الحب لم يخلق للجميلات فقط

البارت الواحد والثلاثون

#الحب_لم_يخلق_للجميلات_فقط

للكاتبة بان الأعرجي

البارت 31

_هاي مرتي..

الكل انصدم معقولة حموشي ايسويها..حميد بقى يباوعلي وهو متعجب من الديصير..
بس الحصة الاكبر من الصدمة جانت من نصيب ابتسام...
وكفت جنها امخبله فاتحه اعيونها ابقوة..وتتنقل ابنظراتها بين حموشي والبنت.....
_شنو .؟؟؟ شتخربط انته مرتك شنو يعني شلون..
_يعني ضرتج ومرتي الثانيه والها مثل ما الج اني ما امسوي لا عيب ولا حرام.
_..تتزوج عليه يا حقير لك اني تاج راسك وراس عشيرتك اتقارني ابهاي الأشكال وتجيب عليه ضرة..لا والله اطلع مو بت امي وابوي اذا اسكتلك...

تركنا ابتسام تحجي  ابراحتها حيل جنت ضايج من حموشي وان كان الحق ويا بس لو كايلي على الأقل مو نتفاجئ ونصير ابهيج موقف...

عيطت ابتسام وغلطت عليهم..بس هذا الشي ما كفاهه..جان تهجم على حموشي وشكت فانيلته وخرمشت ركبته..وهو لازم اديها ويدفعها وهيه تتماطل ويا وادفر بي...
صاح ببها ابصوت وهو لازم اديها ابقوة...
_كاااااافي....ضجتي مو هسه يله  حسيتي بيه انقهرتي لن اتزوجت هسه يله صرت زوجج واتغارين عليه...وين جنتي لعد هااا..نسيتي اهاناتج اليه كلما احجيتي وكلتي انته خدام عند ابويه واخوتي انته مو من مستواي لازم تحمد ربك واتشكرة اني قبلت بيك انته ماكو وحده اتباوع ابوجهك...اكيد ما نسيتي هذا الكلام...
سحبها من ايدها حيل واخذهه يم البنت الجانت واكفه وملامح الشماته واضحه بعيونها...
تعالي.....وشوفي ابعينج..هاي مرتي نور..بت عالم معروفين...ابنيه دارسه ومتعلمه وتشتغل ممرضه بالمستشفى يعني احسن منج قاطات...قبلت بيه واتزوجتني وصارتلي مرة من اول يوم..مو مثلج وحده مريضه نفسيه بيها الف عقدة وعقدة وكل الجان امصبرني عليج هذيج الفترة هو خاطر ابوج واخوتج والا اني بنعال امكطع ما اشتريج...

الكلام جان قاسي مو بس على ابتسام حتى علينه بس غصبا ما علينه سكتنه مادام حموشي صاحب حق...
ابو طبع ميبدل طبعه..هاي معروفه..
ابتسام ابشخصيتها المعروفه اكيد مراح تسكت عن حقها...ابلحظة..مثل المفترسه هجمت على نورة وكطعت شعرها وضربتها...تصرفها هذا مو ابسبب الغيرة لا ابد..اتصرفت هيج لن حست بالاهانة وانخدشت كرامتها ابتسام اللي نعرفها اكيد مراح تسكت..
_تعالي يا سافله يا ام الزلم...وهيه تسحلها من شعرها...وهذيج اتعيط لج فوكاهه جايه على اجهازي..ولابسه ملابسي يا جربة يا وصخه..
_ااااخ هديني يا همجيه اااخ..

ولا واحد اتحرك من عدنه بقوا الجماعه يتكافشون وحميد ابنصهم...ابتسام ما قصرت ربدتهم ربد....حموشي ومرته..

سعيد: كاافي..شسالفه..ابتسام شي وصار كولي هسه اشتردين تبقين وياه لو الج غير راي
_اني ابقى ويه هذا العار وهاي الجربه..حامض على بوزهم اكابل اوجهم الزفرة..وخري منا اخذ كل غراضي وجهازي حتى البسمار اابلحايط هم اخذة واخليكم عالحصيرة وورقه طلاكي توصلني غصبا على شاربك..
_طلاك ما اطلك واشتردين اسوين سوي..