Last Full Show

Act 3 Scene 1

INT. LUCILLE'S ROOM – DAY

Nagbabasa lang si Lucille ng libro, sinusubukang buuin ulit ang mga salitang hirap na niyang sabihin dahil sa aksidente, anim na araw na ang nakalilipas.

May kakatok sa pinto. Ang tatay ni Lucille.

LUCILLE'S DAD: Anak? Kilala mo pa ako?

Mapapangiti si Lucille.

LUCILLE: Pa, ang kulit mo. Sabing naaalala ko nga kayo. Araw-araw talaga?

LUCILLE'S DAD: Siyempre. Para sigurado.

Hahawakan ng kanyang ama ang kanyang kamay at maluluha.

LUCILLE'S DAD: Bakit pa kasi pumayag—

LUCILLE: Pa, stop na. Ayan na naman kayo, e. Sabi ni Doc, bawal akong ma-stress, di ba? Bawal nega.

Pupunasan ng kanyang ama ang mga luha niya at magpipigil sa gusto pa sanang sabihin.

LUCILLE'S DAD: Wala ka pa rin bang maalala kung bakit ka nando'n?

LUCILLE: Sasabihin ko naman, Pa. Pero sa ngayon . . . wala. Wala talaga akong maalala. Magtiwala na lang tayo kay Doc, okay?

LUCILLE'S DAD: Di ka na tuloy makakapag-speech do'n sa graduation mo. Mahihirapan ka raw, e. Sila na raw bahala sa ipapalit ng sasabihin mo.

LUCILLE: Sorry, Pa.

LUCILLE'S DAD: Kami ang sorry.

LUCILLE: Stop na. Samahan mo na lang ako manood.

LUCILLE'S DAD: Ng?

LUCILLE: Di ko alam. Hanap tayo ng movies sa internet.

LUCILLE'S DAD: Sige, tawagin ko mama mo at maghanda rin kaming meryenda.

Ngingiti si Lucille.

LUCILLE: Okay. Thanks, Pa.

Bubuksan ni Lucille ang laptop na hindi niya alam kung kalian niya huling ginamit. Pagbukas niya ng web browser, makakakita siya ng notification:

Restore pages?

Chrome didn't shut down correctly.

Pipindutin niya ang blue button na may salitang restore.

Hindi niya maiintindihan kung bakit siya nasa page ng bayan nila at kung bakit pag-scroll down niya ay makikita niya ang litarto ng kanilang club adviser, kasama ng nakita niyang babae na natataranta sa unang araw niya sa ospital.

Buburahin ni Lucille ang website na nasa search bar at magtatayp ng ibang website.

Papasok ang kanyang mga magulang, dala-dala ang meryenda at ang toga naisusuot niya para bukas.