#الفـــصــل_التالث : #دعيها_تثلج
#Let_It_Snow ❄️
#🅂🄰🄵🄸🅈🄰_🄽🄰🄶🄰🅃 🔏
#𝓘𝓻𝓲𝓼
العشية وصلات و صوت ساندية علاين يتبح وريا حلفات لا هي فاقت .... النهار لي دوزو قبل كان مشارجي و عامر ستريس ... وزادت صبحات عليها بكري مشاو للسونطر قادو لاسيغ ... ما سالاو حتى كانت ريا صافي باغا غير تنعس، رجعات كلات ومشات هي هاديك حتى خرجات جيلان من القرايا و جات لعندهم حتى ميسان ...
حلات الباب ووقفات دايرة يديها على نصها ...
ساندية : ريا !
ريا : غير شوية عفاك !
ساندية : و نوضي عثمان راه جا ..
حلات عينيها بالزربة و جلسات كاترمش ...
ريا : ع علاش ؟
ساندية : دابا فقتي .. اختي باز ... نوضي خلاص راه كلنا وجدنا بقيتي غير نتي
ريا : (تنهدات) و واخا ... حتى انا واجدة غير ياله .
ساندية : فين واجدة ؟ خاصك عام باش تلبسي !
ريا : اش غا نلبس ؟
ساندية : القميص راه معلق فالحمام و الشربيل حتى هو ... و خرجي خلاص بلا قوة الفهامات .
ريا : واخا ..
سدات عليها الباب ومشات كاتكمل التوجاد ديال الطيافر لي غادي يديو معاهم للحمام ... كانو دايين جوج ، واحد فيه الورد، الحنة ، السواك ، قويلبات صغار ديال السكر والبيض فزلافة ... بينما الثاني محطوط فيه بينوار العروسة و بانطوفة ديالها مع لاتروس فيها les produits لي كاتستخدم لراسها وذاتها ... منتور عليهم لويزات ديال الذهب و وريقات ديال الورد ...
خرجات لابسة القفطان لي عطاتها ساندية ورادة شعرها ورا وذنيها ... حلات عينيها على وسعهم بمجرد ما شافت شنو موجدين ... قباب ديال الفضة و طاسات موالمينهم ومنقوشين من داكشي .... الطيافر لي الاناقة فايحة منهم ... دورات عينيها لفوق الطبلة ديال الماكلة كان محطوط الشاكوس ديال الحوايج ديالها و حداه سويكشات صغار ديال البنات حتى هوما ...
جيلان : ا اه، وجدتي ؟
ريا : مالكم على هادشي كامل ؟
جيلان : وعلاش حنا ريا عندنا منها بكية !
حطات يديها على كتفها معنقاها وجراتها مدخلاها للصالة ... كانو مقادين ليها بلاصة فالصدر ديالها ... و طالقين البخور وعيساوة ... موجدين ليها الجو من داكشي .
هادية غير شافتها دمعو عينيها ثاني، ولات شلال دموع ، فينما تبان ليها ريا تبكي، قلبها مزير و ما قاداش تفرط فيها، فرحانة ليها ولكن جاتها صعيبة ....
تحنات عندها باست ليها راسها و جرات الكرسي كاتمشط ليها شعرها ....
ساندية : هادية دوينا ؟
هادية : والله حتى غير من فرحتي ...
ساندية : الله يجعل كلشي مبارك ومسعود ...
هادية : امين ..
ريا : (تبسمات) امين. ..
سرحات ليها شعرها وظفراتو ربعة ديال الظفيرات بلا ماتشدهم بلاستيك ... وهاينة شادة قنيت وكاتبكي ... العين بصيرة واليد قصيرة ... هي هنا بصفتها عݣوزتها وماشي مها ... وواخا هكاك كاتقول حال فظل من حال ...
أنت تقرأ
LET IT SNOW (بالدارجة المغربية)
Lãng mạn#ممنوع_النشر 🔏 •°• #Let_it_Snow •°• •Love is a beautiful kind of fear• بقلم : ❀⁂𝑺𝒂𝒇𝒊𝒚𝒂 𝑵𝒂𝒈𝒂𝒕⁂ صفية نݣات ⁂❀ ...
