الحب لم يخلق للجميلات فقط

البارت الثالث

#الحب_لم_يخلق_للجميلات_فقط

للكاتبة بان الأعرجي

البارت 3

طفل عاش كل عمرة وحيد  وحزين  حابس نفسة بقوقعه ويخاف من العالم الخارجي وبيوم من الأيام قرر يكسر هاي الوحدة فكر اهواي افكار و بالاخير اقتنع ابفكرة  اخذ بذرة وزرعهه وبقى ينتظر يوم يوم تطلع الزرعه وتكبر وفعلا طلعت جان الطفل فرحان بيها اهواي وبقى يعتني بيها ويخاف عليها وقرر يحرسها ابنفسة وهو يتأمل زرعته البدت تكبر وتزهي بألوانها وكله امل تكبر وتصير شجرة وراح اتفيدة بالمستقبل وغرك بأحلامة الورديه..وفجأة وبسرعه البرق طير جبير خطف الزرعه ابمنكارة وطار ابعيد...الطفل بقى مذهول ومصدوم فقد جزء كبير ومهم من حياته بأختصار الطفل خسر نصف روحه ونصف جسدة ونصف عمرة من الحزن على زرعته 💔

هذا جان حال سعيد بغياب توأمه حميد ٠😔

البيت انكلب مناحه ولطم خواتي كطعن نفسهن بجي وصياح والدي جان يحاول يتصنع القوة كدامنه وانو الوضع طبيعي لكن خانته الملامح...ابويه شيب بلحضات ..والوجه اصفر والعيون مشبوحه جنت خايف عليه كلش ومتأكد مراح يطلع منها سالم...اول مرة احمد ربي على غياب امي من البيت وجانت بالمستشفى اكيد جان متحملت الوضع...
ابتسام: سودة عليه ولك خوية وين صفه بيك الدهر حميد وهي تلطم واتملخ بشعرهه اكلت اشربت بردان لو نعسان ولج يمه كومي شوفي ابنج ااااخ ولك يابه جيبلي حميد جيبة الي ادخيلك 😭😭😭

ايمان:😭😭😭 يابه ما خبرتوا الشرطه بلكت يلكوه
الوالد: منكدر انسوي شي قبل ميمر يوم كامل(٢٤ساعة )
ابتسام:يااا واتريدني اصبر على اخيي يوم كامل عزا العزاني يبووو عليه ان شاء الله
سعيد: كافي لطم وبجي فضحتونه ابدال متكعدن تدعن وتتوجهن لله يرجع بالسلامه شنو نستفاد من لطمجن ونياحجن..
ابتسام: كل من وراك انته حايرلي دراسه وشهادة وسوالف تعبانه وعايف ابوك واخوك يكربون من الصبح لليل حتى يجيبون اللكمه لحلكك وانته كاعد ومستريح كون الموت الك.مو.....وقاطعهه والدي بصوت عالي

والدي:ابتساااااام....احجي عدل احنه بيا حال اشوكت اتبطلين هذا السم وليش متكولين اخوج فاهي وساقط وسربوت وهسة يطلع امسويله فلم واني مية مرة امنبهه ميتقرب للسيارة اخخ اذا الزمك ...وهو يعظ اصبعه ابحركه..
ابتسام : ما دام تدرون بي فاهي وميفتهم ليش عايفي وحدة ها ؟؟ وتلتفت عليه لو حايرين بالمدارس والكلاوات..
والدي: استغفر الله العظيم واتوب اليه...كام وطلع للحديقه وطلعت وراه...
ما انكر كلام ابتسام اذاني اهواي وجان خناجر وسهام ابكلبي بس وجعي وألمي على حميد مخلاني احس واشيل ابخاطري...ابويه ايتمتم بكلمات ما اسمعهه وكل شويه يرفع طرف عينه للسمه والدمعه اتلالي بعيونه...يمشي خطوات ثكيله ويرجع بنفس الخطوات واني افتر وراه....
سعيد: يابه صدك مابي شي وراح يرجع
والدي: إن شاء الله ابني ادعيلة انته فقير ودعائك مستجاب
سعيد: اني عندي احساس راح يرجع اليوم..
والدي: كعد بالكاع وعينه عالباب مرة ومرة يرفعها للسمه..كعدت ابصفه وكل اشويه اريد اخلي راسي ابحضنه واتراجع واكول كبرت وصرت رجال .كمت ادعي ابكلبي يا ربي رجع حميد النه..ولتفشلني كدام ابويه وهو ايكلي دعائك مستجاب..ياربي انته تدري اشكد احبه دخيلك يا ربي رجعه النه. غمضت عيوني بقوة...وغفيت على جتف ابوية....