دازت حوالي 11 ساعة ... طوماس طول هاد المدة ما سكتش و ما ردش فمو ليه، لسانو طويل ماعياش من الهدرة هو و الشارف لي حداه ما كاينش شي حاجة خلاوها فالتيقار و ما هدروش عليها، تبارك الله هاد الدري شحال فيه ديال الحماس ... أما الثنائي ديالنا فكانت اكرام متوسدة صدر ناصر و ناعسة و حتا هو محاوط بيها ايديه و مغمض عينيه ما تعرفيه واش ناعس ولا فايق ... طوني لي كان شاد ايد حسناء لي غاارقة فنعاسها و كيفكر فشي حل لي يخلصو من ناصر بمرة .... فحين هي كانت مرجعا راسها اللور و مدورة وجهها لجهتو مقابلة معاه، كتشوف النعسة لي داير رغم أن ملامحو قاصحين الا أنه كيبان كيف الملاك، حجبانو و رموشو الكثاف و خصلات شعرو لي مبعثرة و طايحة على وجهو زادتو براءة، تفكرات الموقف لي وقع ليها معاه و كيفاش تعامل معاها و بتاسمات و دغيا جمعاتها، كتبان عليه شخص هادئ، ما حساتش براسها حتا هزات ايديها و حطاتها على لحيتو كتدوز عليها و على وجهها ابتسامة صغيرة ... قفزات شادة ايديها عندها مني دار عندها بالزربة، حلات عينيها على جهدهم و هي كتشوف فيه كيف عاقد حجبانو و مركز ليها على عينيها و كأنه كيحاول يعرفها شنو باغا دير، بدات كترجف و تحرجات عمرها تحطات فشي موقف بحال هذا ما عرفات حتا شنو هو المبرر لي غتعطيه و بقات غير كتدور فعينيها كتجنب تشوف فيه .... قاطعتهم مضيفة الطيران كتخبرهم بلي الطائرة على وشك الهبوط ... قلب عينيه و تقاد فالجلسة و خلاها كتخسر فسيفتها و تلعن راسها على خفة ايدها ... غمضات عينيها حتا هبطات الطيارة، الناس بداو كينزلو، و حتا هو بدا كيحل الاحزمة باش يهبط، دورات عينيها بان ليها طوني و حسناء نازلين دارو ليها بعينيهم زعما غيتسناوها برا، و قلبات عينيها للجهة ديال اكرام كان كيفيق فيها ناصر بقات غير كتشوف فيه عرفاتو غيكون هو لي عاودت ليها عليه (اكرام فاش رجعات للفيلا باش تجمع حوايجها عاودات لسنام على حياتها من الأول حتا اللخر) جمعات الشجاعة ديالها و شداتو من ايديه، دار عندها مطلع حاجب و مهبط لاخر و رجع جلس كيشوف فيها بديك الشوفة ديال منيتك لا زعمتي واقيلا، هي ماداتهاش فشوفاتو اصلا جامعاها بيه غير هاد الرحلة و محال تبقا تشوف وجهو مزال، هادشي لي قالت فنفسها قبل ما تنطق ... سنام: انظر، أنااا قبل دقائق كنت فقط أحاول ايقاظك (شافتو بدا كيحبس الضحكة حيت عارفها كتكذب و هي تبدا دخل و تخرج فالهدرة) ك...كنت احاول ان اقول أننا وصلنا الى الاعجاب (حلات عينيها على جهدهم و هو مهبط حاجب و مطلع لاخر) ااااقصد وصلنا الى المغرب هيهيهي بدات كضحك ببلاهة و ناضت بالزربة باغا تمشي من حداه، هو عاد شاف مزيان الفورمة كيف مقادة الكرش لاصقة مع الظهر و الصدر واقف اما واحد اللور بلاما ندويو عليها، بقا مفيكسي عينيه عليها، و من الزربة غير ناضت طاحت جالسة نيشان فوقو، حلات عينيها على جهدهم و باش تنوض لا بقات كتحكك و تطلب منو السماح، السيد ولا باغيها غا تنوض و هي حلفات لا ناضت حتا نوضها و لاحها على الكرسي، دار طلعها و هبطها باحتقار و جا ماشي بالزربة باغي يهبط يبرد على راسو ... خلاها كتويل و تلعن فراسها على الخفة لي فيها دابا غيقول دارتها بلعاني، جات عندها اكرام لقاتها كتهدر مع راسها بقات غا كتشوف فيها اكرام: سناااام ! هل انت بخير؟ سنام: لست كذلك، هيا من هنا و سأخبرك بالقصة من بعدما كملو الاجراءات كان واقفين قدام باب مطار محمد الخامس، كيتسناو الأخت ديال حسناء لي دارت معاهم غتجي باللوطو توصلهم للرباط، ناوية تستقر معاهم على حساب قرايتها و نيت تدوز الوقت مع ختها لي توحشاتها بزاااف ... طوني: تعطلات علينا حسناء: اوا را الطريق طويلة عليها مسكينة طوني: اممم عرفتي انا متشوق نشوفها، هي صغر منك ياك حسناء: (دارت فيه نص شوفة) علاش كتقلب طوني: غتكون زوينة عليك زعما ؟ اجي علاش ماجاتش للعرس، خافت نصدق مخليك و نتزوج بيها ههههه اكرام كضحك و فنفس الوقت كتقلب بعينيها على ناصر و سنام غير كتشوف فيهم ما فاهمة مسيكينة اش كيقولو حسناء: (ضرباتو لكتفو) كتقلب على الصداع، ماجاتش للعرس حيت كانو عندها الامتحانات و انا عاذراها، و بخصوص واش كتشبه ليا ههههه انا متأكدة بلي فاش غتشوفها غتصدم على هاد الكلمة وقف عليهم ناصر و الفريد و طوماس، اكرام غير شافتو و هي تشد فدراع سنام و بدات كتدير ليها بعينيها زعما را هذا هو لي عاودت ليك عليه ... ناصر: (شد اكرام من ايديها) يلله نمشيو طوني: (شد اكرام من الايد لاخرى) فين يلله ا سييي بلاصتها حدا خوها ناصر: (كرز على ايدو و كيهدر بحدة) ولدي بلاصتو حدايا حسناء:(شدات من راجلها) عندو الحق، صافي خليه عفاك ما قادين على صداع معاه طوني: (طلق من حسناء) ختي ما غتمشي مع حد من غيري اكرام بقات غير ساكتة ما باغا تخسر لخوها خاطرو ما باغا تقول لناصر لا و هي لي جايباه و اصلا واخا تقول لا بحالا غيتسوق ليها، هما بداو كيزيرو على ايديها قصحوها و هي تجر ايديها منهم بنرفزة، حسناء غير شافتها هكاك بقات فيها و هي طلع ليها القردة حسناء: (بالغوات) واااااااش نتوما بااااقين دراري صغار اش هاد الفعايل، اكرام بعقلها و هي لي غتقرر معامن بغات تكون اكرام بدات غير كدور عينيها و ساكتة اما واحد ناصر كون كانو شوفاتو لحسناء رصاص كون راها طايحة ميتة دابا ماحملهاش تغوت و سكت غا على وجه اكرام طوني: اهاه واخا، واش غتمشي مع خوك ولا مع هاداك لي دمر ليك حياتك هبطات راسها و سكتات حيت حتا واحد فيهم ما ساهل، غير طوني لاحها ليه و ناصر دار فيها ما بغا، ناصر دار ضحكة جنب و جرها من خصرها لعندو، خلات طوني غيطرطق و مرة مرة كتهز فيه عينيها و تعاود تهبطها، بقا فيها و هزات عينيها فناصر اكرام: عفاك ما بغيتش نخسر علاقتي بخويا (سكتات مترددة) وو واخا نسكنو مجموعين هدرتها جابت ليه الصدمة، هو ماحاملش طوني ماكرهش يخنقو بايديه و هي كتقوليه يسكن معاه، بقا كيشوف فيها مابغاش يخسر ليها خاطرها ناصر: (ببرود) لي بغيتي هي را بالفرحة طارت عليه كتعنق فيه قدام كلشي، طوني حل عينيه على جهدهم كيشوف فيها كيف كتعلق فيه، اكرام عاد حسات على راسها رجعات اللور و هي حشمانة قدامهم، هادي هي لي ماكتحملوش، طلقات منو و مشات عند طوني لي غير شافها قلب وجهو طوني: سيري عندو لاش تفكرتيني اكرام: و علاه انا نسخا بخويا ههه انا قتارحت على ناصر نعيشو كاملين هو غير سمعها دار كيشوف فيها مصدوم و شوية بالشوية بدا يضحك، حتا بدا يضحك بهيستيرية طوني: تي واش حماقيتي كضحكي معايا، انا ماحاملش نشوف وجهو نولي نصبح عليه كل نهار اكرام: (كتسكت فيه) دوي بالشوية مااالك، راه ماكيجبدكش لاش كتغوت دابااا، دير شي حاجة على قبلي و لو مرة فحياتك (همسات فودنيه) منها نيت غتبقا قريب مني انا و البيبي طوني دورها فراسو لقاها عندها الحق هو باغي الولد اذا غيصبر على قبلو، عيا يشوف و تنهد موافق، اكرام بقا كتشوف فبه و كتقول مع راسها كون ماكانش باغي حاجتو فيها و الله لا دار شي حاجة على قبلها... أما سنام مني شافت الفريد مع ناصر و هي غير كتقلب فعينيها يمين و شمال و كترجف، كان يسحاب ليها مابقاتش غتشوف وجهو و لكن القدر عندو كلام اخر، الفريد بقا كيشوف فيها بنص عين ما باغيش يعيق و يبين لبنادم شي حاجة، و لكن را بصح تصدم فاش شافها مع اكرام و بغا يعرفها شكون، قلب عينيه عند طوماس لقاه كيشوف فسنام و يطلع و يهبط فيها، هز ايديه و نزل عليه للراس، طوماس مسكين ما عرف باش تبلى دار كيشوف ليه بمعنى شنو ... الفريد: جمع عينيك، ما خليتي حتا وحدة فالتيقار بقات ليك غا هادي معرت اش كتجي اكرام بغيتي الصداع مع ناصر قاطعهم صوت شي بنت من بعيد: حسناااااااء ختييييي كلشي دار كيشوف فيها، جات كتجري تلاحت على حسناء كتعنق فيها و تضحك و حسناء حتا هي نفس الشيء، هما رااا كلهم مصدومين فيها بحالا شافو شي أعجوبة
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
الفريد
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
