الحب لم يخلق للجميلات فقط

البارت الثاني عشر

#الحب_لم_يخلق_للجميلات_فقط

للكاتبة بان الأعرجي

البارت 12

كان يتسابق مع الزمن وهو يضحك بغرور متحديا القدر قائلا..سأحقق ما قلت أنه لن يكون لك..فتعثر بالحظ وسقط وتكسرت احلامه..واصبحت بقايا احلام 💔🎈غير قادر على جمعها....هكذا كان..سعيد

كعدت الصبح كلبي معصور وضايج حيل الخنكة لازمتني...ومطايق نفسي وشنو السبب ما اعرف..
اخواني كاعدين كلمن مخلي ايدة على خدة وصافن..
سعيد: صباح الخير..
حميد وايمان: صباح النور..
سعيد: بابا طلع لو بعده..
حميد: راح للمستشفى امي متخربطه..وهو يحجيها بكل برود..
سعيد: كلبي انعصر...شنو شتكول انته..يعني اشبيها..
ايمان: والدمعه بعينها..بقت يم رحمه الله..بهجت كلي استعدو لكلشي..😭😭
ابتسام: كافي ايمان كل شويه وبجيتي يعني شنو بيدج اتسوي هاي بعد حكمه ربج خليها ترتاح..
سعيد: انتي شنو من كلب عندج وتحجين هيج ..اكو واحد يتمنة الموت لامه..
ابتسام: لتضل تألف من كيفك اني ما كلت تموت ولتسوي نفسك الولد البار بامه ترى محد تعب عليكم غيري..وخوش جازيتوني...
سعيد: هفففف...ما اريد اتصادم وياهه..ايمان ترحين وياي للمستشفى..
ايمان: أي ياريت والله كلبي نار...عليها
سعيد: يله امشي لعد...طلعت وايمان دتلبس عبايتها صاح حميد...
حميد: اوكفوا اخذوني وياكم هم اريد اشوفها..

اشكد فرحني بكلامه...على الأقل ما ترك امه بهيج لحظات..الأنظار اتوجهت على ابتسام والكل منتظر منها كلمه بلكي تروح ويانه...
ابتسام: شكو اشبيكم تباعون عليه خير؟؟
ايمان: مترحين لامي تشوفيها اخاف....وسكتت
ابتسام: شوفوا اني ما عندي شي اروحلها بس أشوف روحتي ما بيها فايدة اصلا هيه لا راح تسمعنه ولا تشوفنه..افتهموا امكم ماتت قبل ١٢ يوم...

انصدمت بكلامها صدمه خلتني اكره نفسي لن دمي ودمها واحد..الله شيسوي بيج يا ابتسام على عقوقج لامج..كلت حسبي الله ونعم الوكيل..وطلعت برة..
ايمان بس تبجي وساكته...
حميد: يعني راح تبقين وحدج بالبيت..شلون
ابتسام: لتخاف اني هم عندي كم شغله اسويها بالبيت خاف يصير ميصير خلي انظف البيت..
حميد: اذا لكيت تليفون اخابرج...
ابتسام: اي ضروري..

اتمشه بالشارع..بيه صرخه اتهز الكون كله.. ربي لتفجع قلبي بأمي..طلعو اخوتي..ورحنه للكراج ووصلنه للمستشفى العام..دخلنا القسم اتفاجئت كل الأهل ملتمين بالردهه..عمتي ونعمان وخوالي وخالاتي..وعمامي..وبابا كاعد ووجهه ميتفسر كل شويه يمسح دموعه بشماغه..وخوالي وعمامي يواسون بي..كلت هاي هيه انطفت شمعة حياتي💔

ايمان تركض كدامي..وكعت بحضن عمتي وخالاتي يسكتنها وهي تبجي وتشهك..عمه ماتت مو..عافتني وراحت 😭😭

عمه: لا عمه ادعيلها ..امج كلياتهه وكفت ودمها اتسمم...الله يشافيها يحي العظام وهي رميم ربج قادر على كلشي ..