الحب لم يخلق للجميلات فقط

البارت السابع

#الحب_لم_يخلق_للجميلات_فقط

للكاتبة بان الأعرجي

البارت 7

نعمان: على كيفج ايمان ما ماخذج للحرب
ايمان: تنفخ بقلة صبر ..هفف تفضل نعمان
نعمان: ااه ....انطيني رقمكم اسجله
ايمان : ما حافظته هاي ابتسام وياك هيه تردلك الرقم مع السلامة ..وجان  تشمر السماعه على ابتسام وراحت للغرفه تمشي ابسرعه ودردم...
ابتسام: الو نعمان هذا الرقم...وبدت ترد الرقم بهدوء..وبعدها كالت مع السلامة ...وركضت للغرفه اتشوف إيمان...

طلعت  للحديقه اشرب ماي من الحب الموجود يم الشباك وبديت اسمع كلامهن..

ابتسام: اشبيج إيمان ليش صرتي عصبيه نعمان كلج شي
ايمان: يا اختي اكرهه اكرهه عمري ما كارهه واحد هيج
ابتسام: ليش اشسوة..
ايمان: أسلوبه متملق ومزعج..اتخيلي بدون استأذان ياخذ السماعه من عمتي حتى يسلم عليه..
ابتسام: غير بت خاله وحاسبج مثل اخته الزغيرة وحب يسأل عليج..
إيمان: دخيولي والله مادري على شنو كاتله نفسج عليه  لا خلقه ولا اخلاق
ابتسام: وليش اسم الله...اكول انتي مو عندج موعد وي بهجت اليوم..اشوكت تتحضرين هسة تلكين الزلمه انصلخ اباب المنتزه..
ايمان: يااا عزا نسيت الله لا ينطيك نعمان شلون شدهتني..
ابتسام: اسم الله عليه.عفيه لتدعين عليه..
ايمان: حمد الله والشكر. اروح اطلع ملابسي واسبح احسلي  تعالي كولي يا هو البسه.

واني اسمعها تكول عدهه موعد وي بهجت لوشطت لله اشراح اسوي واشلون امنعها...دخلت الصاله..

ايمان دخلت للحمام...اجتي ابتسام عيونها تسولف الف سالفه
وفكرهه بغير مكان ملامحها المليانه حزن ..جان واضح عليها الزعل اني وياهه  لأول مرة نعرف الموضوع بس المشكله ما عدنه دليل قوي مجرد احتمالات بعقلنه ويا خوفي تطلع هاي الاحتمالات حقيقيه...
قاطع صراعاتنا صوت حميد...
حميد:  حطيتي اكل لطيور ماي ابتسام
ابتسام : ها..وهي اتفز من صفنتها.. الصبح خليتلهم بس ماي والله مالي خلكهن حباب...

جان يعيط حميد..
طاحضج اي والله شلون عايفتهن بلا اكل غير تحجين..
ابتسام:هاي عليمن
حميد:عليج

هاي جانت اول نتائج الدلال الزايد لحميد صار ميحترم ابتسام وبدة يجاوز عليها بالكلام...
سعيد: اني راح اصعد اذبلهن اكل بس اسكت..

صعدت للسطح. وكعدت يم البرج اذبلهن اكل..واشوف الطيرة كاعده بالعش متتحرك.. اخذت عوده  وحركتها من مكانها جان تكوم  واشوف بيضتين ازغار بالعش..ما صدكت فرحت حتى اكثر من حميد نزلت ركض..واني اعيط ..ولك حميد..وينك حميد..

حميد طفر من مكانه..وهو يرجف ها..اشبيك كلتهن البزونه مو..
سعيد: ههههه..ولك مبروك صرت ابو حمامتك بيضت..
حميد: عليك الله اشبيهن..صدك تحجي..
سعيد:' فحطان من الضحك عليه...والله اشبيك..جان يركض كدامي للسطح..كعد يمهن يباوع عليهن ..مد ايدة يريد يشيلهن عطت بي..
لا حميد ميصير لتشيلهن ايفزدن وميطلعن فروخ..
حميد خاف وابتعد... لا.  لا مراح الزمهن ابد..