#الفـــصــل_التالث : #دعيها_تثلج
#Let_It_Snow ❄️
#🅂🄰🄵🄸🅈🄰_🄽🄰🄶🄰🅃 🔏
#𝓘𝓻𝓲𝓼
فتح ليها الباب باش تطلع فالسيارة و هي توقف صافنة و مصدومة نوعا ما من لي كاتشوفو عينيها ... بقا واقف كايشوف فيها ما عرف مالها ، سولها من باب الاطمئنان :
مهدي : مدام ! ياك لاباس ؟
زيرا : (شافت فيه و تعطلات باش وصلها السؤال) همم ! نعم ؟
مهدي : نمشيو ؟
زيرا : (هزهزات راسها) ن ن نمشيو ...
ركبات فالسيارة و سد عليها الباب و هي كاترعد ، ما متيقاش بلي هذاك هو ... بينما مهدي طلع مكان السائق و نطق ..
مهدي : صراحة شرف لينا منين جيتي هاد النهار و حتى هادية من الموظفين عندنا لي وازنة و زايدة من الثقة ديال الناس فينا .
زيرا : (تبسمات ليه) الله اودي ، الحاج كان عزيز عليه الناس لي خدامين عندو ... و واخا مشا ما كاين حتى حاجة تبدل هادشي ... منين سالا حق الله انا غادي ندور نتكلف بشغلو ...
مهدي : خبار زوينة هادي ...
زيرا : (حنحنات)ايلا قولي هاد هادية ...
مهدي : (سكتات مخلياه هو يفهم و يبدا يعاود ليها عليها) هادية من الناس لي تبارك الله عليهم ، الخدمة المتقونة ، و صراحة هي مكسب لينا ... من بعد ما انساجمات مع الطاقم لي وظفتها معاهم، بقاتش غير كاتسجل ، ولات كاتعاون حتى فالترجمة ... و هادشي راد بالنفع علينا ... كاتبغي خدمتها بلا قياس، عزيزة عليها و كيما سبق ليا و قلت الخدمة المتقونة ... و صراحة انا فرحان لي قبلات تخدم مع الاستديو ديالنا ...
زيرا : (هزهزات راسها) همم قولي السيدة سبع صنايع !
مهدي : (تبسم ليها من خلال المراية القدامية) داكشي ، تحط يديها فالما طلعها عامرة ذهب.
زيرا : مزيان !
مهدي : و ما عرفتش واش لاحظتي و لا لا ، و لكن راه نسب المشاهدة ديال البرامج لي دبلجات هي اعلى من لي قبلها ... سميتها بزاف ديال الناس كايثيقو فيها
زيرا : هممم ربح لينا يعني هذا سبب اخور ما خاصش نفرطو فيه.
مهدي : اكيد ، داكشي علاش قدمنا ليها عرض زوين واخا العقد لي سانية معانا لصالحنا كثر ما هو لصالحها ... (تنهد) كانقول بلي كون ما كانتش ثايقة فراسها ما كانتش غادي تسني عليه .... و هي ما محتاجاش ..
زيرا : كيفاش ما محتاجاش ؟ و علاش عندها هاد القاعدة الجماهرية الكبيرة ، بنت من هي !
مهدي : هي بنت عادية ، كبرات فعائلة عادية ، و حتى باباها مات وقت موت الحاج الله يرحمهم اجمعين ، هادشي اكتاسباتو من بعد ما بدات فالراديو ، و زادت مؤخرا منين فضحات خطيبها على المباشر بلي خا*نها و جرا عليها مدير الاذاعة لي كانت خدامة معاهم ... الناس تعاطفو معاها بشكل كبير و صافي تقدمو ليها فرص ما حسن و قدرات تتبت بلي هي تستاهل ما كثر و ها هي دابا خدامة مزيان و غير الصالير لي كاتشد مع الاذاعة يغنيها ..
زيرا : (هزهزات راسها باستيعاب) مزيان ، الله يزيدها
مهدي : هذا ما كان ...
**
صونا فالباب و وقف كايتسنا ... غير سمع نبيح لوكا شد على قلبو و التبوريشة سرات فداتو كاملة ... نطق بهمس و هو كايشوف فالارض ...
أنت تقرأ
LET IT SNOW (بالدارجة المغربية)
Любовные романы#ممنوع_النشر 🔏 •°• #Let_it_Snow •°• •Love is a beautiful kind of fear• بقلم : ❀⁂𝑺𝒂𝒇𝒊𝒚𝒂 𝑵𝒂𝒈𝒂𝒕⁂ صفية نݣات ⁂❀ ...
