#الفـــصــل_التالث : #دعيها_تثلج
#Let_It_Snow ❄️
#🅂🄰🄵🄸🅈🄰_🄽🄰🄶🄰🅃 🔏
#𝓘𝓻𝓲𝓼
عينيها من عليه ما زالوش و غير نزل على الفنجان كامل دقة وحدا تبسمات وعضات على شفتها بحماس ما سايعاهاش الدنيا ... ماشي هادشي لي غا يطمنها بلي عمرو غادي يطلق من يديها ولكن واخا هكاك فرحانة حيت طبق العادة و بالزايد عاد ...
حط ابراهيم فنجانو وسط الطبسيل ودار شاف فحبيب باش يبدا هضرتو ... و على شفايفو ابتسامة عريضة ...
ابراهيم : نهار كبير هذا ... للعائلات بجوج (تبسم) ولا نقول لعائلتنا الكبيرة، نوارتي يماكم هادشي مخلينا من شحال هادي عائلة، واخا هاد الكلمة ماشي غير الهضرة لي كاتعطيها حقها .. و لي زاد نصفها هو زواج ريا وعثمان ... الله يرضي عليهم ...
شد عثمان فيد ريا وزير عليها فرحان بيها ... بينما ابراهيم كمل كلامو ..
ابراهيم : (حنحن) المهم ها حنا ثاني مجموعين على الخير، ما كاينش ما احسن من هاد الاحساس بالنسبة ليا، والله يرضي على وليداتي لي خلاوني نعيش هاد الاحساس وهاد الفرحة ... السي حبيب، لي نطولوه نقصروه طالبين يد بنتنا هادية لولدنا بهاء .. ما تخافش واخا هارب ليه شوية والزبايل على الجهد، يدير وحدة ويوصي على الثانية....
بهاء : (باستغراب) الحاج !
ابراهيم : (خرج عينيه فيه) ولدي ونشهد فيك ...
بهاء : (تبسم جنب بسخرية) الله يكثر خيرك !
ابراهيم : الرضاوات ...
منظرهم ضحكهم ... و ميسان خايدة ترجم بالسهات اش كايقول ابراهيم لازنور و ايلين ...
ابراهيم : (دار شاف فحبيب مكمل هضرتو) ولكن كايبغيها و غا يديرها فعينيه، غا يسبقها على راسو وان شاء الله ما عمرو يقلقها ولا يخلي دمعتها طيح .. شتااااان الفرق بين بهاء لي مشا هارب لاسطنبول و بهاء لي جالس حداك دابا ، وايلا كان شي حد عندو الفضل فهادشي غادي تكون هي هادية ...
شاف بهاء فهادية وغمزها وهي تنزل عينيها للارض عاضة على شفتها ...
دار حبيب شاف فيها وغير لمح منظرهم تنهد ... العرارم معرمين عليه، واخا عمرو فرق بين خوتو .. هاد المرة جاتو الهضرة صعيبة، عكس نهار طلب ارون ساندية ولا نهار طلب عثمان ريا ... ما يقدرش يفرط فحتى وحدة فيهم ... ولكن هادي جابت ليه التمام حيت ماراهاش غير اخت وحبس ، هي حياتو كلها ... و بقد ما فرحان ليها ومرتاح لهاد التزويجة، بقد ما مزير حيت غادي تبعد عليه و تخرج من جناحو، او بالاحرى راه كايشوف هو لي خارج من تحت جناحها ..
حسات بيه كايشوف ليها وهي تهز راسها، تبسمات ليه وخديداتها مزنكين خلات عينيه يتغرغرو .. بلع ريقو وعاود شاف فابراهيم هزهز راسو بوهن وهو مزير على شفايفو حابس البكية ...
حبيب : الله يجعل كلشي مبارك ومسعود... نتوما طلبتو وحنا حاشا واش نردوكم خايبين، بنتنا موافقة وحنا ما نزيدو غير الله يبارك !
ابراهيم : بارك الله فيك .. نقراو الفاتحة ؟
حبيب : يا بسم الله ..
أنت تقرأ
LET IT SNOW (بالدارجة المغربية)
عاطفية#ممنوع_النشر 🔏 •°• #Let_it_Snow •°• •Love is a beautiful kind of fear• بقلم : ❀⁂𝑺𝒂𝒇𝒊𝒚𝒂 𝑵𝒂𝒈𝒂𝒕⁂ صفية نݣات ⁂❀ ...
