الحب لم يخلق للجميلات فقط

البارت السابع والثلاثون

#الحب_لم_يخلق_للجميلات_فقط

للكاتبة بان الأعرجي

البارت 37

زينة...
سراب وحميد كملو طريقهم وما التفتوا لواحد..نعم ابكل برود اتمشى بخطواته للهول وهو يشرح لسراب اشلون راح يصمم البيت ويبنيه..
ابتسام اتفشلت كدامي..وحسيتها حيل مقهورة الدمعه ابطرف عينها..ومدنكه راسها وهي تشتغل..
ايمان ما سكتت وبقت اتدردم واتلوم بأختها وتذب الصوج بيها..

_ها شفتي لمن جنت اكلج حميد مو بحالج مصلحجي ما جنتي اتصدكين بيه يله هسه هاج باعي اشلون اتخلى عنج واخذ مرته وجهاله وراح يطلع..
مو كتلج خلي نكعد وحدنه ولتفشيلنه ما قبلتي بقيتي اتطربين حميد وحميد اكليها لعد...

الكلام جان قاسي 💔 حتى بالنسبه لابتسام..
متحملت ونزلت دمعتها..بكبرياء..جنت اتمنى اكعد يمها واخلي ايدي على جتفها واخفف حزنها بس لا اعرفها راح اتصدني وتتهمني بالشماته تركتها وسويت نفسي لا اسمع ولا اشوف...

بقت ايمان تحجي وتدردم..
لحد ما انفجرت ابتسام وهيه تعيط وتبجي..
_كافي بروح امي كافي لج ايمان باعني باع كل تعبي لج اني امه اني الربيته وفضلته حتى على امي وابويه اتحملت اشكال والوان لخاطرة رزايل وكتل وحرام بس حتى اشوفه مرتاح تالي متالي يشمرني هيج ولا عبالك اني التعبت واني الربيت..ليش هيج ايجازيني...كام تشهك وتبجي...
جان تجي سراب..
_شكو خير اشصاير
ايمان: لتسوين نفسج بريئه وانتي صارلج ساعه تتنصتين علينه..
_ يعني شنو اول واحد يعزل عن اهله مو هذا سعيد عزل لو بس حاطات عيونجن على حميد..
_الحمد لله عدنه بيت وما ضالين بالشارع بس العيب على حميد من ينسى التعب ويبيع خواته ابسرعه
_الله واكبر..اي شنو وين شايل حميد رايحين للهند شسالفه ترى هاي يمكم حايط على حايط لو حرام تشوفن حميد مرتاح والله لو اتحبنه صدك  جان مسويتن كل هذا..بالعكس جان فرحتن لاخوجن راح يأسس بيته ويستقر.

سراب بلسانها كدرت اتسكتهن..بس اكيد مراح تكدر اطفي نار القهر بصدورهن..

ملاك..
كلش فرحانه راح يصير عدنه بيت وحدنه ونخلص من المشاكل والقال والقيل..واهم شي راح اخلص من عماتي وتنمرهن عليه ومقارنتهن بيني وبين دموع وتقليدهن على شكلي ولوني..طبعا اكيد شاركت فرحتي ويه صديقتي المقربه هدى..

_صدوك يا الله الف مبروك حبيبتي اي برة خلصوا من عماتج وضيمهن
_وخيرا راح اكعد الصبح بدون ما اشوف وجوهم بس القاهرني جدو خطيه ما اكدر على فراكه
_اي عادي ترحين اتشوفي هو انتو بيت بصف بيت
_وعماتي تتوقعين يخلونه اتشوفه
_بصراحه لا ما اتوقع 😅😅😅 يجوز يطلبن فلوس عالدخوليه..للحجي
_ههههههه والله كلشي اتوقع..
واحنه دنمشي ونضحك جان تصير ابوجهي دموع..
تباوع عليه ابتكبر وغرور...صفنت على هدى ابتسمت الها وراحت كملت طريقها..
_هاي اشبيها بت عمج تضحكلي اعرفها تعرفني..
_ما ادري.