မေတ္တာမိုး သွန်းဖြိုးလို့ရွာ

part(12)

Unicode

ဒီတစ်ပတ်ပိတ်ရက်တစ်ရက်မှာ ရွှေလက မာမာတို့ဝေလတို့နဲ့ချိန်းထားတယ်။ အပြင်ထွက်ပြီးမုန့်စားကြဖို့ပါ။ သူငယ်ချင်းတွေနဲ့က မတွေ့တာတစ်လနီးပါးရှိသွားပြီ။ ရွှေလကလဲအလုပ်ကို ချက်ချင်းဝင်သွားသလိုဖြစ်နေတော့ မတွေ့ကြရသေးတာ။ လစာမထုတ်ရသေးပေမဲ့ မုန့်ဝယ်ကျွေးဖို့လောက်တော့ရှိပါတယ်လေ။ စာသင်ပေးနေရတဲ့ကျောင်းသားတစ်ယောက်လဲရှိတာပဲဆိုတော့ ငွေတော့မပြတ်ပါ။

ဒီနေ့က ရွှေလတို့ရုံးမှာ နေ့တစ်ဝက်သာရုံးတက်ပေးကြရတဲ့ စနေနေ့။
ဒါကြောင့် ရွှေလက ထမင်းဗူးမယူခဲ့ဘူးပေါ့။
ရုံးကိုစောစောပဲထွက်လာခဲ့တယ်။
ရောက်ပြီဆိုတာနဲ့ မနန္ဒာမရောက်သေးခင်မှာပဲ လုပ်စရာရှိတာလေးတွေကို လုပ်ထားပြီးသား။ သန့်ရှင်းရေးဝန်ထမ်းတွေပဲ ရောက်သေးတာ။ ရွှေလရုံးကိုရောက်တဲ့အချိန်ဆို ရုံးပိုင်းဝန်ထမ်းတွေမရောက်တတ်ကြတာများပါတယ်။ အနီးဆုံးကလာရတာလဲ ဖြစ်နေတော့ရုံးကိုအရင်ဆုံးရောက်တာ ရွှေလပါပဲ။

သန့်ရှင်းရေးအန်တီကြီးတွေက စကားပြောရင်းအလုပ်လုပ်နေကြတယ်။
ဦးသာလွန်ရဲ့အခန်းထဲကိုတော့ မဝင်ကြဘူး။
မနန္ဒာပြောပြတာကတော့ ဥွီးသာလွန်ရဲ့အခန်းကို ကိုစိုးသော်တာထွန်းနဲ့မနန္ဒာ တစ်ယောက်ယောက်ရှိနေမှ သန့်ရှင်းရေးဝင်လုပ်ခွင့်ပြုတယ်ဆိုလားပဲ။ သူ့စာရွက်စာတမ်းတွေနေရာတကျမရှိရင်လဲ ဦးသာလွန်စိတ်ဆိုးတယ်တဲ့။
ရွှေလကိုယ်တိုင်လဲ အလုပ်ဝင်တာ နှစ်ပတ်ပြည့်ပြီပေါ့။ ဦးသာလွန်အခန်းထဲကို မနန္ဒာမပါဘဲ မဝင်ရဲသေးဘူး။ ရုံးကိုခဏပဲရောက်လာတတ်ပေမဲ့ ရောက်လာတိုင်းလဲအလုပ်တွေပုံနေတတ်တဲ့ ဦးသာလွန်ကို ရွှေလ အကူအညီဖြစ်ပါ့မလားလို့လဲ တွေးမိတာခဏတိုင်းပါပဲ။

အသစ်တည်ဆောက်မဲ့ လုပ်ငန်းခွင်အတွက်ဦးသာလွန်အလုပ်များနေတယ်။ တန်ဖိုးသင့်အိမ်ယာစီမံကိန်းဆိုတာ ဦးသာလွန်အရင်ကဆောက်ခဲ့ဖူးတာတွေနဲ့ ကွာခြါးတယ်တဲ့။ သင့်တင့်တဲ့ quality ပေးချင်နေပြီး ရောင်းချတဲ့အခါအဆင်ပြေတဲ့စျေးနှုန်းဖြစ်ဖို့ တော်တော်ကြိုးစားနေရတယ်တဲ့။ ဒါကြောင့် ဦးသာလွန် ရုံးကိုရောက်ပြီးဆိုတာနဲ့ survey အခန်းကလူတွေနဲ့ခေါင်းချင်းဆိုင်ပြီးဆွေးနွေးနေရတာ မပြီးတော့ဘူးပေါ့။