Unicode
ပိတ်ရက်တစ်ရက်ဖြစ်ပါတယ်။
ဒီတစ်ပတ်ပိတ်ရက်က မနက်ပိုင်းစာသင်ရမယ်။
စောစောထကာ အိမ်သန့်ရှင်းရေးလုပ်ပြီးတာနဲ့ စာသင်ဖို့ ပြင်ဆင်ရတယ်။ ရွှေလ ဖွားနဲ့တူတူလက်ဆုံမစားရတာကြာပေါ့။ မနက်ပိုင်း မြေးအဖွားနှစ်ယောက် ဟင်းချက်စရာတွေ ဆင်းဝယ်ကြတယ်။ ဝက်လက်ပေါင်းစားကြမယ်လေ။
ဖွားက တရုတ်အစားအစားတွေကိုသူမတူအောင် ချက်တတ်ပါတယ်။ လမ်းမတော်တဝိုက်မှာ အရင်က ဖွားလက်ရာ နာမည်ကြီးခဲ့တာပဲ။ ခေါက်ဆွဲကြော် ကြာဇံကြော်ဆိုရင်လဲ ဖွားကြော်တာ အရမ်းစားလို့ကောင်းတာပါ။ ရွှေလအကြိုက်ဆုံး ဝက်သားဒုတ်ထိုးကိုလဲ ဖွားက လုပ်တတ်တယ်။ ရွှေလက ဖွား ပင်ပန်းမှာစိုးလို့မလုပ်ခိုင်းတော့တာ။
"ဖွားရေ.... သားသွားမယ်နော်.... စာသင်ဖို့"
"အေးပါ.... မြေးပြန်လာရင်စားရုံအသင့်ဖြစ်စေရမယ်.... ထမင်းကျွေးရင်စားမလာနဲ့နော်"
"ဟုတ်....ဖွား"
ရွှေလ စာသင်ပေးတဲ့ကလေးအိမ်က တစ်ခါတစ်ရံထမင်းကျွေးလွှတ်လိုက်တတ်တာမို့ ဖွားကမှာနေတာပါ။
လှေကားအဆင်းမှာ ဖွားဆီကိုလာတဲ့ အစ်မကြီးတစ်ယောက်ကိုတွေ့တယ်။
"အော.... ရွှေလ.... စာသင်သွားပြီလား"
"ဟုတ်.... မသီတာ....ဖွားရှိတယ်.... အပေါ်မှာ"
"အေး....အေး.... ရွှေလလေး.... ဖြေးဖြေးဆင်း"
မသီတာဆိုတာက ဖွားဆီကငွေယူပြီး တစ်ဆင့်ပြန်ချေးငှားတဲ့အစ်မပါ။ ဖွားနဲ့လဲ ဆွေမျိုးနီးစပ်တော်စပ်ပြီး ဖွားကိုလဲချစ်တယ်။ ဖွားအတွက် ကူညီစရာရှိရင်လဲ မသီတာပဲ လုပ်ပေးနေကျပါ။ အခုလဲ ဝက်လက်ပေါင်းဖို့ ဖွားကမသီတာကိုခေါ်ထားတာ။ ဖွားကပါးစပ်ကပြော မသီတာက လိုက်လုပ်ပေးချက်ပေးပေါ့။
မသီတာတို့က လမ်းမတော်ဈေးထဲမှာ ငွေတိုးချေးတယ်။ အထည်ဆိုင်သေးသေးလေးလဲရှိတယ်။
စာသင်တဲ့အိမ်ကနေ ရွှေလအိမ်ကိုပြန်ရောက်တော့ နေ့လည် တစ်နာရီကျော်ပြီ။ မဝေးတဲ့နေရာမှာမို့ ထမင်းပြန်စားတာပါ။ ညနေ တစ်ခေါက်ပြန်သွားသင်ပေးရမယ်။
ပိတ်ရက်ဆိုပေမဲ့ ရွှေလအတွက်ကတော့ မပိတ်ပါ။
YOU ARE READING
မေတ္တာမိုး သွန်းဖြိုးလို့ရွာ
Romanceသတ်လတ်ပိုင်းအမျိုးသားတစ်ယောက်နဲ့ ငယ်သော်လည်းရင့်ကျက်နေတဲ့ကောင်ငယ်လေးတို့ နှစ်ယောက်အကြောင်းပါ။ လိုက်ပါစီးမျောပေးပါအုံးနော်။
