودموع ورسل ميقبلن..
ابتسام: امشي ولي هاي حرام اتصعدين بيها خلي ابوج يشتريلج وحده حلال
_ههههههههه

ملاك: بطلنه الحلال انريد نشتغل بالحرام على اهلنه
_شتقصدين ولج ..

زينه:ملاااااك تعالي فوتي ابسرعه..يله..
اخذت بناتي ودخلت ملاك لسانها اطويل ومتسمع الكلام اعنوديه ابشكل...

سعيد..رجعت للبيت اول مدخلت شفت جبل الحواسم بالبيت خررب يومك اكيد مراح اتفوتها وبدون ما اسئل اعرفت حميد ورا هاي السالفه..

جان كاعد بالهول يبدل التلفزيون ويخلي بداله تلفزيون ملون وجبير...
_ها ابو ملاك تعال اخذ تلفزيونك واذا اتريد انطيك واحد جديد..
_لا مشكور ما اريد حواسم..انته صدك تحجي اشلون اتبوك وتجيب للبيت
ابتسام:يبووو انفتحت الحوزة الاسلاميه شجاكم اكلتو حاصل فاصل شمسوي قابل اشو العالم حارت اشباكت وشخذت وانتو كلساع وجاي واحد وقاري علينه محاضرة شسالفه متكلولي..
_الحلال والحرام هذا شي راجع اله و هو محاسب عليه بس عيب كدام الجوارين ومنظرنه شيكولون علينه من تالي بيت الحجي ياخذون حواسم ..
_لتخاف كلها باكت وضمتها بالكراجات وكدام العالم امسوين نفسهم يستحرمون واستغفر الله.
_لا اله الا الله..لتخليهن بالبيت صفيهن وجفينا شر الحرام معايزين مصايب ..