الحب لم يخلق للجميلات فقط

البارت السابع والعشرين

#الحب_لم_يخلق_للجميلات_فقط

للكاتبة بان الأعرجي

البارت 27

سعيد:صديقي طلب ايدج للزواج..

الكل سكت ويباوع على سعيد وهو يسأل منو هالشخص؟؟
ابتسام ردت وكعدت ابمكانها..وهي مدنكه ..
عمي:منو الخطبها
_ حجي حموشي اليوم خطبها مني..
حميد:ههههههههه....ضحك ابصوت عالي...معقوله صدك تحجي...اول مرة ايفيدج السانج..وهو يلتفت على ابتسام..ويحجي
بقينه بين اليضحك ابكلبه وبين المعرف شنو السالفه واشيقصد حميد..
سعيد:شنو صاير شي
_جا غير اليوم اتكافشوا حموشي وابتسام ههه
_لا صدك اشلون؟
حميد سولف العركة وزدود عليها خربنه ضحك ..
_واني اكول اشبي حموشي ضايج..
_لا وطلبها لزواج حتى ياخذ ثارة منها ويشوي على اذانها بصل 🤣🤣
ايمان: ها بسومه ما كلتي شنو رايج..
_بعد هاي المهزلة شنو رأيي اكيد لا ومستحيل ارتبط ابهذا الاغبر عديم الاخلاق..
عمي :لتستعجلين بنتي حمودي خوش ولد وشاغول وهذا شغلنه كله امسلمي بيدة والولد صاحب اخلاق ما فد يوم شفنه عليه شي وهذا اخوج يشهد هو ويا ٢٤ ساعه..اني اكول اخذي وقتج وفكري ورديلنه خبر

ابتسام ما حجت شي بس ما اعرف احس ردت فعلها باردة يعني عكس كل مرة جان حركت الدنيا علينه لو ما رايدته..

وسعيد جان ميختلف وضعه عن ابتسام  احسه مزعوج ومو على بعضه..

متمدد بفراشه وفكرة مشغول حاولت اتقرب منه وسألته..
_خير سعيد اشبيك مو على بعضك...
_اااه...والله يا زينه خايف..
_يا ستار اسم الله اشبيك من شنو خايف
_ خايف لا ابتسام اتوافق على حموشي واتفشلنه ويه الولد وكلنا نعرف ابتسام واخلاقها شنو.. وهذا الولد ماخذ علينه غير نظرة واكيد ابتسام راح تخرب كلشي بلسانها وحقارتها
_ زين ليش  ما سديت الموضوع من يمك
_الولد حسيته راغب الها ما حبيت اكسر بخاطرة و بعدين اني متاكد ابتسام راح ترفض
_  ما اعرف شكلك بس لتنسى ابتسام كبرت بالعمر وبعد متجيها قسمه زينه مثل هاي وبلكت الزواج ايغيرها وترتاح نفسيتها وتصير وحدة ثانيه
_الله كريم..

بعد كم يوم

سراب: ها عيني اشقررتي لازم انرد خبر للولد فشله. 
ايمان: وانتي شعليج الولد ابن خالج ابن عمج وهيج حاركه روحج.لتدخلين
_على كيفج اشبيج ضايجه لتخافين هم تجيج قسمه بس خلي اختج اتروح لنصيبها ولتوكفين ابطريقها.
_هههاي ضحكتيني واختي عدها عقل وتعرف مصلحتها وين انتي معليج لتحوصين من يمج.
_لا اله الا الله....بسومه حبيبتي اسمعيني  اني ادرى ابمصلحتج .انتي لازم اتوافقين هاي آخر فرصه الج ويمكن مراح تجيج مثلها بعد اشو ولد عزابي ولا اهل ولا ولد..وشغله وي اهلج ورحمه من الله بعد اشتردين وصدكيني بعد هذا العمر مراح يجيج غير المطلك والعندة مرة وبركبته كومه جهال وتعالي ربيهم فيا حبيبتي اني اكول وافقي والله كريم وصدكيني مراح تلكين احسن من حموشي..هاي فرصه متتعوض بعد انتي ابكيفج
_ يا ابكيفها وانتي اغسلتي دماغها غسل  والله امبين من اسمه عندة شخصيه ومحترم كدام العالم