#الفـــصــل_التالث : #دعيها_تثلج
#Let_It_Snow ❄️
#🅂🄰🄵🄸🅈🄰_🄽🄰🄶🄰🅃 🔏
#𝓘𝓻𝓲𝓼
تفتح باب المصعد وخرجو منو بثلاتة ... ريا بقات مع هادية فالكلينك غادي تبات معاها .
وقفو فنص الطريق، بين دارهم ... عنقات حبيب مطبطبة على ظهرو .. عارفاه حتى هو موجوع غير كايحاول ينقص دقتو .
ساندية : هي غادي تولي لاباس !
حبيب : (تبسم) ما عنديش شك فهادشي .
ساندية : هاح على الكبدة .. الله يكملك بعقلك و يبارك فيك .
حبيب : امين ... تصبحو على خير (باس يديها) الله يبارك ليك ويجعلك قدام السعد عليهم
ساندية : (ردات ليه البوسة وعينيها مغرغرين) امين .
حبيب : كنا مقررين حاجة اخرى .
ساندية : (قاطعاتو) حتى حاجة ما تهم دابا، المهم هي بيخير صافي ، باقي قدامنا يامات الله ارا ما نقررو !
حبيب : ان شاء الله .
ارون : تصبح على خير
حبيب : (لوح ليه بيديه) و انت من اهلو .. تهلا
ارون : ما تحتاج توصي .
دور يديه على خصرها وهزها بين يديه .
ساندية : ولا ارون !
ارون : ياكما كنتي معولة دخلي على رجليك
ساندية : و نسبق اليمين .
ارون : حتى لغذا ان شاء الله .
تقدم ناحية باب دراو و حبيب كايشوف فيهم و يتبسم .. واخا غيران كايبقا راجلها وعندو الحق فيها ...
ارون : ديري فيا خير دقي على جيلان تحل لينا .
ساندية : (ضحكات) واخا ا سيدي .
دارت اش قالت ليها و بقاو كايتسناو بينما حبيب دخل لدارهم و طرق الباب ... حط السوارت فبلاصتهم و شعل الضواو .. كانت الطبلة ديال الݣوطي باقا محطوطة . تنهد و فتح صدايف القاميجة محيدها فمرة . و بدا كايجمع ...
رد كل حاجة فبلاصتها و غسل اللواني ... منها معاون منها محيد الستريس ...وغير سالا نشف يديه و خرج من الكوزينة طافي الضو .
دخل للبيت لقا تلفونو محطوط فوق البيرو كايفيبري .. غير لمح سميتها قرن حجبانو مستغرب اشنو لي يخليها تصوني فهاد الوقت وفيديو من الفوق ... و بلا ما يتردد جاوبها !
حبيب : الو !
ميسان : (بحماس) هاه، حب .. السي (خرجات عينيها فيه) ا اثير .. س س سمحلي حيت صونيت ليك فهاد الوقت.
حبيب : (جلس فوق فراشو و تبسم) عادي ماشي مشكيل ! واقعة شي حاجة ؟
ميسان : (بارتباك) همم ! م ماما زعما ماماك ، زعما مامانا
لسانها ما بقا عارف اش يخرج .. عقلها ما معاهاش وهي كاتشوفو ماشي كيما موالفة ... جاتها فشكل تهضر معاه، وهو هاكا ما قدراتش تركز ... خلاتو ما فهم منها والو، غير كادخل وتخرج فالهضرة .
حبيب : (تنهد و نطق بهدوء) مـــيسان !
ميسان : (نزلات عينيها) نعم .
حبيب : تبتي وقولي جملة مفيدة باش نفهم عليك ... مالها ؟
ميسان : ت ت قدر تلبس تيشورت عليك .. تعنكشت !
طفا الكام و نطق ..
حبيب : هاكا مزيان ؟
ميسان : ولا تاني بغيت نشوفك ! زعما ماما بغات تشوفك .
حبيب : (تنهد) اش بغات .
ميسان : من قبايلة وهي قلبها ضارها على هادية ، وصونيت زعما ايلا دوز ليها التلفون تهضر معاها تطمن .
حبيب : فهاد الوقت !
ميسان : (حنحنات) الا شفتي غادي تلقاني من قبايلة وانا كانصوني حتى تشوشت عليك ...
حبيب : ياله هزيت التلفون ..
ميسان : (هزهزات راسها بتفهم وبدات كاتشرح ليه) راه ماشي عݣزات ولا شي حاجة ، بغات تجي و ما خلاهاش بابا خافها تلاقا بمامات ساندية تجي على غفلة ثاني، ديك النهار نقزاتها ولكن ما قديناش نخاطرو ..
حبيب : (هزهز راسو) فهمت .. من حقو !
ميسان : ياك بعدا نتا لاباس ؟
حبيب : بيخير !
ميسان : و نقدر نعرف علاش ما جاوبتنيش ؟
حبيب : (دايها على قد عقلها) خرجت بالزربة ما رديتش البال للتلفون وصافي، تقدري تعيطي وقتما بغيتي غادي نحاوبك قلتها ليك شحال من مرة !
ميسان : (تبسمات) شكرا .
حبيب : (تنهد مجاوبها على سبب الاتصال) هادية فالطبيب غذا عاد تخرج .
ميسان : (حلات عينيها على وسعهم) اويلي مالها ...
حبيب : تقريبا انهيار عصبي ...
ميسان : ما يكون عندها باس ... ما تخافش ختك غادي تنقزها حتى هي .
حبيب : ان شاء الله ...
ميسان : عليها حتى عزيزي مختفي .
حبيب : كان معاها ..
ميسان : خليتوه فالكلينيك ؟ اشمن كلينيك نمشيو عندها غذا
حبيب : هي غذا غادي تخرج ان شاء الله ، ايلا بغيتو مرحبا بيكم فالدار
ميسان : (هزهزات راسها) ان شاء الله ... واذن بلا ما نقولها ليها دابا حتى لغذا .
حبيب: من الاحسن .
أنت تقرأ
LET IT SNOW (بالدارجة المغربية)
Storie d'amore#ممنوع_النشر 🔏 •°• #Let_it_Snow •°• •Love is a beautiful kind of fear• بقلم : ❀⁂𝑺𝒂𝒇𝒊𝒚𝒂 𝑵𝒂𝒈𝒂𝒕⁂ صفية نݣات ⁂❀ ...
