LET IT SNOW (بالدارجة المغربية)

لذة محرمة (01)

غادي على بيكالتو بالشوية عليه ، ضارب طريق طويلة و الشتا مخلية الارض فازݣة و كاتزلق ، ما عندو ما يدير بالسرعة دابا ، غادي يجيبها غير فضلوعو ، حتى المنظر لي قدام عنيه مخليه مستمتع شوية ، وسط حي فيه غير الفيلات ، سهات رهيب و الخضورة فكل مكان ، بالرغم من انو فصل الشتاء والبرد و الخريف هشم الشجر قبل منو ، ما تأتروش الجرادي ديال هاد الحي ، عندهم لي يقابلهم و لي يهتم بيهم .

و هو ساهي ما عرفش كيفاش حتى خرجات قدامو ، زير على الفران و لكن ما شدش ليه ، هرب من قدامها و اختل توازنو باش يكمل الموضوع هو طايح فالارض ببيكالتو و هي مرشوشة بالما .

علات شعرها لي نزل على عينيها و بانو حجبانها معقودين ، العوينات زورق و من نظرتها باينة عافية ما كاتفاكش ، نطقات بصوت عالي و نبرة معصبة ..

... : واش نتا عور ؟

تنهد و هو مستلقي على الارض و حوايجو دغيا فزݣو .. حل عينيه ، حاس بعظامو دكدكو ، شد حيلو و وقف على رجليه . وقف بيكالتو بجنبو كايشوف واش وقعات ليها شي حاجة ، لقا السنسلة ديالها طاحت ...

... : راه معاك كانهضر ! واش صمك

شاف فيها بنظرة حادة و بلع ريقو ... نطق بهدوء قادر يتحكم فأعصابو و يتعامل مع برهوشة بحالها .

... : نتي لاباس ؟
... : (زيرات على سنانها) شوف كي رديتني ! و لا عور حتى هي ؟
... : (تبسم ليها ببرود) سال الدم ؟ لا ؟ فزݣتي باينة داركم قريبة سيري بدلي و مريضنا ما عندو باس .
... : و ليني راك واحد الهمجي ما منكش جوج

نخلها و دار جار بيكالتو وراه ما مكملش معاها الهضرة و كايسمعها وراه كاتغوت ..

... : على الاقل ، تأسف ، همجي متخلف كي داير .. اعععع

وقفات وراها سيارة رونج سوداء ، و نزل منها واحد طويل و كتافو عراض ، بيض و حروفو كحلين ، وسيم و عندو حقو فالزين .. نطق بسميتها الشي لي خلاها تدور عندو و هي عاقدة حجبانها و منزلة شفتها السفلية ..

... : ميسان !
ميسان : (نطقات بطفولية) عثماان .
عثمان : مال حبك ، صابحة تغبني ! ياك لاباس ؟
ميسان : رشني ! (دارت تشير فيه كان غبر ليه الاثر ، تنهدات و عاود شافت فيه) واحد الحم**ار رشني !
عثمان : (شدها من وذنيها) اهيا ، زيري
ميسان : (تنترات منو) اش جيتي دير هنا بعدا ؟ بهاء باقي ما رجع !
عثمان : عارف !
ميسان : ايوا ؟
عثمان : سوقك ؟ اش كاديري هنا ؟ غادية لشي بلاصة
ميسان : (ردات شعرها ورا وذنها و نطقات منتشية بالانتصار قبل ما تنالو) سوقك !
عثمان : (لعب ليها فشعرها خبلو ليها) هاي هاي على البرهوشة ، تقاد القب مع السطل .