LET IT SNOW (بالدارجة المغربية)

(02)

نفات براسها و شدات ليه فيديه باش يتهدن ..

هادية : لا لا انا لي فسخت و ماشي بسبب والديه .. و علاش غاديين يعارضو ما يلقاوش حسن مننا ا بابا !
سعيد : (تنهد و منين ما قالتش ليه علاش ما بغاش يعاود يسولها يحرجها) و نتي مرتاحة ؟
هادية : شوية ! مع الوقت غادي نزيد نرتاح .. ما تهزش همي
سعيد : و الله يدير ليك لي فيها الخير ، يمشي واحد و يتمناوك الف ، الخير فيما اختاره الله
هادية : (باست يديه) لهلا يخطيك عليا .. (باست جبهتو) ياله خليت ليك الراحة دابا نمشي نوجد الفطور (حكات كرشها) نعتق الروح جعت .. (جات خارجة و عاود شافت فيه) بابا عفاك ما تقول والو لعمتي حاليا واخا ؟
سعيد : (غمض عينيه و فتحهم ببطء) ان شاء الله

خرجات من البيت و دخلات سدات عليها فالكوزينة ... كاتحاول تلهي راسها و هي كاتوجد فالشهيوات ... ما عالم بحالها غير ربي ، و لكن على فمها غير الحمدلله على كل حال .

فاقو على ريحة القهوة معطرة و السميدة محمرة ... تبسمات ساندية فنفسها كاتقول هادي هي هادية لي ما كاتقهرها حتى حاجة ... نوضات ريا باش تمشي تقرا ... و جمعات الصالة ، ردات كل حاجة لبلاصتها و مشات دقات على حبيب لي غادي يبدا يدوز للامتحانات فالعشية و عاد قصداتها ، صبحات عليها و عنقاتها مزيرة عليها و مفتخرة بيها ..

ساندية : يا صباح الهدوء و الروقان
هادية : صباح الخيرات .. (شافت فالصينية) فيقتيهم ؟
ساندية : ايوة .. (خدات من عندها الصينية) انا نديها ..

هزات الصينية لي كانت موجدة و خرجاتها قاداتها فوق الطبلة ... فطرو مجموعين و كلهم كايحاولو ما يجبدوش الهضرة على الموضوع ، كايحاولو يتصرفو عادي ..

تعاونو و جمعو الطبلة ، دخلات ريا هزات الصاك ديالها و خرجات لقات هادية واقفة عند الباب و لابسة المونطو ديالها

هادية : ياله ياله نوصلك بلا ما تمحني فالطوبيس اليوم .. (غوتات) حبيب ندوز للافاك دابا ؟
حبيب : لا غير بلاش ، تا يوصل الوقت و نمشي ببيكالتي
هادية : تمام ، ساندية و ياله نحطك فخدمتك الصحيبة
ساندية : (خارجة و فيديها لاتروس ديال الماكياج ديالها كاتقاد وجهها بلا مراية) جيييت

خرجو و هوما كايضحكو على ساندية و الثقالة لي فيها ديما كاتلا بيها هاكا .. ركبو فالسيارة بثلاتة و رابعهم لوكا بغات تديه هادية تلعب معاه فالغابة ...

ساندية : عرفتيو كانحماق على ديسمبر ، الجو ديالو واخا كئيب كايعجبني
هادية : زوين ايلا طاح الثلج
ساندية : ان شاء الله علاش لا
هادية : (تنهدات) على الله هاد العام نشوفوه

كملو طريقهم كايتهاودو فكاع المواضيع الا موضوع الساعة .. وصلو ريا للفاك و هي توقفها هادية كاتوصي فيها ..

هادية : ايلا حتاجيتي شي حاجة عيطي فالفيكس و لا عند ساندية غادي تخرج ليوم بكري ..
ريا : مال تلفونك ؟
هادية : طافي .
ريا : اوك ان شاء الله ..

توادعات معاهم و كملو طريقهم ، حطات ساندية حتى هي و مشات قاصدة الغابة .. تماك فين خرجات طاقتها مع لوكا هو يجري و هي تجري حتى تهدات و جهدها تسالا ، طاحت للارض على ركابيها فبلاصة خالية نوعا ما و وقف حداها لوكا ... كايمسح راسو فيها مهتم لحالتها ، كايشوفها فشلانة و كاتبكي بحرقة و بصوت مسموع عكس شهقاتها لي كانت كاتماهم وسط الدار ..

كاينبح و يمسح راسو مع راسها ، و يعاود يشوف فيها لا زعما اهتمات ليه ... قلش وذنيه و هز راسو بترقب و هو كايشوف فالناحية لي عاطية ليها هادية بالظهر حيت سمع الحس ... غير شافو الشخص لاخور برد ليه الما فالركابي و وقف جامد فبلاصتو ، خصوصا منين ما شافش السنسلة ديالو ..
لوكا لمح الخوف فعينيه و زاد مستمر فتهديدو ، كاينبح و يعري على نيابو ، خلاه ما عارفش واش يكمل طريقو و لا يقلب الدورة ..

... : و واش نتي لاباس ؟

مسحات دموعها بالخف و تنهدات ، هزات راسها و ردات شعرها بيديها من على عينيها كاتشوف فالشخص المتكلم ...

هادية : نعم ! (دوزات يديها على لوكا حيت قوا فالنبيح ديالو)
... : ما يكون عندك باس و كلشي كايفوت و لكن شدي الكلب ديالك ..
هادية : (هزات يديها وراتو بلي راه السنسلة فيديها) م ما تخافش غير دوز ما عندو ما يدير ليك اخويا .. (دوزات يديها على راسو) حنين و الله حتى حنين ..
... : لا باينة غير من نيابو
هادية : واقلة عندك فوبيا من الكلاب داكشي لاش ..
... : (بعجرفة) ا انا لا طبعا
هادية : متأكد ! لوكا ، سير عندو
... : (غوت) لاااا

شدات على كرشها و بقات تضحك حتى دمعو عينيها ، تحبسات فيها النفس و زراقت و كاتلوا غير بوحدها ..

... : (ما حاملش الموقف لي حط فيه راسو) عنداك تموتي

جمعات شعرها حيت حسات براسها زندات و تنهدات كاتحاول ترد تنفسها طبيعي ...

... : كلبك راه مفترس
هادية : لا و الله ايلا ضريف غير كايبغي يحميني ...
... : الله يخليه ليك ، غير قصري ليه السنسلة نكمل طريقي و شكرا
هادية : (دارت اش قال) تفضل ..

زاد من حداها و شي حاضي شي ... تخطاها ببضع خطوات و دارت معاها بعينيها ، تبسمات و نطقات بصوت مجهد ..

هادية : شكرا .. شكرا بزاف و الله .