الحب لم يخلق للجميلات فقط

البارت الثالث والثلاثون

#الحب_لم_يخلق_للجميلات_فقط

للكاتبة بان الأعرجي

البارت 33

نايمين وسمعنا صوت قوي هز الدنيا..

عطت ابصوت....سعيد الحكني...
سعيد طفر من مكانه...وكالي ابسرعه اخذي البنات وطلعي...
احضنت بناتي وطلعتهم اركض..اتلكني ايمان وابتسام يركضون..طلع حميد وبناته وسراب تبجي وترجف...وتصيح راح انموت....

عمي:سلام قول من رب رحيم...هذا صوت القصف كلش قريب راح اطلع اشوف..
ايمان:يا على بختك حجي وين طالع..
ابتسام:لا يابه فدوة العمرك اكعد وين رايح..
سعيد:هسه اني راح اشوف اشصاير..
حميد:اوكف جاي وياك..
سراب :وهيه اتلزم بديه ابقوة وتشبث بيهم وتتوسل لا فدوة لتطلع اخاف يقصفون مرة ثانيه اخاف حباب لتعوفني..
_نعلعلا يومج خبلتي البنات  لج اشبيج ولا عبالك اشكبرها مرة اتخاف وتبجي دوخري عني..تركها وطلع..

عمي:لا حول ولا قوة الا بالله العلي العظيم..تعالي بنتي اكعدي هنا ماكو شي تعالن بنات اكعدوا ابمكان واحد وكلمن يلزم السبحه ويسبح..ان شاء الله ماكو شي..

الكهرباء مطفيه والدنيا ظلمة بس نسمع اصوات الطيارات الحربيه الغريبه اول مرة نسمع هيج أصوات ..وصوت القصف البعيد شعلت ابتسام الفانوس..والتمينه يم عمي كل واحد بينه جان ابداخلة خوف...من الموت البنات بيجن ابصوت ناصي ما عدا ملاك جانت الوحيدة عايشة الوضع طبيعي ..تباوع علينه وتضحك..
طبعا الحرب ابجفة وسراب ابجفة..جانت حيل خايفه وترجف وبس تبجي وكلما صار قصف اتخلي اديها على اذانها حتى متسمع الصوت وتبقى اتعيط وترجف ومرات تتخربط علينه اول مرة اشوف سراب ابهاي الحالة ما اتوقعتها هيج اتخاف..هو هذا الانسان  اشما اتكبر بالنهاية عندة نقطة ضعف تكشفها الك الايام...

سعيد..
طلعنه لشارع ضلام وناس تركض والدخان ابيض يتصاعد لسمه..شفت ابن جيرانة....يركض ..
_ها سلامات وين صار القصف
_بالشارع الورانه بيت ابو حسين
_لا حول ولا قوة الا بالله العلي العظيم وشصار بيهم
_والله صاروخ طاح عليهم ونص البيت وكع عليهم والعالم دتحاول اطلعم  .
_..لا والله ميستاهلون امشي حميد خلي نساعدهم
_يمعودين وين ترحون ارجعوا للبيت اخذوا عوائلكم واشردوا راح ايقصفون المنطقه مرة ثانية..اني راح اخذ اهلي وأشرد العمامي ...

كلامه خلاني اخاف وافكر بأهلي ..ها شتكول وين انروح
_باع هذا صدكت انته يمعود هاي اشاعات.والله اني ما اطلع من البيت لو مو يقصفونه ما اعوفه لو يدفنوني بي...
_اني هم ما اعوف البيت بس عوائلنه وبناتنه وخواتك لازم انفكر بيهم..
_ما عليهن شي..دمشي خلي نشوف البيت.....

الجيران انكلبت وسيارة الاسعاف كوة وصلت..
جان المنظر بشع ويوجع 💔🥺...بيت من 5نفرات وكع عليهم صاروخ..الي فز من نومته امكسر والي نام نومه ابديه..
حاولنه انساعدهم حتى ايطلعون من تحت الانقاض..
بعد مجهود اجبير اكدرنه انطلع واحد من الاطفال..جان امغطى بالتراب والدم وهو يصرخ من الخوف والوجع...
حميد يشيل بالطابوك ودموعه تجري..وهو يسمع أصواتهم المخنوكه تستغيث بي حتى ايطلعهم..حسيته اتهستر صار يحفر بديه بس ايريد يوصلهم..الشباب كلها تحاول اطلعم ...