كانو واقفين كاملين كيشوفو فيها مصدومين، و هي واقفة قدامهم بحجابها و لباسها الطويل، رقيقة و قصيرة، حنيكاتها المتوردين البنت بريئة و بيضة بزاف، ابتسامتها عالية على شفايفها و كتشوف فيهم كيف كيطلعو و يهبطو فيها حشمات ما عرفاتهم مالهم ... حسناء كانت عارفاهم غيتصدمو حيت ختها ما كتشبه ليها فحتا حاجة، حنحنات قبل ما تهدر حسناء: احم هادي ختي الصغيرة، ميساء ضحكو ليها كاملين: متشرفين حسناء: و هذا ا ميساء راجلي طوني مد ليها ايدو باش تسلم عليه، تحرجات و بقات تشوف فايديه و تشوف فختها حسناء: احم ميساء ماكتسلمش على الرجال طوني حس براسو تحرج و جمع ايدو عندو: اااه هههه ماشي مشكل تشرفت بيك ميساء: (بابتسامة) الشرف ليا، شفت تصاور العرس طلعتو زوينين هههه حسناء: و هادي اكرام، الأخت ديال طوني اكرام: اممم ياك كتسلمي بعداا على البنات باش ما نحرجك ما تحرجيني هي ما حساتش براشها فاش قالتها و لكن الدراري فشلو بالضحك حيت هي بحالا حشاتها لطوني لي تمنا يغرق فحوايجو هاد اللحظة ميساء: (ومات ليها براسها زعما اه) اكرام: (مدات ليها ايدها كضحك) غير كنضحك معاك متشرفين ميساء: الشرف ليا حبيبة حسناء: و هادي سنام، الصديقة ديال اكرام و را ماكتهدرش بالعربية ميساء: (ضحكات ليها) تشرفت بمعرفتك سنام: الشرف لي ألفريد (كيشوف فسنام و هبط راسو كيهمس لطوماس): سمعتي، قاليك صديقة اكرام اوا غير قلب عليهااا شاف طوماس ماجاوبوش و هو يقلب عينيه كيشوف فيه، لقاه سااهي كيشوف فميساء، و كيدير شي شوفات الله احضر السلامة، هز ايدو تاني و هو ينزل عليه للراس الفريد: لاااا هادشي لي بقاااا، وااا جمع عينيك ا بنادم را البنت كتجي لطوني، نتا باغي تشريها لينا مع ناصر بأي طريقة قلب وجهو كيتأفأف و خلا طوماس مكمل الشوفة، ما حايرش فيه ولا فالهدرة لي قاليه حسناء: (دارت كتشوف فناصر) و هذاا بدااات غا كتشوف فختها و تقلب عينيها ليهم ما عرفات ما تقول حتا نقز هو ناصر: (ببرودة) راجل اكرام اكرام را صااافي وحلات ليها دارت كتشوف فيه بصدمة و هو يضحك ليها و دار كيشوف فطوني لي شاد راسو غا بزز حسناء: و صااافي هادو صحاب ناصر لي حتا انا باقا ماكنعرفهمش ههه الفريد:(دار ليها سلام من بعيد) انا الفريد ميساء: (بابتسامة) متشرفين طوماس: (زرب بخطواتو حتا وقف قدامها) أنا طوماااس و تشرفت بيك (نزل عندها حتا تقابل وجهو مع وجهها) عرفتي نتي زوينة بزاف، شحااال هادي ما شفت بنادم مغلف بحال هاكا عند بالي غا الكادوات لي باقين كيتغلفو هههه دوز لسانو على جنب فمو و هي هاد الحركة مع هدرتو ستافزاتها نسات راسها فين ولا شكون داير بيها، ما حسات على راسها حتا لقات بلي هزات ايديها و جمعاتها معاه بتصرفيقة خلات كلشي كيشوف فيهم، طوماس تصدم بقا واقف و شاد حنكو، و هي شداتها البكية و توثرات ... ناصر جر اكرام لعندو معنقها و كيتفرج عارف طوم زلال و نيت كانت خاصاه شي وحدة تجمع ليه راسو بشي تصرفيقة بجال هادي، سنام شهقات خلات الفريد كيشوف فيها، حسناء حطات ايدها على فمها مصدومة، و طوني جابتها ليه على قلبو مشا كيجري و دفع طوماس واقف بيناتهم طوني: (بحدة) نتا شنو قلتي للبنت حتا خليتيها نفاعلت ألفريد شاف القضية حامضة و هو يدخل جر طوم من بيناتهم و هو كيعتاذر حتا بعد عليهم ... الفريد: قلت ليك بعد منها واش ماكتفهمش، عبرااات عليك نييت، حيد ايدك خليني نشوف وجهك (حيد ليه ايديه) صافي ماشي شي حاجة شوية و تمشي طوماس: (كيضحك) شخصيتها قوية كتبان ا ضريفة الفريد: (كيشوف فيه بنص عين) واا حشم شوية ما قادين على صداع، را باينة متدينة و متشددة داكشي علاش غتمشي تعتاذر منها، زيد تحرك قدامي مشاو لعندهم لقاوهم يلله سكتو ميساء، طوم بدا كيعتاذر منهم واحد بواحد حتا وصل عندها طوم: سمحيلي ا ميساء انا ما عارفش الثقافة ديالكم بزااف، ما عارفش بزاف الحوايج على الديانة ديالكم ما قصدتش نقلل عليك الأدب كنعاود نطلب منك السماحة ميساء: (طلعات و هبطات فيه باحتقار ما حاملاهش) اممم ماشي مشكل و لكن بعد من طريقي را مانصلاحش ليك تفرقوا فجو