الحب لم يخلق للجميلات فقط

البارت الثاني والثلاثون

#الحب_لم_يخلق_للجميلات_فقط

للكاتبة بان الأعرجي

البارت 32

دخلت دموع تعرج واملابسها امتربة وحالتها حاله..
سراب:شوفي بنتج اشسوت ابنتي بس كليلي  بنتج ليش ابهاي الهمجيه والحقد..علمود بنتي غيرت مكانها المعلمه وكعدتها اول رحله بنتج اتخبلت وكطعت بنتي لو ما المعلمه اتفكها من ايدها جان موتت بنتي..

طلعت ابتسام وايمان..شكو اشصاير..
ابتسام: شهكت وضربت صدرها...يمه اشبيها دمعه..ركضت اخذتها ابحضنها وهيه تتفقدها ودموع تبجي وتشهك ...اشبيها منو وياهه..

_ملاك لزمت بنتي وملختها الله يرضاهه اول يوم بال مدرسه هيج اتسوي ابنتي...
_يا حقيرة ليش ولج جعل ايدج الكسر ان شاء الله..اتغارين مو لن احلى منج ومن جهرتج ..

جنت ابموقف صعب ما اعرف الجذب من الصدك وبنتي كدامي امفرفحه من البجي وحالتها حاله..
اخذت بنتي اريد ادخلها واغسللها ..جان ابتسام تهجم على بنتي وهيه تسحبها من ايدها اتريد تضربها..وملاك اتصرخ وتتختل ورايه..وهيه تغلط عليه وعلى بنتي..
_اليوم اله اشك حلكج وحلك الما عرفت اتربيج..
حاولت اخلص بنتي منها اكلتني اكل بصياحها .سراب واكفه اتباوع وتتشفه بيه وابنتي وايمان واكفه اتباوع ولا عبالك صاير شي..آخر شي متحملت كلامها جان ادفعها ابقوة رجعت عالحايط...

_اتمدين ايدج عليه ولج يالزركة يا بنت العبيد..

_كل ام تتحول الى وحش مفترس بس اتحس اكو خطر ايهدد أطفالها واني لمن شفت ابتسام تسحب ايد بنتي وتريد تضربها ابكل صلافه ما سكتت الها ودافعت عن بنتي..ضلت تغلط عليه وعلى اهلي بقيت واكفه وعيني ابعينها اخزرها ابكل قهر...
_باع الساقطه اشلون متستحي اي طبعا لعد البنيه عليمن تطلع اكيد على امها الهمجية..
سراب:عيب عليج اتمدين ايدج على حماتج علمود طفله
ايمان:والله وطلعلج لسان ست زينه هيووو ترى ملاك بتنه وانتي مالج بيها شي نكتلها نذبحها بالنهايه البنيه النه افتهمتي وعيب اتسويين هيج ويه اعيالج علمود عركة جهال..

_اني ما اسمح لواحد ايمد ايدة على بنتي بدون ما اعرف شنو السبب واذا فعلا بنتي غلطانه اني اعرف اشلون اتصرف وياهه واخليها تعتذر عن غلطها.التفتت لسراب.....انتي دخلتي اتعيطين وتحجين على بنتي وتكولين همجيه دشوفي حالتها اشلونها معناهه الي سوة بيها  هيج شي هو اكبر همجي بالدنيا...

سعيد..كاعدين انراجع الحسابات اني وابويه جان يدخل علينه حميد شايط...السلام عليكم
_وعليكم السلام  خير اشبيك..
_هسه اثتينكم تجون وياي للبيت
_ليش يا ستار صاير شي
_امشوا وانتو اتعرفون هناك ابسرعه...
_يله بويه امشينا

منعرف شنو صاير بس اكيد الموضوع تافه وميستاهل ماكو غير مشاكل مرته وايمان..تركنا الشغل عزلت المحل ورحنا ويه حميد للبيت...