العربي وعيالاتو🎻مكتملة🎻

🎻الجزء 32🎻

قصة؛🎻لعربي وعيالاتو🎻
  بقلمي:أناستازيا
                    الجزء:32

ما عليهوم مابيهوم مجمعين على واحد كاس ت أتاي و مقابلين مع واحد الشريجم صغير مقابل مع الغادية و الجاية وشادينها فالحتيث ها هاذي دارت ها هاذي فعلت

السرغينية:شتي مينة مرت العسكري قالك شرات واحد القزديرة كتمشي و تجي

يزة:أو على وصلو تا لقزديرة تمشي و تجي

زوبيدة:أيييه و على ما فراسي وصلو لقزديرة كطير فالسما

يزة:واهلي واهلي واهلي تا معرفت كي تا يدرو لهادشي و منين تيجيبو داك العقل

زوبيدة:قالك عندهم واحد راجل ديل الذهب لي حطيتي ليه كيقادها ليك

السرغينية:ديل الذهب فكرتوني شحال مدزت عند داك الذهايبي نشوف الجديد مكرهت شي خويتمات شي سناسل شي مظام شي حوالق إوا و نسينا راسنا

زوبيدة:أنا على بالي تاخدي ليك شي مظمة معمرة و محجرة تجيك مع تكشيطتك الخضرة أ تجي كتفتن

السرغينية:مكرهت نيت شي مظمة كيف قلتي نيت خاصاني مظمة لديك التكشيطة خيطناها بالثمن و ماتنفعنا بيها

شوية تمات جاية حليمة جيهة مها..

حليمة:مي أنا أنخرج مع زينب أنمشيو لسويقة ندورو

السرغينية:دورو أ لآلة معيتوش من الضوران و دوك الزرابي المنشورين فالسطاح شكون أيشتف عليهوم أنا والسطح لي عام مقاصو الما شكون أيصيقو و اللحوفة لي لوسخ غيخرج منهم شكون أيصبنهم أنا فبلاصتك نحشم نقول أنخرج

حليمة (سلتات حوايجها و هزاتهم معاها زعفانة):صافي مابقيت خارجة صافي (و طلعات مدردربة مع السطح)

السرغينية:وبقاي دوري ليا تما بلاخدمة أنا شوية طالعة نشوف الزرابي لي شتفتي عليهوم و الحوايج لي صبنتيهم و السطح لي صيقتيه أ بنت السرغينية

______________________
توقعاتكم  البنااات⁦❤️⁩⁦❤️⁩⁦❤️⁩