#الفـــصــل_التالث : #دعيها_تثلج
#Let_It_Snow ❄️
#🅂🄰🄵🄸🅈🄰_🄽🄰🄶🄰🅃 🔏
#𝓘𝓻𝓲𝓼
شافت فيه وهي ما فاهماش، كيفاش ما مقلقش منك؟ واش كاين شي حد غادي تعاملي معاه هكاك و تخليه ما عارف راسو من رجليه و يجيه الامر عادي، ما ياخد موقف، ما يتعصب ما يشك ؟
صغرات عينيها وراسها فيه زوبعة ديال الاسئلة، اللسان لي تقلب بيه على الأجوبة فشل عليها، ما فهماتش واش ديال بالصح كايعني هضرتو ولا ورا هاد الهضرة شي حاجة لي تقدر تصدمها و تزيد على ما بيها .
عثمان : مالك ؟
سؤالو بحال ايلا خرجها من ديك الدوامة لي كانت فيها، حتى كانت قادات الافكار فراسها و واجدة باش تهضر معاه و تقول اش عندها وهو يخربق ليها كلشي، تمتمات وعاود سكتات لوهلة خدات فيها نفس و عاد دارت لعندو ثاني .
ريا : و ولكن كيفاش ما مقلقش ؟
عثمان : علاش غادي نتقلق ؟
ريا : كون كنتي ما مقلقش كنتي غادي تعيط ليا لبارح فالليل قبل ما تنعس !
عثمان : فكرت انو تقدري تكوني باغا وقت مع راسك بلا ما نزيد نضغط عليك وصافي.. فالاول ما كنتش فاهم، وغير مستغرب (خرج عينيه كايأكد عليها) مستغرب ، ولكن منين رجعت للدار وجلست مع راسي تفكرت شحال من مرة كانكونو انا وياك بوحدنا وكاتبداي ترعدي ... هو باينة فعينيك فرحانة ولكن حتى الخوف كايكون باين فتصرفاتك و حركاتك .. داكشي علاش قلت طبيعي اول مرة تجيك قاصحة وهانية تخافي، اي وحدة قبل عرسها كايكون عليها واحد ضغط نفسي ... حياتها كاملة غادي تقلب ، غادي تفرق عائلتها وتجي تسكن مع واحد ما عرفاتو يصدق ولا يخرج فالصو، وغا تولي عندها مسؤولية كبر من لي كانت عندها .. فطبيعي يجيو بحال هاد النوبات ... (تبسم ليها) وصافي ماتقلقاش .
ريا : د ديال بالصح كاتهضر !
عثمان : (تبسم) مولف نتفلا عليك ؟
ريا : يعني نتا ما شكيتيش فيا ..
عثمان : (قرن حجبانو) فاش غادي نشك ؟ وعلاش ؟ حيت نتي بنت داركم و ما عندكش تجربة ؟
ريا : م ما عرفتش ، قلت تقدر تاخد موقف و تعصب ، قلت يقدر يقول هادي باينة واقعة ليها شي حاجة من قبل .
عثمان : قلتي و قلتي و حتى حاجة من هادشي لي قلتي ما منوش، بحال ايلا ما عمرك عرفتيني؟ ما عمري نشك فيك ... نشوف الحاجة بعيني و نكذبها حيت عارف غير غادي نفهم غلط ..
ريا : (مسحات دميعاتها و هوما فعينيها) عثمان..
عثمان : نعام !
ريا : (تنهدات) كانبغيك ...
عثمان : (شد على قلبو) هاح كي الموسيقى فوذني هاد الكلمة .
ريا : والله حتى راه ما يمكنش هادشي ... عرفتي شحال بقيت كانخمم و نفكر كيفاش نوصل ليك بلي تخلعت ... و ما عرفتش، حيت كاع الطرقان كايديو لنفس الاستنتاج، كون كان شي حد اخور كون راه زمانا سالينا دابا حيت ما غاديش يخمم فيها.
عثمان : (قاطعها) و تهدني، كيفاش واحد اخور ؟ اهيا ..
ريا : (تبسمات) وزعما !
عثمان : زعما راه حنا خلاقينا لبعضياتنا ...
ريا : والله حتى فشكل هادشي، غلطنا فالنمرة صدقنا مزوجين ...
عثمان : هههههه المكتاب .. (خدا يديها باسها) المرة الجاية لي ضراتك قوليها بلا ما تخممي، حيت غادي تلقايني درت ليك اعذار و قنعت راسي بيهم ...
ريا : و واخا !
أنت تقرأ
LET IT SNOW (بالدارجة المغربية)
عاطفية#ممنوع_النشر 🔏 •°• #Let_it_Snow •°• •Love is a beautiful kind of fear• بقلم : ❀⁂𝑺𝒂𝒇𝒊𝒚𝒂 𝑵𝒂𝒈𝒂𝒕⁂ صفية نݣات ⁂❀ ...
