Reborn Only to Love You Again || ဘာသာပြန် 《Completed》

Chapter 9:ကိုယ်ဝန်ရှိခြင်း

(ဒုတိယမြောက်ဒဏ်ရာ)

သုံးရက်အကြာတွင် မြို့တော်စိတ်ကျန်းမာရေးဆေးရုံမှ လူနာတင်ယာဉ်တစ်စီးသည်ရှင်းယဲ့ရွာသို့ မောင်းနှင်လာပြီး လီကျန်းကွေ့ကိုခေါ်ဆောင်သွားခဲ့သည်။ရွာသူရွာသားများက သတင်းကြားသောအခါ တစ်ယောက်ပြီးတစ်ယောက် ရယ်မောကာ လက်ညှိုးထိုးပြရင်းကြည့်ရှုရန် စုရုံးလာကြတော့သည်။အရူးလီကျန်းကွေ့ကို လမ်းပေါ်အမြန်ရောက်အောင်ကားကိုတွန်းခိုင်းသင့်သည်ဟုပင်သူတို့ကပြောလာကြ၏။

ဝမ်တဟူသည် မျက်နှာပေါ်တွင်စိတ်ပျက်လက်ပျက် အမူအရာဖြင့် တံခါးဝ၌တစ်ယောက်တည်းရပ်နေသောထိုကောင်လေးဘေးတွင်ကပ်လျက် ကြည့်နေခဲ့သည်။လီချင်းရန်က သူစိမ်းများကသူ့အဖေကိုကားပေါ်တက်ခိုင်းနေသည်အား ကူကယ်ရာမဲ့စွာကြည့်နေခဲ့၏။

"ဦးလေးကဆေးသွားကုတာ!"

ဝမ်တဟူသည် နွေးထွေးမှုမရှိဘဲအေးစက်နေသောလက်လေးကို ဆုတ်ကိုင်ကာနူးညံ့သိမ်မွေ့စွာပြောလိုက်၏။

"သက်သာသွားရင် သူပြန်လာမှာပါ"

"မေမေသွားပြီ ဖေဖေလည်း သွားပြီ ဒီအိမ်မှာအခု ကျွန်တော်တစ်ယောက်တည်းပဲ"

"အဆင်ပြေသွားမှာပါ!"

ဝမ်တဟူကထိုကောင်လေးကို ဖက်ထားရင်းပြောလာ၏။

"အားလုံးအဆင်ပြေသွားမှာပါ!"

သူ့အမေကတခြားလူနှင့်ထွက်ပြေးသွားကာ အဖေကစိတ်ကျန်းမာရေးဆေးရုံကို ရောက်ရှိသွားခဲ့၏။အသက်ခုနစ်နှစ်သာရှိသေးသော လီချင်းရန်သည် ရုတ်တရက်ပျိုးထောင်ပေးမည့်သူမရှိသော ကလေးလေးအဖြစ်သို့ ပြောင်းလဲသွားခဲ့လေသည်။

ဤကိစ္စနှင့်ပတ်သက်၍ ရွာအကြီးအကဲဖြစ်သူဝမ်ရှို့မင်က ခုံးရှို့မေ့၏မိခင်အိမ်ထောင်စုကိုဦးစွာဆက်သွယ်ခဲ့၏။သို့သော် သူတို့အိမ်ထောင်စုသည်ယခင်ကတည်းက ဆင်းရဲနေခဲ့ပြီးသားပင်။

အခြားပါးစပ်တစ်ပေါက်ကို မည်သို့ကျွေးနိုင်မည်နည်း?