العربي وعيالاتو🎻مكتملة🎻

🎻الجزء 1🎻

قصة:🎻لعربي وعيالاتو🎻
بقلمي:أنستازيا
الجزء:1

فوسط قيطون وسط الخلا فواحد الدوار شاخضة بالماسق والزديح والشطيح...الطايح كثر من النايض...جالس لعربي الملقب بالستاتي رقم جوج العمارة سبعطاش شقة طناش هو و الطااقم ديالو لي متكون من الشيخات خدوج وفطيطم... الكويمينجة لي هو نفسو وكذلك لحموشية مولات الطعريجة...شي تيجدب...شي تيحضر...كلا وشنو تيدير (من بعد شدة الحسد والكره الكبير بين العائلات ناضت وحدة من عائلة العروسة وجبدات ربعمية وهزاتها تتراري بيها زعما شوفوني راني حطيت ربعمية والمقصودين فهاذ الساعة هوما عائلة العروسة...قربات لحداه ولسقاتها ليه ف سنطيحتو):هااك وغني مولات السالف...(ورجعات وهي تتميق فعائلة العريس)
لعربي:مايكون اخاطرك نعام أ لآلة هي اللولة ألالة مرت سيدي هي لولة...

لحموشية(تتعيط للشيخات خدوج وفطيطم وهي مغزفة عليهم بالحس باش ما يسمعوها الناس ويتشفاو فخدمتهم):اجيو ياااا دوك السلوكياات محشموتوش دورو بالراجل

جاو تيتمايلوا زعفانين نطقات خدوج(وهي كتهزهز فصدرها المنفوخ لي يوزن جوج الوسايد عينيها كحلين وزايدة مكحلاهم بالكحل شعرها كحل وصابغاه بالزعر ساعة تا الصباغة مخبات ديك قبة قوبع لي لوسط كحلة بشعرها الحقيقي لابسة تكشيطة فالحمر د موبرا مع صندالة فالذهبي محجرة التكشيطة ممزيراش عليها ولكن مع فورمة الرويضة باينة غطرطق عليها):وا تي خلينا نضبروا على رزقنا مجاش عندنا حنا نمشيو عندو(رجعات تتشوف فالعريس البارز بنص عين وهو يشوف فيها ومرة مرة تهزهز فصدرها كتعطي إشارة ضوئية إقتصادية للمحلبات)

وحداها فطيطم المنافسة ديالها وخا مسيكينة على قديدو حالها ماهو حال خدوج  وتا المؤهلات ما متوفراش بشكل كامل مااه مااه فين توصل ل خدوج الفيضان..شعرها كحل مكحل مافيه تازغبة فلون آخر مطلوق عينيها صغار قهويين مايلين للكحولية لابسة تكشيطة فالكحل لابساها وتدور بيها و هي رآه التكشيطة لي لابساها ماشي هي...تيدوروا هي و خدوج وفطيطم غير حاطة راسها فيها وزايدة أما هي كي كاينة كي مكاينة و كيشطحو بلي بان ليهم يا طلبة يا سربايا يا دقايقيا تا من العريس ما منساوهش كلشي تحت شعار "رزقي ما عطاني ربي" ميساليو العرس تيكونوا جمعوا وطواو و فارقوا العريس مع العروسة و شادينوا فالدورة تيقسمو فيه..

الحموشية:اييييه ايييييه ضبرو على راسكم ضبرو (هزات بلغتها كتنيش على خدوج) والله كونما حشمت نتي يا تا نشير عليك بيها نفش ليك دوك جوج بنوات(روايض الطوموبيل) لي مزيغينك...(كتهظر على فطيطم)دوزي تفرقي من حداها نتيا أ ديك العود الطويل تفرقي ودوزي قدامي الله يخليكم جميع طريكت الشلاهبية

فطيطم(جات قدامها مهولة عارفة الحموشية تتعصب تا تتعصب و تدور غا ليها هي..سامحة ف خدوج لي كتنصب فرزقها ما تحشم تا يهديها ربي من عندو..

دارت شافت فيها العروسة وزيرات على العريس تا داروا عينيه لجيهتها بلهلا يطريه ليه حاكمة فيه..

العروسة:حااااميد شوووف لهيه شوف

حميد(جاا يشوف وما يحس غير بتصمقيلة الغدايد على حنكو)سعااد قادي ليا نضاضري سعااد مابقيت نشوف والوا نضاضري

تعاليقكم وتشجيعاتكم الزوينة😍⁦❤️⁩⁦❤️⁩