الحب لم يخلق للجميلات فقط

البارت الخامس والثلاثون

#الحب_لم_يخلق_للجميلات_فقط

للكاتبة بان الأعرجي

البارت 35

ملاك..دخلت للصف مالتي..والبنات انصدموا..ويباعون عليه من فوك لجوة ..جنت امخليه الشال على اديه وفاتحه شعري..كعدت بمكاني(رحلتي) ..وبدوا يهمسون البعض والي تضحك هيه وصديقتها و اتباوعلي  .واكو بنات من غير مراحل دخلو والتموا عليه حتى يشوفوني جنت ابقمة السعادة والثقه وما همني لا انتقاد الناس ولا اي شي ثاني...

ملاك من النوع الميهتم لتقيم الناس ورايهم بيك كشخص...بس لمن تجي للواقع هذا شي أساسي بالحياة ماكو انسان ميتأثر بكلام الناس سواء كان انتقادهم سلبي انته راح تنجرح وتنقهر لو اشكد ما كانت ثقتك ابنفسك وهمين اذا جان رايهم بيك ايجابي. راح تفرح وتفتخر ابنفسك واتقدم افضل ماعندك..ف الي يكولك اني ما اهتم لكلام الناس هذا غلطان ..وبداخله هو اكثر واحد يهتم لكلامهم..

جنت ثاقه ابنفسي ثقه من فولاذ الى أن..بدت الحقيقه تظهر كدامي...بنات صاروا يضحكون عليه..ويحجون....
_ملاك هاي شنو اشلابسه
_اشعبالج عدنه عرس
_شو بله كومي خلي نشوفها..
_ههههه كللللوش....
_هههههه

هاي جانت كلماتهم....ما عدا مراقبة الصف.  ..كالت
_بنات يله كافي..مابيها شي كل واحد حر بلبسه وبصراحه البدلة كلش حلوه وعجبتني حيل

ابتسمت..من كلامها..
_شو وخري الشال خلي اشوف فصالها..
_سحبت الشال وشوفتها البدلة..
_الله كلش حلوة..
_صح فصالها نازك  ..

بدت الاحتفاليه واني بقيت ابمكاني ما اتحركت..
ثقتي ابنفسي حيل انكسرت حسيت نفسي مضحك للمدرسة نظرات البنات وضحكهم عليه واستهزائهم ابهمس..خلاني اتفشل وانحرج اكبر احراج ابحياتي..
اباوع على البنات لبسهم مرتب وبسيط وماكو واحد يكدر ينتقدهم كل وحده الها جمال خاص بيها..حتى اني جنت حلوة ابعين نفسي بس اختياري جان غلط..

اتفاجئنه بدخول المديرة ومعاونتها للصف مالتنه...

الكل كعد ابمكانه بأحترام..
_السلام عليكم
_وعليكم السلام ورحمة الله وبركاته(خوش تلحين😁)
_ بقت اتباوع بالوجوه الى ان صارت عينها عليه اتقربت مني وكالت..
_شو وخري الشال اشوف اشلابسه..
_اول مرة احس ابخوف..واحراج بقيت امدنكه وما جاوبتهاا..
_مو احجي وياج  متجاوبين...بقيت ساكته جان تسحب الشال مني بكل قوة..وعاطت بيه..
_هاي اشلابسه انتي متستحين متخجلين من نفسج هو هذا لبس محترم لطالبه ابعمرج امج تدري بيج لابسه بدلة عرس لو لا..ها؟؟
_كلبي يرجف واختنكت ابعبرتي..اريد اطلع من المدرسة بعد ما اتحمل الموقف.

_احجي..اشلون اجيتي للمدرسه ابهذا اللبس ؟
_جاوبت وحده من الطالبات..
لا ست جانت لابسه تنورة وبدي بعدين بدلت ولبست هاي البدلة..
_اطلعي كدامي وروحي لبسي لبس محتشم مثل باقي البنات..وبعد لتكررين هذا الشي لن عيب وموحلوة تتفشلين كدام البنات..اتفضلي كدامي..
_اخذت جنطتي البيها ملابسي وطلعت للحمامات ابدل..الدمعه ابطرف عيني  صرت اكول ابداخلي..دربالج..اتنزلين دمعتج انتي ملاك المتنكسر انتي بت سعيد...
بدلت ملابسي ورجعت لمكاني الدنيا سودة ابعيني اريد الوكت يخلص حتى اطلع لبيتي واظم روحي ابحضن اهلي  . بقيت ابمكاني وعيوني عالبنات. يحتفلون ويغنون ويقلدون على بعض وصوت ضحكاتهم بكل مكان...