#الفـــصــل_الأول : #لذة_محرمة
#Let_It_Snow ❄️
#𝓘𝓻𝓲𝓼
تنهدات و كملات كلامها على كبدتها لي سمحات فيها ، لظروف ، لاسباب ، و لكن رغم كلشي حتى حاجة ما كاتغفر ليها ...
هاينة : و ريا من صغرها باين ما غاديش تسمح لي ، اقصح وحدة شفتها فحياتي هي ريا ، من و هي صغيرة العناد و الغنان لي فيها بوحدو ، حتى انو دغيا كاتعصب و ماشي ساهل تراضيها ... (بلعات ريقها و خرحات شهقة عاد كملات شنو فخاطرها) حبيب ما عرفتش ، خليتو صغير موحال حتى واش عاقل عليا .. و لكن الدنيا صغيرة بزاف ، تخايل غير قبل ساعة كان واقف قدام الباب و عثمان باغي ريا .. شنو مزال كثر من هادشي ..
ابراهيم : (طبطب على يديها) ايلا عرفو اسبابك غادي يعذروك ..
هاينة : (نفات براسها متحصرة) حتى حاجة ما تشفع .. نموت و ما نسمحش فيهم ، و لكن انا درتها .
ابراهيم : لي وقع وقع و ربي كبير قادر يحيد الكره من قلبهم و يحط بلاصتو حب ، قادر يبدل الاحوال للافضل ، اهم شي نتي خلي ايمانك قوي و المسامح كريم !
هاينة : ايييه الحاج (دوزات يديها على قلبها) العافية شعلات ...
ابراهيم : دابا تطفا ، ما تهزيهاش منين ثقالت
هاينة : لا الاه الا الله ...
تندق فالباب و دخل بهاء لعندهم ما عاطياهش خاطرو يخليها و هو عارف ما راهاش هي هاديك ... تمشا ناحيتها و قرد شاد فيديها ، طبع قبلة عليهم و شاف فعينيها كيفاش مدمعين تزير عليه قلبو ...
بهاء : مال حنانتي ! هادشي كامل ما ساخياش !
هانية : و انا ساهلة عليا ؟
بهاء : و لكن ياك نتي لي كنتي باغاه يتزوج
هانية : جاني على غفلة و صافي
بهاء : (غمزها) و نتي شكون بحالك غادي تخوا عليك الدنيا و تبقاي نتي و الحاج الراس فالراس
هانية : (تبسمات زز منها) الله يسمخك
بهاء : هكاك ضحكي و فرحي و زغرتي ... ما يجيش معاك البكا
حطات يديها على وذنيها و طلقاتها بتزغريتة حارة حتى تبورشو و هي عينيها زادو دمعو ...
هاينة : هاه ! هاكا مزيان !
بهاء : (باس يديها ثاني) فوق السلك
هاينة : (شدات ذقنو بصباعها و شافت فيه بعيون دامعة) العقبة ليك ، نفرح بيك و بميسان حتى هي ! (تنهدات و ربي لي عالم بيها)
بهاء : قريب ان شاء الله ، ايلا قدرتي تقنعي الحاج يخلصني على عشر سنين مسبقا من غذا نمشيو نخطبو
ابراهيم : (باستهزاء) الله اودي .. اليوم قبل من غذا !
هاينة : حتى نتا عوال !
بهاء : و شنو ! الزواج راه نص الدين
ابراهيم : و على نتا شاد فالدين ! بلا ما تخليني نبدا ليك ... هاي هاي هاي الرباعة ديال السكايرية شادين فالدين غا الزواج و التعدد ..
بهاء : لا المرا عندي كاتغير ما عزيزش عليها الحاجة المشروكة ...
هاينة : و شكون هاد سعيدة الحظ ؟
ابراهيم : لاواه الزعتر ، سعيدة قالك ! تكذبيش ا هاينة ، قولي يكون ليها فالعوان ، قولي الله يحفظ ليها عقلها و تقلب عليه قبل ما تزطم .. قولي مسكينة .. شمن سعيدة
بهاء : با غير غيران و السلام ! (غمز هاينة) غادي نعرفك عليها قريب ... غادي تحبيها و غادي تفرحي بيها . حيت حبابة ، ضريفة ، بعقلها
ابراهيم : ايه باين العربون ! غا منين شافت فيك هي مولاتهم فالعقل ..
بهاء : (علا حجبانو منخل الهضرة ديال باه و جهد فصوتو شوية) غادي تعجبك ايما ثيقي بيا ..
ابراهيم : زعما ما كاتفلاش ؟.
بهاء : واش هادشي فيه التفلية . ما كنتش غادي نقول و لكن منين بانت ليا باغا تشوفني عريس حتى انا هاني طمنها .. انا كانفكر فالموضوع جديا و خدام عليه .
ابراهيم : العجب ! و الله ايلا العجب ، من واحد ما باغي يخدم حيت ما قاد على المسؤولية ديال مخو ، لواحد باغي يدير دارو ! و فشهر واحد بان المفعول ، شي مجمر هذا
بهاء : ايه حيت عندي مال قارون ! ويلي كون شفتي الحاج عاطيني البطاقة لي بلا حدود فالرصيد ... (تبسم و هو كايخمم فيها كيما عادتو) ما كايهمها لا مال لا جاه ... (شاف فهاينة) بحال حنانتي ...
هاينة : و الله يتاوي اللامة ابني .
بهاء : امين (باس يديها) و نعلي الشيطان و خرجي باركي ليه و نصحيه ... نتي عارفة ما خدا هاد القرار حتى هو ايلا و راه طايح بالمعقول .. و حتى البنت بنت عائلة ، (بهمس) صحيح هي عصبية شوية و هو ما كايبغيش يعتارف و لكن فنة ، قلبا و قالبا ...
هاينة : تلاقتيها !؟
بهاء : مزال و لكن سامع عليها بزاااااف .
هاينة : (تنهدات) الله يدير شي مسلك د الخير
بهاء : امين (ناض واقف و هو يشد فركابيه ليه تحصر فيهم الدم ... ) ياودي ياودي على الشباب الذي يا ليته يعود يوما ، شرفت الحاج خاصني نشد لانتريت
ابراهيم : غا ديال لي يخليك تشد فالبولة تسعين و يزيد مع الطريق
بهاء : على عنيف ، الله يحضر السلامة ... تعرف تواسي غا مرتك .. اسيدي باااز
ابراهيم : (ناض بعكازو قاصدو و هو يهرب ليه) لا ما تحشمش ، زيد نرفس حبك
بهاء : باقي باغي نتزوج ..
ابراهيم : مشي لا نجي نن !
ميسان : (دقات و دخلات عندهم) و شنو كاديرو هنا ! خليتوني مع عثمان و الشيطان ثالتنا عيب !
ابراهيم : هاديك ، (ضحك كي شي حمق) قضا لي الله الغراض .
ميسان : (بلعات ريقها) و الله ا بابا ايلا عند بالي راك فالبيرو ! الله يسامح
بهاء : هاح ، بغيت كسكسو بالتفاية فالݣنازة انا مزاوك ..
أنت تقرأ
LET IT SNOW (بالدارجة المغربية)
Romance#ممنوع_النشر 🔏 •°• #Let_it_Snow •°• •Love is a beautiful kind of fear• بقلم : ❀⁂𝑺𝒂𝒇𝒊𝒚𝒂 𝑵𝒂𝒈𝒂𝒕⁂ صفية نݣات ⁂❀ ...
