#الفـــصــل_الأول : #لذة_محرمة
#Let_It_Snow ❄️
#🅂🄰🄵🄸🅈🄰_🄽🄰🄶🄰🅃 🔏
#𝓘𝓻𝓲𝓼
هز عينيه شاف فعينها مباشرة ... و حنحن ما عارفش منين غادي يبدا و لكن هادشي غادي يأثر على المحطة ديالو و على كاع لي خدامين فيها ... و خاصو يلقا ليه الحل ، هادية كنز بالنسبة ليه و لكن ما مستاعدش يضحي على قبلو .
بناني : هااا ، و شنو غادي يبان ليك ايلا مشاو حتى ساقو حقيقة زواجك المزيف ؟ نتي عارفة الناس كيفاش تفاعلو مع الاخبار و شهر على قدو و هوما يرسلو فالورد و التهاني فاللخر يلقاو هادشي كامل ما منوش ! شنو غادي تكون ردة فعلهم ؟ شنو غادي تكون نظرتهم لينا ..
هادية : (بارتباك) و لكن ! شكون قال هادشي !
بناني : لي كان غادي يكون راجلك ! (تنهد) لي بغيت نوصلو ليك هو حنا ما مستاعدينش نخسرو بزاااف على قبلك ، اه تبارك الله عليك ربحنا معاك و لكن منين غادي تجي تغراقي ما غاديش نمدو ليك يدينا !
هادية : (علات حجبانها منبهرة من كلامو ) و المطلوب مني !
بناني : تصححي الاخبار المتداولة عليك و لا تقدمي استقالتك !
هادية : و لكن ...
بناني : (قاطعها) لي عندي قلتو !
هادية : (هزهزات راسها ببطئ) ما قلتي عيب ! شي حاجة اخرى !
بناني : (كرر كلامو ببرود) لي عندي قلتو !
هادية : نهارك مبروك !
خرجات من المكتب و رجليها ما هازينهاش ، هي محتاجة لخدمة و ترقية و هو كايقولها حطي استقالتك ... دخلات للحمام لي تماك فزكات عنقها باش تصحصح و شافت فالمرايا ، مركزة مع انعكاسها و افكار كثييرة كادور مرونينها ...
**
جالس وسط سيارتو كايقرا فالتقرير ديال التحاليل لي خرجو و يعاود ، ما عارفش واش يتيق و لا لا ، واش يهضر و لا لا ... و اكثر شي كايفكر فيه هو الوعد لي عطاه لهادية و الرسالة لي رسل ليها ، شنو يدير معاها .
قاطع سهوتو التلفون ، جبدو من جيبو و منين بانت ليه ميسان ما بغاش يزيد يشوشها و جاوب ..
بهاء : الو !
ميسان : (بانفعال) امدرا ! اش تم !
بهاء : ما تخافيش ، ما عندك والو الحمدلله ، بيخير و على خير و كلشي تمام !
ميسان : بالصح ! (تبسمات و شافت فهاينة) ما كاين والو ا ماما .
هاينة : الحمدلله ، و هو ؟
ميسان : و نتا !
بهاء : (تبسم و هو مزير) الحمدلله م مزيان !
ميسان : زعما زعما !
بهاء : بلا قياس كاع ! ياله تلاحي انا غادي نمشي ..
ميسان : ايمتا راجع ؟ نتسناوك للعشا !
بهاء : غادي نتعشا معاكم .
ميسان : واخا ا سيدي الله يجيبك على خير ...
بهاء : ديرو بحساب حتى عثمان ! قال غادي يجي
ميسان : تمام ، ياله تهلا
بهاء : تلاحي تقراي ما ينفعك ، و نتي من نهار خداو منك جغمة ديال الدم ما ركزتي فشي حاجة .
ميسان : خفت !
بهاء : ما عندك مناش تخافي و انا معاك ...نعسي على جنب الراحة
ميسان : يحفظك ليلي
بهاء : و غبري ...
قطع عليها و شاف فالساعة ، كان باقي دقايق قليلة باش يبدا البرنامج ديال هادية ، شعل الراديو و رجع اللور كايخمم .. و غير سمع صوتها تبسم ...
أنت تقرأ
LET IT SNOW (بالدارجة المغربية)
Romance#ممنوع_النشر 🔏 •°• #Let_it_Snow •°• •Love is a beautiful kind of fear• بقلم : ❀⁂𝑺𝒂𝒇𝒊𝒚𝒂 𝑵𝒂𝒈𝒂𝒕⁂ صفية نݣات ⁂❀ ...
