الحب لم يخلق للجميلات فقط

البارت الرابع والعشرين

#الحب_لم_يخلق_للجميلات_فقط

للكاتبة بان الأعرجي

البارت 24

بقت سراب ادك وتلطم كلبت البيت علينه اليسمعها ايكول مات الها ميت هم حقها متنلام  جربت شعورها مو سهل اني اشويه غراض احترك كلبي عليهم كيف هيه كل تعبها راح ابشربة ماي...

سراب: 😭😭 اريد حقي عمي اني انباكيت ابيتك يعني الحرامي منكم وبيكم..

_على كيفج بنتي عيب ميصير هذا الكلام اشلون تتهمينه هيج اتهام..
_جا منو الباكهن كلي ...اروح لدوامي وارجع انهب وين صايرة هاي وكاعدة اني..راح كل تعبي بلاش الله واكبر عليكم..
إيمان:وانتي ليش تتهمينه النة اشو انتي ورجلج ٢٤ ساعه نايمين ابغرفتكم اشوكت لحك ايفوت الحرامي وايبوكج..
ابتسام:دكافي يا عيني مو زين عليج...البجي
_اشلون ما ابجي وكل حلالي ومالي ضاع مني...
سعيد:استهدي بالله يا خويه..واحجيلي انتي قافله الدولاب  لو لا
_اي والله يا خويه قافلته وماخذة المفتاح وياي. اجيت ولكيته مفتوح اشلون انفتح ما ادري وهالكدامك اتشوف وهي تشمر الصندوك..لكيت الصندوك فارغ..عساه لا اتهنى بيهن كلمن اخذ تعبي..عمي اني ابشاربك اريد حلالي وتعبي دخيلك والله اموت قهر اني والبطني اذا ما رجعتولي حلالي 😭😭

_بنتي كولي يا الله اصبري خلي نفهم الصار..لحظة رجلج وينه...
_ما أدري اجيت ما لكيته
_ابتسام اشوكت طلع اخوج
_ها   ما ادري ما شفته

ايمان كامت تضحك فرت بيدهه وطلعت..

سراب:شنو ولج ايمان تشمتين بيه مو عساج ابحركان كلبي كولي آمين..

_لا عيب ما مقبولة منج  سراب ايمان اكبر منج ولازم تحترميها وعلى الاقل تحترمين وجودي..
_ما شفت بنتك اشسوت هاي اذا ما طلعت الها يد بالموضوع اكص ايدي..

سعيد:هسه شنو تردين كولي بلكت نكدر نساعدج..
_اريد البيت كله افتشه بيدي زاويه زاويه
_كدامج هذا البيت كله  ونكثي نكث واول مكان اتفتشي هيه غرفتي..

واثق الخطوات يمشي ملكاً......

سعيد جان واثق من نفسه ومن اهله همين لان يعرف الذهب وين راح...انطاهه فرصه لسراب اتفتش كل مكان بس حتى تعرف انو اتهاماتها باطلة ...

زينه: دخلت سراب لغرفتي اتفتش ابكل مكان حتى جوة الجربايه والفراش..
ابتسام:فتشي بالكنتور جوة ملابسها خاف ضامتهن

معقولة هيج حقارة؟؟؟
شكت كلبي بكلامها...مع الأسف سعيد ما جان بالغرفه. واني متاكدة لو سعيد ملتحق جان اتهموني الي...وكالو بكت ذهبها...ما سكتت وكتلها..
_اي فتشي حبيبتي ابراحتج..الكنتور كدامج ..

سراب:ماكو..امداني ضيعت كلشي..وينك حميد تعال شوف حالي..😭😭

نكثت الغرفه شبر شبر وما لكت شي...كلبت الهوسة وطلعت تلطم وتبجي..