الحب لم يخلق للجميلات فقط

البارت الثامن عشر

#الحب_لم_يخلق_للجميلات_فقط

للكاتبة بان الأعرجي

البارت 18

سعيد: كولي اشبيج ساكته

زينه: انحطيت ابموقف كلش صعب..منا ثقه زوجي بيه ولازم ما اجذب عليه ومنا حمواتي الي على هذا الأساس راح اكمل وياهن لو اكسر خشومهن  لو ابقى طول عمري عايشه بخوف منهن ..ساكته  والكل ينتظر مني رد....

سراب: احجي زينه لتخافين ميكدرن ايسولنج شي ورجلج موجود..

باوعت ابوجه سعيد...لا مستحيل اجذب عليه..بس بنفس الوقت مراح اخسر ولا شخص بينهم..قررت انسحب من هذا الموقف..

زينه: اني ما اعرف شي..درت وجهي ودخلت لغرفتي.

ابتسام: ولج يا طايحة الحظ يالصفرة جايه تتبلين عليه وعلى اختي وشادة ضهرج بحميد ولج حميد اني الربيته وسويته رجال و اعرفه مثل راحه ايدي
التفتت لحميد...هاي تاليتهه ولك اتصف ويه الغريبه على خواتك من امداك وامده غيرتك حرام محسوب عالزلم تفووووو عليك وعلى مرتك...

سعيد: حميد اعتذر من خواتك..
ايمان: خيولي لا انريدة ولا انريد اعتذارة..

سراب: لحظه لحظه عيني يا اعتذار هذا فوك ما احنه اهل الحك تردونه نعتذر....حميد صدكني هذا كل الصار وزينه اتخاف تحجي خاف تنكتل مرة لخ..شفتها هيه ما كالت لا مصار بس اتهربت من الخوف ومن سيطرتهن عليها..

حميد: هاي آخر مرة الجن...اليحجي ويه مرتي حجايه بعد  اكلب البيت على راسه مو بعدنه بسم الله اشتغلت الغيرة وسوالف النسوان... كافي واحد يجي لبيته يريد يرتاح يلكه القيامه قايمه..كافي ولا اتشبعن من المشاكل..

ابتسام: ماشي اني الكم...

كلمن راح لغرفته..

دخل سعيد..واتقدم كعد ابصفي..وكال
اني جنت متأكد انتي مراح اتجذبين..بس اريد اسمع منج كل الصار بدون حرف زايد..

زينه:اتوترت وكأنو كاعدة بمركز شرطة وكدامي ضابط تحقيق..والله اني مالي دخل ابشي وما اعرف ليش سراب دخلتني بالمشكلة..
سعيد: احجي زينه اني رجلج لتخافين من شي..
زينه:  اخذت نفس وكلت...كلام سراب نصه جذب  ..صحيح خواتك غلطن وبسطنه ورادن نغسل ونطبخ بس سراب ما سكتت وردت عليهن كل غلطه ورادت تضرب ايمان..واني كتلني وياهه والله ما عاندتهن ابشي اصلا اتحزمت ورحت للمطبخ اشتغل لن متعودة عالشغل بس سراب لزمتني وما خلتني..والحقيقه هيه هددتهن ابعمي..يله تركنه وهنه راحن طبخن ونظفن .هذا كل الصار..والله

سعيد: ممم زين ليش ما صفيتي ويه سراب وكلتي كلامها صح شنو المنعج..
زينه: ما اكدرت اجذب عليك واخون الثقه البيني وبينك..من اول يوم

ابتسم واخذ ايدي باسها..وكال
شوفي صحيح انتي ما جذبتي وصرتي ويه الباطل  بس انتي اخذلتي الحق وخليتي سراب تنجح بجذبتها...مرة ثانيه اريدج اقوى وتوكفين بوجه الظلم وتحجين بصوت عالي وتكولين كلمة الحق..و لتخافين من واحد..
زينه: سعيد اني اخاف من المشاكل وما أريد اخرب ويه واحد يكلك الباب التجيك منه ريح سدة واستريح واني ما اريد ادخل حرب ويه خواتك لو ويه سراب لن اني اخاف من اخيالي مو انوب اتعارك والاسن فلانه وعلانه  .
سعيد : ابكيفج المهم اريدج دوم ويه الحق ودربالح بيوم اتظلمين بني آدم لن الظلم يا زينه يرجعلج ولو بعد حين افتهمتي قصدي حياتي