#الفـــصــل_التالث : #دعيها_تثلج
#Let_It_Snow ❄️
#🅂🄰🄵🄸🅈🄰_🄽🄰🄶🄰🅃 🔏
#𝓘𝓻𝓲𝓼
تبسمات ليه و الحشمة غادي تاكل منها طرف ، موثرها قربو و حركاتو و هضرتو حتى هي ، كل حاجة فيه كاتخليها كاترعد ... جبد من جيبو سنسلتها و قابلها مع عينيها ...
بهاء : خاصها ترجع لمولاتها ...
غير لمحاتها عينيها لمعو ، حيت شي حاجة لي كاتعني ليها بزاف ، كانت كل شوية كاتضرب يديها لعنقها تشد فيها باش تحس بيه قريب ليها و ما كاتلقاهاش كاتزيد الطين بلة ... تبسمات و عاود شافت فيه .. ما قاداش تهضر و لكن عارفة غادي يوصلو داكشي لي هي كاتحس بيه ...
بهاء : نقدر نلبسها ليك ، بحال اول مرة ؟
هادية : (بلعات ريقها و هزهزات راسها بحماس) اهاه ...
قرب لعندها مقابل معاها و دورها على عنقها ، طلل عليه من الخلف باش سدها ليها و طبع قبلة خفيفة تماك خلاها تتنى و تخرج عينيها ...
هادية : ش ش شكرا ..
بهاء : باقي كانتسنى الكادو ديالي ...
هادية : (تبسمات) خديتو و رميتو ! (هزات كتافها) نتا لي هرستي قلبي على جوج !
بهاء : ياك الالا ..
هادية : (هزهزات راسها) اييه ا سيدي ..
بهاء : و شنو كان !
هادية : شي حاجة ! ما عمرك غادي تعرفها طبعا حيت صافي (ضربات يد فيد) مشات ..
بهاء : غير تلميح !
هادية : (حركات راسها يمين و شمال) الا والو ..
تبسم و تحنى متكي تاني على فخضها ... تنهد براحة و شاف فعينيها ...
بهاء : و ايلا قلت ليك انا عارف شنو خديتي !
هادية : (تبسمات) العجب ، باش غادي تعرف بالسلامة ؟
بهاء : (غمزها) عندي عينين فكاع البلايص ...
هادية : ما فراس حتى واح (سكتات منين استوعبات بلي كاين لي عارف) لواه !
بهاء : (ضحك حتى بانت الغمازة لي فجنب فمو) و شفتي ..
تزنكو حناكها و دورات وجهها كاتشوف فالبط وسط الما ... و هو بقا متبع ليها العين ... بدل الموضوع منين شافها غادي تغراق فبلاصتها بقوة الحشمة ...
بهاء : مزيان منين ما خليناش تال اللخر ، ما كنتش غادي نجلس معاك مرتاح ، الخوف كان لاعب عليا بالمعقول
تبسمات و رجعات شافت فيه ثاني ... دوزات بديها على راسو و نطقات...
هادية : لهاد الدرجة ؟
بهاء : و اكثر ...
هادية : (علات حجبانها) غريب ...
بهاء : (شد فيديها) غريب ، عجيب ، فريد ، لي بغيتي تقولي .. جاي مع حالتي
تنهدات بحسرة ، كلمات كثيرة كادور فراسها و لكن التعبير فبحال هاد المواقف كايخونها ، شي حاجة لي جديدة عليها ، ماشي ساهل تعرف تتعامل معاها بيه فيه ...
هادية : غير بغيتي تعذبنا و صافي
بهاء : الله يسامح ، غادي نعوضك على لي فات .. (شاف فصباعها و دوز صبعو على البنصر ( لي كايركب فيه الخاتم)) هاد الصبيع خاصو لي يزيرو !
هادية : (تبسمات و جرات يديها من قبضتو) باقي لحال ، بلاتي شوية ...
بهاء : مزال ما واجداش ؟
هادية : (نفات براسها) لا ماشي هكاك ، غير بغيت نتهنا على ريا هي اللولة ، ما بغيتش نزرب عليها ... تتزوج و تمشي لدويرتها و ديك الساعة نشوفو انا وياك ...(تبسمات) نشوفو واش قد ثيقتي و لا باقي العادة هي العادة.
بهاء : انا كنت طالب الزواج قبل منهم !
هادية : هههههه عثمان زرب عليك ، صبر ما عندك ما دير ...
أنت تقرأ
LET IT SNOW (بالدارجة المغربية)
Romance#ممنوع_النشر 🔏 •°• #Let_it_Snow •°• •Love is a beautiful kind of fear• بقلم : ❀⁂𝑺𝒂𝒇𝒊𝒚𝒂 𝑵𝒂𝒈𝒂𝒕⁂ صفية نݣات ⁂❀ ...
