#الفـــصــل_التالث : #دعيها_تثلج
#Let_It_Snow ❄️
#🅂🄰🄵🄸🅈🄰_🄽🄰🄶🄰🅃 🔏
#𝓘𝓻𝓲𝓼
كاين حاجات كبر من شكرا، و حاجات ما كاتجبرهمش سمحلي...
كاين كذبة ما كاتغفرش و لحظة ما كاتنساش ...
كاين نظرة بردات القلب، و جرح ما براوهش الايام ..
كاين و كاين .... وكاين بزاف ديال الخوف فكانبغيك .
|•°• love is beautiful kind of fear .•°•|
واقفة قدام المرايا كاتقاد ماكياج خفيف بالزربة، ما بقاش ليها بزاف باش يبدا الشو .... مضغوطة بزاف هاد الايام خصوصا و انو عرس ريا ما بقا ليه والو ، سيمانة و ها هي ختها ولات فعنق راجل اختارو قلبها .. غا يتزوجو و يتجمعو تحت سقف واحد، بقد ما هي فرحانة ، بقد ما مخنوقة والدموع واقفين فالباب ... ما ساخياش بيها و ما قاداش على فراقها ...
الوقت كايطير جوج سيمانات حساتهم يومين، وهي خايدة تخمم فهادي و توجد هاديك ، ما لاغا حتى حاجة تكون ناقصة، عرسها بغاتو يكون كامل مكمول، كبير و فيه بزاف ديال الناس، القريب و البعيد، الصغير و الكبير، ولي ما فرح يتفقص.
تبسمات وهي كاتخمم فهاد التفاصيل لي غا يبقاو غير تعاويد ورا الليلة الموعودة و غمزات انعكاسها لي غلى المرايا .
هادية : الله يدوز كلشي على خير و بيخير ، (غمضات عينيها و تنهدات) وراها جايا نوبتك ا هادية !
بلعات ريقها و دارت كاتشوف فشكون فتح الباب عليها ... كانت ساندية لي جات كاطلل قبل ما ترجع بحالها لدارها .
منين بداو يوجدو وهي قاسمة راسها بين دارها و دارها الثانية .... ما مخلياش هادية بوحدها طبعا، وما مخلياش من جهدها ... و واخا الحمل ثقيل على ظهرها ما مقصراش مخلية الامور تحت السيطرة وكلشي مضبوط ... خصوصا وبالرغم من انو جوج سيمانات ماشي وقت طويل قدرات تتأقلم مع عادات ارون وجيلان و تولف على طباعهم بجوج .... على امل يفوت العرس و روينتو و دور لشغالها تشوف اش فاتها، غفلات عليه من نهار تزوجات، كاتمشي مرة فالسيمانة ولا جوج طلل ولا تسني باش يجيبو ليها سطوك جديد وصافي ... اما ما عارفاش شنو ممكن يكونو دايرين ليها البنات لي مخلياهم بلاصتها .
ساندية : وسربي ما بقا والو !
هادية : كملت .. (تبسمات و شدات فيديها) شربتي دواك ؟
ساندية : (هزهزات راسها) اكيد .. باقي خاص شي حاجة ؟
هادية : اليوم لا... حتى نرجع و نقولك بروغرام غذا !
ساندية : (هزهزات راسها) تمام !
عنقاتها مزيرة عليها و خرجات من البيت ... جلسات قدام الباب كاتلبس البروطكان ديالها... حتى كايسمعو شي حاجة طاحت فالكوزينة .
طارو لعندها بجوجهم و قلبهم غادي يخرج من بلاصتو بقوة الخلعة ... بانت ليهم ريا واقفة جامدة و البراد ديال اتاي طايح فللارض و مهروق ....
هادية : اويلي ! تقاسيتي ؟
شافت فيهم وهي كاترعد، بلعات ريقها و حركات راسها يمين و شمال كاتنفي .
أنت تقرأ
LET IT SNOW (بالدارجة المغربية)
Romance#ممنوع_النشر 🔏 •°• #Let_it_Snow •°• •Love is a beautiful kind of fear• بقلم : ❀⁂𝑺𝒂𝒇𝒊𝒚𝒂 𝑵𝒂𝒈𝒂𝒕⁂ صفية نݣات ⁂❀ ...
