الحب لم يخلق للجميلات فقط

البارت السادس والثلاثون

#الحب_لم_يخلق_للجميلات_فقط

للكاتبة بان الأعرجي

البارت 36

عذراء فتحت عيوني وشفت عمو حميد فوك راسي..
صاك سنونه ابعصبيه وصاير كبريت يريد يحركنه..عقلة طاير من العصبيه لو بيدة جان ذبحنه عالقبلة.....
صاح بينه ابصوت مرعب...
_ احجن اشجنتن  اتسون بالمحل..
_بابا والله اني معليه والله مسويت شي..
_اني الجن تحجن وي الشباب واتنزلن روسنه اليوم افصل روسجن عن جثثجن...
_عمو دخيلك حباب والله مسوينه شي..رحنه نشتري وبس...😭😭

ما سمع لصرخاتنه ولا همته ادموعنا وخوفنا سحلنه من شعرنه مثل الخرفان وأخذنه عالسيارة..وشحط بيها يمشي ابكل سرعه وهو يغلط ويفشر علينه واني ورسل ننحب ونبجي ونتوسل بي...

ملاك..رجعت من الدوام حيل تعبانه...الجو كلش حار.
_السلام عليكم
_وعليكم السلام هلا ماما..
_ماما صبيلي غدة ميته جوع
_اي صار هسه اصبلج
ابتسام: شنو عيني ماكو احترام ولا خجل دنتظري جدج وابوج على الأقل وبعدين ضربي واكلي..

ملاك..
مالي خلك اناقشها واتعب الساني سكتت وتركتها..
اليضوجني هو سكوت ماما عنها مترد عليها وما اعرف ليش...

بدلت واخذت حسوني ابحضني العبه. وضحكه

انضرب باب البيت ودخل عمي حميد وعياطه ايهد البيت...
طلعت اركض عزا اشصاير معقولة امسوي حادث..

زينه..
ابنص ابتسام وسمها..رجف كلبي  شهكت ابخوف..واني اسمع عياط حميد وفشارة..طلعت اني والبنات نركض ونعرف الصاير..جان يدخل حميد وهو لازم عذراء ورسل ويسحل بيهن مثل الحيوان وهنه يبجن ويصارخن...
سراب:يا غزاا حميد احجي اشصاير شمسوي بالبنات
_يا خويه بروح امي عوفهن واحجي شصاير..حميد..

زينه..عيني على بنتي الراح اتموت ابين اديه ..شكول وشحجي...اتقربت اريد اسحبها من ادين حميد ..واني اتوسل بي يترك بنتي..عاط بيه ودفعني عالحايط  ..

ملاك: عمي حميد انسان همجي يتصرف بطيش وميفكر بغيرة ابد جان منظر البنات يكطع القلب كوة لازمه نفسي وساكته لن مو من حقه ايمد ايدة على اختي...زاد النار حطب..وجان يمد ايده على امي ويدفعها..اتخبلت..وعطت بي..انته منو سمحلك اتمد ايدك على امي..
_انجبي لج سايبه لا اجي اشك حلكج..
_ايدك اكسرها اذا اتمدها عليه لو على واحد من اهلي ولا اكول عمي واحترمه لا عيني اليندك بواحد من اهلي اذبه بألف بير  افتهمت لو لا...

الكل انذهل واتعجب على كلامي وبالأخص ويه عمي حميد الي كل البيت يخاف منه طبعا ما عداي لن اعرفه انسان فارغ وفاشل امطلع عضلاته عالنسوان وبس..
ابهيج وضع اكيد مراح يسكتلي...دفع البنات عالكاع وهجم عليه يريد يضربني صارت بيني وبينه عماتي وامي..واكلن كومه ضرب ابدالي واني ما سكتت هو يغلط ويكول تربيه سعيد العار..واني اكله ابويه تاج راسك ويشرفك... وبقيت ارد عليه كل كلمه يتجاوز بيها على اهلي اخر شي امي فركت حلكي بيدهه و ضربتني راشدي ودخلتني لغرفتنه وقفلتها عليه..