القاتل المأجور (متوقفة)

45

دازت ليلة طويلة على أبطالنا و لكن المهم هي أنها كانت أول ليلة غيكونو فيها كاملين مرتاحين و فرحانين ...
واقفة قدام باب الفيلا شادة التيليفون لي قالت لطوني يخليه ليها، كانت يلله صيفطات لناصر ميساج فيه بلي الطيارة ديالهم وجهتها للرباط مع 13:30، واقفة كتسنا طوني و سنام (الخدامة) يطلعو الفاليزات لي باقين للوطو و كتفكر فهاد المشكل لي ورطات راسها فيه، من جهة كتقول مزيان مني عيطت ليه هاكا مغياخدوش مني ولدي و من جهة خايفاه هو ياخدو منها، قاطعتها مني همسات حسناء فودنها
حسناء: واش متأكدة بغيتيها تمشي معانا
اكرام: (شافت فسنام و تبسمات) ااه متأكدة، هاد البنت ماكنشوفهاش كخدامة انا كنعتابرها صديقة فاش كنت بوحدي لقيتها فجنبي (شافت فيها و بتاسمت) بحالك، حتا نتي واحد النهار كنتي صديقة
حسناء: (بحرج) علاش دابا مابقيناش
اكرام: (دارت ضحكة جنب) انا وياك عارفين بلي نتي مامهتماش للصداقة ولا غيرها، نتي باغا غير الولد لي انا حاملة بيه
حسناء (تفكرات أيامهم بزوج و تنهدات): شوفي بصراحة أنا غلطت فاش قلت لطوني بلي انا موافقة ناخذ منك الولد (سكتات و كملات) أنا ما نقدرش ناخدو منك ا اكرام هداك ولدك نتي، انا كنت غير باغا نخلي خوك يندم و صافي، نتي راك صاحبتي و انا نادمة على داكشي لي درت ليك بزاااف سمحي لياا انا را كانو عينيا معميين، عفاك خلينا نرجعو كيف كنا، الانسان راه كيغلط
اكرام:(شافت فيها و تلاحت عليها كتعنقها) توحشتك ا صاحبتي، شوفي كلشي بيد الله غنسولو و نشوفو واش كاين شي حل باش تحملي
حسناء:(كتعنقها حتا هي و راسمة ابتسامة عريضة) سولت لبارح فالصبيطار و قالو ليا نقدر ندير عملية زرع الرحم و ما غيكون ليها حتا أثر خايب على صحتي، يعني عندي أمل نولد مزال، و لكن عفاك خلي هادشي بيناتنا مابغيتش طوني يعرف بلاما نخليه يتفاءل على والو
طوني وقف على هاد الكلمة اللخرة و شاف فيهم بحدة
طوني: شنو كتوشوشو بيناتكم نتوما، و كيفاش ماباغينيش نتفاءل
حسناء: ههه تهدن را قلت ليها زعما خاصنا نبداو نتناگرو تاني مايمكنش نبقاو صحابات و شادين الخاطر و  نخليوك ترتاح منااا ههههه
طوني: شنو تاني هاد نتناگرو
اكرام: بحالك نتا و حسناء فاش ما كتلقاو ما يدار و تجلسو تراادو
حسناء: را هو يا ختي
طوني: كيفاش را هو ا ختي
حسناء: (طلعت حاجب و هبطات لاخر) كيفاش ختي ا خويا
طوني: (كيشوف فيها بنفس الشوفة) و كيفاااااش خويااااا ا ختييي
اكرام: هااااااااا نتوما بديتو تناگرو
ضحكو كاملين و طلعو اللوطو و تاجهو للمطار....

فالقصر كان سي أحمد جالس فالفوطوي مربع و مقابلهم بثلاثة معاه، شاد الضحكة و هو كيشوف فيهم كيفاش باغين يطيرو عليه يخنقوه
أحمد: ولدي يمكن دابا غتكون درتي عقلك و نقدرو نهدرو راجل لراجل
ناصر: (بحدة) انا ما ولد حد، خليني نخرج نمشي بحالي دابااا عندي ما يدار
طوماس (كيهمس فودن الفريد): أحمد ما عندو زهر ماستغلش الفرصة لبارح فاش كان ناصر فرحان، كون جاه ديك الساعة كون را بالفرحة عطاه ي*ويه خخخ
الفريد(كيغمز فطوماس): تا سكت الفضيحة
طوماس: هااا هو ساكت
أحمد سمعهم و ماعرفش شنو لي كان مفرح ناصر لبارح بقا غا كيشوف فيهم كيحاول يقرى افكارهم، اما ناصر غا كيتحلف على طوماس فنفسو تا يخرجو
أحمد: احححم (ناض و تقابل مع ناصر) سمعني ا ناصر انا را قلت ليك لبارح اش كاين انا را عمرني فكرت نخون ماماك و هادشي لي وقع ماكنتش باغي نوصلو ليه و لكن القرار الأول و الأخير كيبقا ليك بغيتي ا ولدي تسمح ليا و نكملو حياتنا مرحبا مابغيتيش انا را غنبقا ديما كنتسنا النهار لي تسمح ليا فيه حتا نموت (حط ايدو على كتفو كيربت عليه) نتا راك كتبقا ولدي و انا غنبقا ديما كنحميك، سير ا ولدي
ناصر ديك الهدرة بحالا بدا كيستوعبها و لكن دغيا جا فبالو بلي خاصو يتبع اكرام و مابقاش بزاف الوقت، شاف فأحمد و غمز الدراري و خرج كيجري و هما تابعينو, ركبو فاللوطو و كسيراو نيشان للفيلا يبدلو حوايجهم و يجمعو داكشي لي خاصهم....