Hard Murder 1(Complete)

လေလွင့်ငှက်/ေလလြင့္ငွက္

(Unicode) ညသည် မိုးဓါတ်ဖြင့် အေးစိမ့်စိမ့်ဖြစ်နေသည်မို့ အချုပ်ထဲတွင် တရားခံဖြစ်သည့်အက်ဆစ်တစ်ယောက် ကိုယ်ကိုအတတ်နိုင်ဆုံး ကွေးကျုံ့ကာ အိပ်ပျော်နေလျှက်ရှိသည်။
အနွေးထည်မပါသည်မို့ သူ့ကိုယ်မှာ ချမ်းအေးလွန်း၍ တဆတ်ဆတ်တုန်ရီနေသည်။ ဒါတောင် အတတ်နိုင်ဆုံး ပေတေအိပ်နေရတဲ့အခါ သူ့ကိုသတိပြုမိနေသော စုံထောက်ကြီး ဟာလေမှာ စိတ်မသက်သာပဲ အချုပ်ထဲသို့ ဝင်ခွင့်တောင်းလာခဲ့သည်။

ရဲတချို့က ဂျူတီချိန်ဆင်းသွားပြီမို့ အချုပ်စောင့်ရဲများနှင့် သူသာကျန်တော့သည်။ ဒါ့ကြောင့် အချုပ်ထဲသို့ သူအလွယ်တကူဝင်ခွင့်ရခဲ့၏။

ဟင်း . .
အရွယ်နှင့်မလိုက်အောင် ကြီးမားသောပြစ်မှုကို ကျူးလွန်ခဲ့ပြီး ခက်ခဲကြမ်းတမ်းသောဘဝကို ကျော်ဖြတ်ရတော့မည်မို့ ဟာလေတစ်ယောက် တွေးရင်း စိတ်မချမ်းသာလှ၍ အိပ်စက်နေသောအက်ဆစ်၏ကိုယ်ပေါ်သို့ သူ့ရဲ့ကုတ်အင်္ကိျီကို လွှားခြုံပေးလိုက်မိသည်။
သူဝတ်ထားတဲ့အနွေးထည်ဖြစ်၍ ခပ်နွေးနွေးကိုယ်ငွေ့တို့က အင်္ကိျီမှာ ကပ်ပါသွားရာ အက်ဆစ်မှာ ထိုအနွေးထည်ကြောင့် သက်သောင့်သက်သာရှိသွားသလို ခံစားလာခဲ့ရသည်။

" စစ်. . အား "
ဒါတင်မကသေးပဲ ဟာလေက သူ့ဒူးခေါင်းမှ ဒဏ်ရာများကို ပလာစတာကပ်ပေးလာတော့ စပ်ဖျင်းဖျင်းခံစားချက်နှင့်အတူ သူ နိုးလာလေတော့သည်။

" ဟင် "
နိုးနိုးချင်း သူ့အနားမှာ လူတစ်ယောက်ရှိနေတာမြင်ရတော့ ထိုကောင်လေးလန့်ပြီး အတင်းကုန်းကြုံးထကာ နံရံထောင့်သို့ ဖင်တရွတ်တွန်းကာ ပြေးကပ်တော့၏။

" မကြောက်ပါနဲ့။ ငါမင်းကို ဘာမှမလုပ်ပါဘူး။ မင်းဒဏ်ရာတွေကို ဆေးထည့်ပေးရုံသပ်သပ်ပါ။ အေးတဲ့ရာသီမှာဆို ဒဏ်ရာတွေက သိပ်မကျက်နိုင်ဘူးလေ "

ဟာလေရဲ့ဖြူစင်တဲ့မေတ္တာနှင့် ကိုယ်ချင်းစာတတ်သည့်မျက်နှာထားကြောင့် အက်ဆစ် သိပ်မကြောက်တော့ပဲ စကားပြန်ပြောလာခဲ့သည်။

" ကျေးဇူးတင်ပါတယ် အရာရှိကြီး "

" ငါက အရာရှိရဲတစ်ယောက်မဟုတ်ပါဘူး။ ရဲတွေကို ကူညီပေးရတဲ့စုံထောက်တစ်ဦးပါ။ ငါ့နာမည်က ဟာလေစံ။ ဟာလေလို့ပဲ ခေါ်လို့ရတယ် "