#الفـــصــل_التالث : #دعيها_تثلج
#Let_It_Snow ❄️
#🅂🄰🄵🄸🅈🄰_🄽🄰🄶🄰🅃 🔏
#𝓘𝓻𝓲𝓼
واقفة فالكوزينة كاتنصب الغذا ، تشهات تدخل ليها و طيب بحال شحال هادي و منها النيت تنقص على ريا شوية ، منين خدات العطلة و هي لي مكلفة بالكوزينة ... و مع ذلك ما مخلياهاش توقف بوحدها ، كيما تحركات كاتحرك معاها ....
انا ساندية جالسة فوق الكرسي و حاطة يديها على خدها ساهية و كاتخمم ، هم الجبال فوق كتافها و كلما تعطلات فالهضرة كلما زاد الحمل ثقال ... شقات تنهيدة طريقها من وسط صدرها ... خلات عينيها يدمعو و النفس زادت ضياقت ...
صونا شي حد فالباب فيقها من سهوتها ، ناضت كاتجر رجليها فتحات و غير لمحاتها تبسمات ليها ...
ساندية : اهلا و سهلا ، عاش من شافك .. (خوات ليها الطريق) دخلي بعدا ..
جيلان : (سلمات عليها) الله يكبر بيك ..
ساندية : صافا ؟
جيلان : الحمدلله ... و نتي ..
سدات الباب وراها ...
ساندية : الحمدلله حبوبتي ...
ريا : (طللات عليها) اهلا و سهلا ..
ساندية : طل علينا القمر
جيلان : حشمتوني ...
دخلو للبيت الصغير و جلسو حدا بعضياتهم ...
ساندية : لواه لواه، فين غبرتي ؟ ايلا كان على ديكشي ديال باباك نتي بعيدة عليه
جيلان : عارفة ، غير كنت دوزت واحد اليومين مع ماما و يومين كنت كانخمم فيهم واش نسافر معاها .. و صافي سالات السيمانة و انا مختفية
ساندية : بالصحة التسافيرة مقدما !
جيلان : لا ما غاديش نمشي ...
ساندية : و علاش ؟
جيلان : و هي غادة مع راجلها انا اش خشاني وسطهم
ساندية : نتي بنتها و من حقك تمشي ..
جيلان : (نفات براسها) الا ... غير بلاش ...
دخلات عندهم ريا و هي فيديها صنية ديال العصير و الشوكولا ..
جيلان : ايلا بقيتو فكل مرة كانجي عندكم تحطو ليا صينية ، غادي يجيكم افلاس و غادي تولي فيا قنطار
ريا : مرحبا بيك اليوم و غذا ...
دخلات عندهم هادية حتى هي .. سلمات عليها و جلسو مجموعين من بعد ما كملو شغالهم ...
جيلان : (شافت فساندية مكملين موضوعهم) ما بغيتش نمشي ماشي حيت محسوسة من شي حاجة، بابا ما بغيتوش يبقا بوحدو .. مزال ما ولف على غياب ميما و ولا عاطي للݣارو سحقة ، نمشي نرجع نلقاه فيه اكتئاب ...
ساندية : (تنهدات) يخليلي لي كاتهز هم باباها ..
جيلان : و شنو راه هو الدم فالعروق ..
ساندية : الله يحفظو ليك ..
جيلان : اللهم امين .. و يخلي ليكم حتى نتوما ما عز عليكم ..
هادية : امين .. اللهم امين ..
تندق فالباب و هاد المرة ناضت ريا تشوف ، كان حبيب سبقها و فتح الباب ... خرج عينو منين شافها واقفة قدامهم و الدموع فعينيها ... هي خايفة و هو مصدوم .. بلع ريقو و نطق بتردد
أنت تقرأ
LET IT SNOW (بالدارجة المغربية)
Romance#ممنوع_النشر 🔏 •°• #Let_it_Snow •°• •Love is a beautiful kind of fear• بقلم : ❀⁂𝑺𝒂𝒇𝒊𝒚𝒂 𝑵𝒂𝒈𝒂𝒕⁂ صفية نݣات ⁂❀ ...
