#الفـــصــل_التالث : #دعيها_تثلج
#Let_It_Snow ❄️
#🅂🄰🄵🄸🅈🄰_🄽🄰🄶🄰🅃 🔏
#𝓘𝓻𝓲𝓼
لوهلة قالت بلي نعس .. حيت موالف يرتاح على يديها و ينعس و لكن منين ركزات الشوفة فكرشو .. تقطع فيها النفس و دموعها بظاو ينزلو من عينيها اكثر كيف الشتا خيط من السما ...
هادية : لوكا ! لوكا .. فيق عفاك ! (شهقات) لوكا مازال الحال .
جمعات رجليها لعندها و حطات راسها وسط منهم تبكي و تقول ما عييت، و كيتو فقلبها قداش، ماشي غير حيت حيو*ان صافي، كان اقرب من انو ولدها جابتو باش يرد عليهم الهيبة منين مرض باها و ما يقدر يقرب ليهم حتى حد .. و شوية بشوية ولا فرد من العائلة، دوز معاهم سنين طويلة .. ودار على قبلهم بزاف، غادي تكون ناكرة للجميل ايلا ما بكاتش عليه و ما حزناتش .
كان سبب شحال من حاجة خايبة صدها عليها ، و شحال من حاجة زوينة لاقاها بيها، كون ما لوكا ما كانوش غادي يتلاقاو هي وبهاء ولا غادي يتعارفو بديك الطريقة ... خلا بصمتو فكاع مراحل حياتها من نهار جا و ولا عايش معاها حتى لهاد النهار لي ودع فيه.
بقات على ديك الحال كاتسترجع ذكرياتهم معاه حتى صبح الصباح و شرقات الشمس .. و صونا التلفون باش ريا تنوض ...
حلات عويناتها وسط البيت و الفرحة ما سايعاهاش ... دارت على يمينها فين كاتنعس هادية ما لقاتهاش ...ظنات تكون فالحمام داكشي علاش بقات فبلاصتها كاتسنى ..
ريا : وا هادية واش باقا معطلة ؟
وقفات لبسات صندالتها و مشات كادق فالباب ... ومنين ما لقات حتى جواب فتحات و دخلات وهي مستغربة من اختفاءها
قضات اغراضها و خرجات لبسات حوايجها عاد باش خرجات من البيت ...
ريا : هادية ؟
فتح حبيب باب بيتو حتى هو وخرج قارن حجبانو ...
ريا : صباح الخير !
حبيب : لوكا كاع ما نبح هاد الصبح ياك؟
ريا : (بعدم فهم) هممم ؟
ضرب فيها و مشا قاصد البالكون لقا هادية باقا فبلاصتها و الدموع ناشفين على خدها كاتشوف بعيد، وغير حسات بالحس دارت شافت فيه هو اللول .. عند بالها فاق ولكن خاب املها ، شافت فحبيب و نطقات وهي كاترعد .
هادية : م مات.
تكا على الباب ديال البالكون وهو مغمض عينيه شاد البكية .. فحين ريا غا سمعاتها فشلو عليها ركابيها ... نزلات للارض و شدات على فمها كاتمة شهقتها .
هادية : مات الحبيب ديالي ، مشا .. (دوزات يديها عليه) مشا صافي
ريا : ياكما غير ناعس ! ختي تأكدي مزيان ..
هادية : من قبايلة وانا كانتسناه يفيق ... (شافت فحبيب) لبس حوايجك نمشيو ندفنوه
ريا : خلينا نتسناو
حبيب : غادي تبدا تعطي الريحة و الصهد هذا ... (مسح دمعة يتيمة نقزات من عينيه) ياله نمشيو دابا .
ريا : و خليوني نعنقو بعدا ...
أنت تقرأ
LET IT SNOW (بالدارجة المغربية)
Romantik#ممنوع_النشر 🔏 •°• #Let_it_Snow •°• •Love is a beautiful kind of fear• بقلم : ❀⁂𝑺𝒂𝒇𝒊𝒚𝒂 𝑵𝒂𝒈𝒂𝒕⁂ صفية نݣات ⁂❀ ...
