العربي وعيالاتو🎻مكتملة🎻

🎻الجزء 62🎻

قصة؛🎻لعربي وعيالاتو🎻
  بقلمي:أناستازيا
      الجزء:62

نقزات السطح لاخر وخلات حسينة غارق فسحابة الحيرة...

حسينة:حليمة أجي فين غادا حليمة

صبح صباح جديد على ناسنا..
صباح التوجاد صباح الفياق بكري صباح الجد و وقت العمل

السرغينية وهي كتستف الحلوة:واش تي متأكدة غيجيو شتك من الصباح ونتي تتعرضي عليا هنا

حليمة:وا مي مالكي مكتيقيش بيا رآه قلت ليك جايين يعني راهم جايين

السرغينية:أخاااايت عليا ويكون بصح ونتهنا منك

حليمة:ياكي أ مي كتقوليها ليا فوجهي عاين باين

السرغينية:زيدي عليا تبقاي تغبني ليا تماك
__________

داز الوقت و كانو جالسين مجمعين كاملين بيهم على الطبلة كيتسناو فهاذ خطيب الغفلة لي جاي بهاذ الخطفة من لعربي وعيالاتو تا للقشلة د ولادو كولهم دايرين بالطبلة لي محطوط فوق منها الحلاوي د الدار شمنك يا فقاص شمنك يا غريبة شمنك يا حلوة ريشبوند و حداها واحد براد أتاي مشحر و منعنع و عاد زيد الكيك..لعربي غير كيدور ويشوف فجنابو معرفهم فين كانو خازنين هاذ الخير..وحداه يزة مجمعة مع السعدية وعاطينها للسريط والمريط كمشو النص د الحلوة لي فالطبسيل ودازو فيه قاداو أتاي و دوزوها هاكاك..و وسط منهوم جالسة حليمة لي مقاداها الدنيا هذا هو النهار الكبير عندها فاش غتخطب بحسينة معشوقها..سالاو من الطوطيح فالزناقي دبا دازو لمعقول..لي معرط واش غيكمل ولا لا..حليمة غير سايرة وتفرنس كي شي هبلة لابسة قفطان بيض ولاوية تارازة فوق راسها لي گاع درورها دارتهم باش تبين شعرها كثير و طويل و متبينش بلي هي قرعة..عايشة فالأحلام تا محسات غير بواحد القرصة طلعات مع فخضها

السرغينية:تبتي أ بنت الحرام تبتي باراكا من الطيران بغيتي تشوهينا فأخر زمان مع مليكة المخنفرة تقول عليك خفيفة أ تبتي ولا نجمعها مع بوك

شدات فبلاصة القرصة وبرداتها أصلاً هاكا مها ديما مرحماها عليها..

لعربي:نعام أ بوك أش بغيتو عند بوها

السرغينية:غتسكت إييه لا ؟

معاودش معاها الهضرة شد الصقلة وريح عضامو..

لعربي:أتبارك الله على عيالاتي المحزمات الله يعطيكم الصحة..