العربي وعيالاتو🎻مكتملة🎻

🎻الجزء 63🎻

قصة؛🎻لعربي وعيالاتو🎻
  بقلمي:أناستازيا
        الجزء:63

شافت فيه السرغينية ميقات و دورات وجهها..شوية تيسمعو الدق على الباب..جمعات النوضة السرغينية هي اللولة وتبعها لعربي كيتحنطل..حلو الباب..وبدات السرغينية بالصلا و السلام و الزغاريد كيتسمعو تا لراس ديل الدرب...

كيلقاو حسينة هاز حبق فيديه وماشط شعرو لي  خفيف فجيهة وحدة لابس كومبلي بالكرافاطا ديالو باين عليه من عام الفيل والتحت لابس سروال قندريسي مع بلغة و حال فمو غير كيضحك..و هو نصو رايب ونص لاخر شاد فالسارية عل الله..

وفجنبو واقفة مو لي هازا نيفها لسما عليها مسميينها المخنفرة وعاقداها عقدة الخيط..لابسة تكشيطة فالكحل مكحلاها عليهوم..غير بسمو الباب دخلت كتمختر وولدها حسينة وراها تابعها ويكركر..

أما غير شاف حليمة لي تاهيا شرعات فمها منين شافتو..طيح الحبق لي فيديه تا تدفق التراب فالأرض..حل فمو حتا سال ريقو..وتمشا غادي جيهتها كي المهبول غير وصل جلس حداها وبزربة جبد مشطة د درهم من جيبو ليمن دار شوية د الدفال فيديه دهن راسو بيه ومشط شعرو فجيهة وحدة وشاف فيها تا يضحك و راسو غير تيلعب..

حسينة:حلومة..حلومتي

من بعد سكات تكلمات حليمة بصوت رقيق

حليمة:حسينة

غير سمع صوتها شد على قلبو وغمض عينيه عاض ف شنافتو..

حسينة:الله على حسينة كي خرجات من فم العسل اللللله

ماحس براسو تا غمض عينيه مخرج فمو على شكل بوسة باغي يبوسها..

شافو لعربي وخرج عينيه فيه..

لعربي:ويل الحرامي ويلو ويلو

مشا لعربي تيجري تيقلب على باش يشير عليه بان ليه غير الحبق لي كان مرمي فالأرض هزو وسيفطو ليه مبوط ليه الراس تا خلاه شاد على راسو بدماياتو نازلين..