LET IT SNOW (بالدارجة المغربية)

(04)

دخلو للببت و شدو عليهم الباب ، تكسل بهاء و بدا كايحيد عليه الفيست و القاميجة ماشي من النوع لي كايقدر يبقا مزير النهار كامل .. خرجات عينيها فيه و نطقات بصوت منخفض و لكن بنبرة منفعلة ..

هادية : اش كادير ؟
بهاء : (ببرود) كانتعرا عليك باينة ! ياك ا مرتي اليوم تزوجنا ما بقا عندك مناش تحشمي صافي (غمزها و ضحك) راه ما كانقدرش نبقا مزير
هادية : الله يمسخك ..
بهاء : عرفتي عجبني نشوف راسي مزوج بيك ، جيتي معاي !
هادية : لهلا يحييك ..

حل السمطة ديال السروال و هي دير يديها على عينيها ، حلات شقة بين صباعها كاطلل عليه منها تشوفو اش كايدير .. و هو يقفزها حيت كان حاط عينو عليها ..

بهاء : ياك قلنا ليك ما تحشميش ...
هادية :عع علاش كاتحيدهم ! واش غادي تنعس هاكا ؟
بهاء : (هز كتافو) ما عنديش حل اخور !

تندق فالباب ، فتح و خدا داكشي لي كان موصي عليه كريم و رجع لعندها شاف مباشرة فعينيها و غلباتو الضحكة .. تمالك نفسو تاني و رقق صوتو مقلدها ..

بهاء : ما خفتيش مني ا هادية ! ما خفتش منك .. نتي غا حليت سمطتي شداتك القشعريرة
هادية : و و عاوتاني لكل مقام مقال .
بهاء : دوري وجهك خليني نلبس على راحتي
هادية : و فين غادي تنعس
بهاء : فالسطح !
هادية : همم
بهاء : ايلا بغيتي تشوفي هانية !

دورات وجهها عاطياه بالظهر و عاودات سولات ..

هادية : و فين غادي تنعس اسي ؟
بهاء : ما كانش عند بالي نتي مكلخة ! هاء باينة كاين فراش واحد فين بغيتيني ننعس ؟
هادية : اتنعس حداي !
بهاء : (بنفس طريقتها) ياك لبارح نعستي معاي فبيتي ! نتاهكتي حرمتي
هادية : (دارت عندو بالزربة) و ماشي هي حداك !
بهاء : (غمزها كايستفزها) خايفة لا ما تقدريش تقاوميني ؟ الصارحة شكون نكون معاها و تقدر تصبر على خبزتها طيب !
هادية : لا حول و لا قوة الا بالله .. هههه بهاء لبارح كنتي سكران و كنتي بعقلك على دابا !
بهاء : تحمست ، غادي نعس انا و مرتي لاول مرة !
هادية : ويك ويك ، لصقات ففمك هاد مراتي .. (علا حجبانو كايقلي ليها السم و هي تكمل هضرتها منخلاه) غادي تشد يديك عندك ، تافقنا!
بهاء : و خوفي عليا نتي لي تت
هادية : شششش ما تكملش !
بهاء : (حط يدو على شفايفو) هانا .
هادية : (تكسلات و حيدات عليها التريكو ديال الصوف) عييت
بهاء : (تجمع على راسو كايطنز عليها) اهيا ! وقفي عند حدك ، ما تشوفينيش داخل سوق راسي تبغي تستاغليني !
هادية : هههه و ما كاتسالاش ..
بهاء : و نتي و شنو كايفتي عليك مخيخك
هادية : (تنهدات و جلسات جنب السرير) غير ما مولفاش و صافي
بهاء : ما وقع باس ، اول مرة و ان شاء الله اخر مرة ، ما خطا ايلا عاودتي تقتي فشي حد اخور مرة خرة
هادية : (حيدات الغطا و دخلات تحت منو) خايف على بلاصتك ؟
بهاء : و شنو ! واخا اول مرة ديالك خديتها ليك ما نبغيش لي يجي بلاصتي ، كانغير هههه
هادية : (تبسمات) ما عرفتي الوقت شنو غادي تجيب و بمن غادي تلاقينا ، و لكن نتا كنتي اسثتناء بالنسبة ليا و ما كانظنش منك جوج
بهاء : هاح عليك (تخشا حداها و نعس جنب مكالي راسو بيديه كايشوف فيها) شتي نتي راك نتي .
هادية : ههههه اودي ما عرفت انا هاد الزعامة ديالي فين غادة بيا
بهاء : للخير ان شاء الله ..

حول انظارو للكسوة لي كانت معلقة فباب الماريو و تنهد ...

هادية : (شافت فين كايشوف و عاود دارت شافت فيه) مالك ؟ ياك لاباس !
بهاء : خالتي كادوز من محنة مادية و ما بغاتش تخليني نعاون .
هادية : من حقها ... السيدة بنفسها ما تاخدش منها موقف ..
بهاء : ما نقدر ناخدو اصلا !
هادية : و ما عرفتيش شنو لي مزيرهم ؟
بهاء : ايلين عرسها قريب بزاف ، قالت لي خالتي بلي تنازلو على شحال من حاجة على قبل يأثثو الدار ... حتى من لاغوب ما غاديش تلبسها .. اقتارحت باش انا نتكلف بالعرس و ما بغاتش .. ما بقيت عرفت ما ندير !
هادية : نخلي ليها ديالي ؟ تبغي تلبسها ؟ على الاقل مساعدة انسانية !
بهاء : و نتي ما عندكش مشكيل ؟
هادية : ذكرياتها ها هوما فقلبي و ما غاديش نعاود نلبسها ، اللهم تستنفع بيها ، عادي !
بهاء : واقلة غادي تفرح بيها ..
هادية : بغيت ليها فرحة كثر من فرحتي انا بيها ... غا يخصها غير تعدلها فالطول و صافي حيت هي قصيورة ..
بهاء : خالتي خياطة ما تهزيش هم .
هادية : و ها هو هم و زال من على قلبك ..
بهاء : بفضلك !
هادية : الفضل كولو من الاساس ليك ... (دارت يديها على فمها تفوهات) سعداتك بهاد الحب كامل ، (كملات بالزربة) ما حاسداكش و الله
بهاء : ههههه شكرا ..
هادية : تصبح على خير .
بهاء : (طفا الضو) و نتي من اهلو ..

تبسمات ليه و عطاتو بالظهر و دغيا نعسات بينما هو بقا داير يديه ورا راسو و كايشوف فالسقف كايفصل و يخيط حتى حطات راسها على صدرو و تمخششات فيه ... تبسم و نكق بخفوت ..

بهاء : عرفات تقول غير جمع يديه عندك !

مد يديه لشعرها و بلا هواه بدا كايدوز صباعو بين خصلاتها حتى داه النعاس و مشا هي هاديك .