متوتر، طوني حلف لا ركب هو و ناصر فنفس اللوطو، داكشي علاش ركب هو و حسناء و سنام و ميساء فلوطو و خلاو ناصر و اكرام و الدراري فاللوطو لاخرى .... شدو الطريق للرباط، ميساء طالقة ليهم القرآن و سايقة و كتبان متخشعة، سنام حداها ما عمرها سمعات القرآن، كتسمع فيه و كل كلمة كتخرج قلبها كيضرب و عجبها صوت المقرئ بزاااف، طوني غا كيشوف هاد الجو عمرو عاشو مسكين، و حسناء كتشوف فالتعابير دؤال وجهو و كضحك أما طوماس لي كان سايق و مقابل اللوطو ديالو ديال ميساء و كيفكر فديك التمرميقة لي عطاتو، حتا شي بنت ما تجرآت ديرها لحد الآن من غيرها، بقا كيدورها فراسو كيفاش ما كتسلمش على رجال و مالها مغطية راسها و حالتها، كيسوق و مرة مرة كيلوح عينيه يشوف فيها و كيطول الشوفة، و الفريد حداه فينما يحس بيه دور راسو ينزل عليه بشي دقة باش ينتابه للطريق قبل ما يقلبهم فشي قنت ... وراهم كان ناصر كيبعد خصلات شعرها على وجهها و يلعب بيهم بين ايديه، مرة مرة كيسرح كيفكر فالمستقبل المجهول ديالهم، ضروري خاص يتزوجو و هادشي لي بيناتهم يولي قانوني، ماباغيش ولدو يتزاد و يتسمى ابن غير شرعي... هي غير ساكتة مخلياه على راحتو و كتفكر فالكلمة لي قال قبيلا قدامهم، كيفاش راجلها واش ناوي يتزوج بيها ولا شنو، اش هاد الوحلة ماشي هادشي لاش كانت كتخطط هي ماباغاش تزوج بيه، اوا هادشي لي بقا غير تولي مرات مجرم، هي باغاه غير يحمي ليها ولدها و غير تولد و الله لا بقا شافها لا هو لا غيرو.... دازت ساعتين ... كانو كيهبطو فحوايجهم كيستاعدو يدخلو للفيلا فين غيستقرو حتا يشوفو شي حل مع الوقت ... البنات كانو مجموعين على اكرام لي كتشرح لكل وحدة بوحدها، مافهموش مساكن كيغيديرو تا يسكنو مع ناصر و صحابو ميساء: حرااااام هااادشي، لاااا ا ختي سمحي ليا انااا مانسكنش مع رجال غراب عليا اكرام: وا ميساء الله اهديك ا ختي را للضرورة، و زايدون حنا معاك اش غيطرى گااع ميساء: حرااااام، أعوذ بالله من الشيطان الرجيم، واش نتي و ختي مزوجين بعداا جات معاكم و لكن انا و هاد البنت (على سنام) شنو محلنا من الاعراب، و كون غير ماكانوش دوك الدراري عزبين اويلي استغفر الله العظيم كيغنديرو نعيشو معاهم و حنا بنات، و بعدا واحد فيهم را كيبان مأدب واخا ما كاين ثقة و لكن لاخر راه بااااسل اكرام مسكينة بقات غكتشوف فيها كتحس براسها بحال شي كافرة السيدة تسرسبت عليها بقال الله قال الرسول هلاتها غا كتشوف، سنام مسيكينة بحال الأمانة ما تحرك ما دوي ما عارفاهم علاش داوين غا كدور عينيها بيناتهم، تدخلات حسناء فاش شافت ختها راسها قاصح حسناء: ميساء اجي معايا ا ختي، البنات سمحو ليا غنهدر مع شوية اكرام: خودو راحتكم حسناء جرات ميساء و زادت بعدات عليهم شوية و سنام دارت كتشوف فاكرام سنام: لم أفهم ماذا يحدث هنا اكرام: انها ميساء، تحترم ديانتها التي تفرض عليها عدم العيش مع رجال غرباء، حسناء تحاول اقناعها لا تقلقي سنام: اووه حسنا، يجب أن أتعلم للغتكم اكرام: (بتاسمات) سنعلمك، اكيد هههه سنام: هههه (سكتات و عاودت نطقات) ذلك الفريد اكرام دارت عندها بالعرض البطيء و مطلعة حاجب و مهبطة لاخر اكرام: مااا به ألفريد ؟ سنام: لقد أساء فهمي (عاودت ليها كلشي طراليهم من اللول حتال للخر) اكرام: (كضحك) ههههه ناااري ههههه المعذرة لكن ... ههههه ألفريد إنه الشخص العاقل في تلك المجموعة، لا يحب المزاح أو أشياء كهذه ..(سكتات كتفكرك) اممم كيف سأقولها ... ألفريد من النوع الثقيل على عكس أخيه فهو صعب المنال، قد يظن انك كنت تتوددين اليه بحركاتك، و ربما يعجبك سنام: لكنني لم اكن اتودد اليه، و هو لا يعجبني اكرام: حسنااا حسنااا ههههه لا يعجبك جات حسناء لي من بعد محاولات كثيييرة و اخيرا قدرات تفاهم مع ختها و تقنعها و زادو داخلين للفيلا ... الدراري ديك الساعة كانو دخلو الحوايج و قادو الأثاث لي كان مرون و جالسين كيستاراحو
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
طوماس
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
