မေတ္တာမိုး သွန်းဖြိုးလို့ရွာ

part(6)

Unicode

တီ...တီ...တီ...တီ

ပုံမှန်အတိုင်းပဲ သာလွန့်နှိုးစက်လေးက မနက် ခြောက်နာရီသုံးဆယ်မှာ မြည်သံပေးတယ်။

သာလွန် အိပ်ယာထက်မှထလိုက်သည်။
ညက အိပ်တာနောက်ကျသည့်အပြင် သောက်ထားတာလေးလဲရှိသည်။
သို့သော် ခေါင်းက မကြည်မလင်မဖြစ်ပါ။
ရေချိုးခန်းထဲဝင်ပြီး ကိုယ်လက် သန့်စင်ရသည်။
ဒီနေ့ ဝင်းတစ်ပတ် စက်ဘီးစီးရမည့်နေ့ဖြစ်သည်။

Sport wear တွေအပြည့်အစုံဝတ်ပြီး သာလွန် အခန်းပြင်ထွက်လာတော့...အေးကို အသင့်တွေ့ရပြီ။

"Morning အေး "

"Morning သားသား"

ညင်သာသိမ်မွေ့သော အဒေါ်ဖြစ်သူရဲ့ နံနက်ခင်းချစ်စဖွယ် နှုတ်ဆက်မှုကြောင်​့ သာလွန်မျက်နှာမှာ အပြုံးကြီးကြီးပေါ်လာသည်။

"အခုက.... စက်ဘီးစီးဖို့လား...."

"ဟုတ်တယ်....အေး .... ခဏပဲနော်.... breakfast မစောင့်နိုင်ရင် စားနှင့်ပါလား"

"အိုး.... နှစ်ယောက်ထဲရှိတာကို မစားချင်ပါဘူး.... သွား သွား.... မြန်မြန်ပြန်လာအုံး"

"ဒေါ်ပုတို့ရော.... စားပြီးပြီလား"

မီးဖိုခန်းထဲမှာ ထမင်းဟင်းချက်ပြုတ်ပေးတဲ့ ဒေါ်ပုတို့သားအမိရှိတယ်။ အေးရဲ့အဖော်တွေပေါ့။
တစ်ဦးတည်းသော တူဖြစ်သူနဲ့မှ မနက်စာတူတူစားချင်တာကို နားလည်နေကြတဲ့ ဒေါ်ပုတို့တွေက အေးကို မနက်စာစားဖို့ မစောင့်ကြပါဘူး။
​အေးကို နှုတ်ဆက်ပြီး ကားဂိုထောင်ထဲက japan made စက်ဘီးလေးကိုထုတ်ပြီး ဝင်းတစ်ပတ်စီးလာခဲ့သည်။

မနက်စောစောမှာ လေ့ကျင့်ခန်းလုပ်သူတွေ ဟိုနားတစ်စု ဒီနားတစ်စုတွေ့ရသည်။
ဝင်းထဲမှာ ဒီအချိန်က ကားလုံးဝမရှိသလောက်ရှင်းနေတာဖြစ်သည်။
အသက်ကြီးပိုင်း တော်တော်များများက ကိုယ်လက်လှုပ်ရှားမှုကို မနက်စောစော ထပြီး လုပ်လေ့ရှိတာမို့ ခြောက်နာရီခွဲကျော်ရုံနဲ့ လူကလမ်းမှာမပြတ်။

ကတ္တရာလမ်းမဲမဲရဲ့ဘေးမှာ စက်ဘီး ဆိုင်ကယ်သွားဖို့ရာ လမ်းသေးတစ်ခု ဖောက်ထားပေးတာကြောင့် ကားလမ်းသပ်သပ် ဆိုင်ကယ်လမ်း စက်ဘီးလမ်းသပ်သပ်တော့ဖြစ်သည်။
ဒါက သာလွန့်စိတ်ကူးလေးပါ။
တစ်ချို့ ဝင်းရဲ့အတွင်းပိုင်းကျကျ အိမ်တွေက ဝင်းထိပ်အထိထွက်ဖို့ရာ လှမ်းသည်။ ဒါကြောင့် ကားနဲ့မထွက်ရသည့်တစ်ချို့အိမ်သားတွေအတွက် ဝင်းထိပ်ထိ စက်ဘီးဆိုင်ကယ်နှင့်လာလို့ရသည်။ ဝင်းထိက လုံခြုံရေးဂိတ်တဲဘေးတွင် ဆိုင်ကယ်စက်ဘီး ထားရန်နေရာကို တပါတည်းထည့်ပေးထားတာမို့ အဆင်ပြေသည်။
လမ်းလျှောက်ပြီး ဝင်းထိပ်ထိ ထွက်ဖို့တော့မဖြစ်နိုင်။
Villa ထဲမှာက သာလွန်တို့လိုမျိုးလူနည်းစု တစ်ယောက်ကိုကားတစ်စီးနှုန်းနေကြသည့်မိသားစုတွေရှိသလို မိသားစုငါးယောက်ဆိုပေမဲ့ ကားကသုံးစီးပဲရှိကြတာ မျိုးလဲရှိတတ်ကြသည်မို့ သာလွန်က အကောင်းဆုံးဖြစ်အောင်စီစဥ်ပေးထားတာပါ။